MARK 10
10
Tanao Tabo Lamga Jesu Niu Katikhaibo
(Mt 19.1-12; Lk 16.18)
1Sigasu Jesu niu sibo bamse phut lujiu Jordan giu kenjiu Judea ramluong lam tadmide. Siga chamai mendi pakhuga wanglande, sichiujiu paniu paliutu katikhai kinbo kumjiu katikhai sude.
2Pharisee maidung khangsianiu wanglujiu patu tathak thiujiu manra kamsude. Paliuniu maniu-e, “Aliu khuga dinkhai janlo, aliugu Tacheng-tajai ganiu mai khatniu panao tabo suima?”
3Jesu niu maniubo chamniu paokakge, “Mose niu naliu khuga dekumbo ladriat pikhai bilo?”
4 #
Taj 24.1-4; Mt 5.31. Paliuniu paokakge, “Mose niura mai khatniu tanao tamide chiubo ariak khat raokhai lujiu panaotu taraleng suikhai-e.”
5Jesu niu paliu khuga din-e, “Mose niu sibo ladriat naliu khuga raokhaibo sira, naliu lung tanjubo jengniu raokhaibo-e. 6#Chab 1.27; 5.2.Chiudi nda paphibangga, ting-kadihtu damkhaibo tinggara, ‘Tingwang niu npiumai nai npuimaitu damkhaibo-e,’ chiujiu masanbo ariakga dinkhaibo-e. 7#Chab 2.24.Sijengniu npiumai siniu papui nai papiutu phut lujiu panaotu lung aruangmi rabo-e, 8sichiujiu khang niase khat thiumi rabo-e.’ Sijengniu panaise nia makjiu khat thiu mibo-e. 9Sichiusai Tingwang niu aruang khai mibo situ, chamainaniu kam npek mimak rabo-e.”
10Paliuniu kalung lamse ngutbo tingga, pakhommaidung siniu haibo lamga Jesu khuga maniu lan-e. 11#Mt 5.32; 1 Co 7.10,11.Paniu paliu khuga din-e, “Mai khatniu panaotu talujiu katambo puitu lunglan sai, paniu panao khuga makha mibo-e. 12Sikumjiu maipui khatniu pakinatu malujiu, katambo piu khuga lunglansai, pase makha mibo-e.”
Jesu Niu Nahmaidungtu Thoikhaibo
(Mt 19.13-15; Lk 18.15-17)
13Maidung khangsianiu nahmaidung piriga pijiu kabakhaira, Jesu khuga maluang wang-e. Chiudi pakhommaidung siniu paliutu kasanjiu rukhaide. 14Haise Jesu niu siluboga, palung pomjiu pakhommaidung khuga din-e, “Paliutu akhulam wangra kham tulo, palamra Tingwang gu Chawangdihse haikumbo nahmaidung gu-e. 15#Mt 18.3.I niu naliu khuga palingjiu dinbo-e chiubora mai khatniu haibo nahmai khat kumjiu Tingwang gu Chawangdih situ lukhai maksai wadaodi siga ngutsi lakge.” 16Sichiujiu paniu nahmaidung situ pamlujiu paliu mathiu riga paben kabakhaijiu thoikhai bide.
Kalekwibo Piu
(Mt 19.16-30; Lk 18.18-30)
17Jesu niu npuikiga tadpadboga, mai khat pakwang pamasuangga khudung kiujiu, pakhuga maniu-e, “Kawibo Katipao yo, tingtheng karingbo daora Iniu degu kam ralo?”
18Jesu niu pakhuga din-e, “Dekamjiu nangniu atu kawibo chiu kujiulo? Tingwang makbo mai khatdi kawibo ha-e. 19#Tad 20.13; Taj 5.17;Tad 20.14; Taj 5.18;Tad 20.15; Taj 5.19;Tad 20.16; Taj 5.20;Tad 20.12; Taj 5.16.Ladrianse nangniu sijiu bamme: ‘Maitu gimane; makha mane; aga mane; mai khat tudi arat madam mane; maitu sontiu mane. napui napiutu chakhuang thiulo.’”
20Sinapiu siniu din-e, “Haibo ladriandung hai Iniu nda nahting gasu majaijiu lungkhang mibo-e.”
21Jesu niu patu lungsabo mikhuanniu phuilujiu din-e, “Nakhuga wakhat machang makha-e. Tadlujiu, nagu kabambo hina jonlujiu, kaleksa maidung leng njan khai milo, sichiusai tinggen dihga nang kalekwi rabo-e; sichiujiu wang asai suilulo.” 22Sinapiu siniu haise chiuluboga, pazu kin masuk mide khatdi pachun sajiu tadmide, palamra pase kalek wi-chang wibo piu-e.
23Jesu niu pakhommaidung situ ajang phuilujiu paliu khuga din-e, “Kalekwi mainiu Tingwang gu Chawangdihga ngutrabo hai dejiukha kunglo!”
24Haibo cham donniu pakhommaidungse paliu suang hamide. Chiudi Jesu niu dinlan-e, “Anahmaidung yo, Tingwang gu Chawangdihga ngutrabo hai dejiukha kunggulo! 25Kalekwi mai khatniu Tingwang gu Chawangdihga ngutrabo suang, qontrao khatniu npin miga buang ngutbo siniu mala diang-e.”
26Siga pakhommaidungse paliu suang ha matan mide; khatdi paliu ronna khat-khat khuga maniu-e, “Sichiusai, saokum mainiu ranlubo hai ngaolu ralo?”
27Jesu niu paliutu phui mating lujiu din-e, “Haise chamaina lengra daolakge, chiudi Tingwang lengra wadi daolakbo thiu makge.”
28Siga Peter niu din-e, “Phuilo, aliura wahina saodiak lujiu nasai suitad kinbo-e.”
29Jesu niu paliu khuga din-e, “Yo, haise Iniu naliu khuga pachang paling dinbo-e: mai khatniu ajeng gasu khatdi kawicham jengniu paky, palu, papui-papiu, pasingna, patan-panahtu haibo ringtingga phutkhai sai, paniu nkiujiu daorabo-e. 30Paniu haichiujiu chariu magenthiubo khengkhai sai, padam kai nkiujiu chaky, chalu, papui-papiu, pasingna, patan-panah hai wangkinbo ringtingga daorabo-e, khatdi tingtheng karingbose daorabo-e. 31#Mt 20.16; Lk 13.30.Sichiujiu tuhoi mai kakeng khaniu raijiu bamdi kanammi rabo-e; khatdi mai kakeng khaniu kanamjiu bamdi raimi rabo-e.”
Jesu Niu Pah Shairabo Lamga Dinlon Pasumbo
(Mt 20.17-19; Lk 18.31-34)
32Tuhoira paliu Jerusalem lam tad kinne. Pingbijiu tadkinbo pakhommaidung suang, Jesu tadrai mide, khatdi maidung siniudi pingbijiu suitad karen kinne. Siga Jesu niu pakhommaidung khang kariu-je-niakiu situ puipad tamlujiu, pakhuga padrabo hinase dinkhai lande. 33Jesu niu paliu khuga din-e, “Phuilo, aliuniu Jerusalem lam tad kinbo-e, siga Chamai Nahpiu situ singkudung nai Tacheng-tajai katipaodung ben-ga pikhaimi rabo-e. 34Sichiujiu paliuniu, patu tanui thiujiu, tatai masiu khai sune, dapsune, khatdi kamshatmi mine. Chiudi pase jengsum saiga ringsulan rabo-e.
Jacob Nai John Niu Khengbo
(Mt 20.20-28)
35Siga Zebedee nahpiu kania, Jacob nai John niu Jesu khuga wanglujiu panainiu din-e, “Katipao yo, anaileng wakhat kamkhaira luni-e.”
36Jesu niu panai khuga maniu-e, “Iniu nanaileng degu kamkhai ratu luni jiulo? 37Panainiu paokakge, “Nangniu pakendibo nawangbamga wangbo naise, anai khang khattu naben majatlam, khang khattu naben mawuilam, natu maluang ntao machamra anainiu lunibo-e.”
38 #
Lk 12.50. Jesu niu panaitu paokakge, “Nanainiu khengjiu bambose degulo chiubo nanainiu simakge. Iniu sakrabo piangse nangnai sak ngamlu buima? Atu tadui nphumbo kumjiu nanai nphum ngamlu buima?”
39Panainiu paokakge, “Yo, Ania ngamme.”
Jesu niu panai khuga din-e, “Iniu sakrabo piangse nanainiu sakngam sune khatdi atu tadui nphum rabo kumjiu nphum ngam sune. 40Chiudi aben majatlam, maksai mawuilam ntaora pikhai rabo sira angam makge. Haisira Tingwang niu kadakhai lujiu, kadenkhai mibo maidung leng-e.”
41Khommaidung khang kariu siniu haise chiuboga, Jacob nai John tu paliu lungpom karen mide. 42#Lk 22.25,26.Sijengniu, paliutu pakhuga kuwang lujiu Jesu niu din-e, “Maidung niura paliugu mawangpaodung-e chiumai siniu, maidung riga pumtan thinne, khatdi jupaodung siniu chamtan thin-e. 43#Mt 23.11; Mk 9.35; Lk 22.26.Chiudi haise naliu ruanggara sichiumak rabo-e. Naliu mai khat kumboniu dinisai, paniu mai mathiutu machamai thiurabo-e. 44Khatdi naliu mai khat kumboniu karaibo thiunisai, paniu mathiu vang thiurabo-e. 45Palamra Chamai Nahpiu sidi patu macha khaira wangbo makge, chiudi paniu maidungtu macha khaira, khatdi chamai kakengtu ranlu raleng, pagu ringting pipadra wangbo-e.
Jesu Niu Pamik Tiatbo Bartima Tu Wikhaibo
(Mt 20.29-34; Lk 18.35-43)
46Jesu niu pakhommaidung nai maidung kakeng khatu maluang lujiu Jerikho ga wangboga, pamik tiatbo Tima nahpiu, pazanniu Bartima kubo khatniu npuiki mungga ntao lujiu takhengtiu bamniu-e. 47Paniu Nazareth Jesu wangkin-e chiubo chiuluboga, pakhuan tanjiu sen-e, “David Nahpiu, Jesu yo, atu lungsa khailo!” 48Siga maidung kakeng khaniu patu kasanjiu, maliumak bamra din-e. Chiudi paniu pakhuan tanliang- liangjiu sen-e, “David Nahpiu, Jesu yo, atu lungsa khailo!
49Jesu niu mathakkiu lujiu din-e, “Patu kuwanglo.”
Siga paliuniu pamik tiatbo piu situ kulujiu din-e, “Nachun wilulo! Sulo, paniu natu kujiu bamme.”
50Siga paniu pafaise gaopad lujiu pachun wijiu, Jesu khulam machaojiu wang-e.
51Jesu niu pakhuga maniu-e, “Iniu naleng degu kamkhai ratu nangniu machun jiulo?”
Pamik tiatbopiu siniu din-e, “Katipao yo, atu pi-ngao khailo.”
52Jesu niu pakhuga din-e, “Tadsulo, nagu malum siniu natu wikhai mide.” Siga pah ngaonuang mide, sichiujiu paniu Jesu saisui lujiu tad mide.
Currently Selected:
MARK 10: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
