MARK 9

1Sichiujiu paniu dinkiu-e, “Haise maningtao lulo! Tingwang gu Chawangdihse paken dijiu wangbotu ngao makthen shaimak ramai haiga khangsia bamme.”

Jesu Niu Lunlibo

(Mt 17.1-13; Lk 9.28-36)

2 # 2 Pe 1.17,18. Jesu niu jeng charuk saiga, Peter, Jacob khatdi John tu maluang lujiu paliu ronna kakubo maluang khatga khang-e. Sichiujiu paliuniu phuijiu bamboga, pakhuga lunlibo hai wang mide, 3sichiujiu pafai-panidungse kapuangjiu ranran pad sude, kadihpiriga mai khatniudi haise kumjiu kam maka ngamlu lakge. 4Khatdi pakhommaidung khang sum siniu Elijah nai Mose niu wangjiu Jesu tu npao bambo ngaode. 5Peter niu padlujiu Jesu khuga din-e, “Katipao yo, aliuniu haiga bambo hai wi-e. Aliuniu naleng khat, Mose leng khat, khatdi Elijah leng khat chiujiu mathenky sum thiu khaine.” 6Sichiudi paliu khang sumse pingchang-pingmide khatdi wadi dinra sita mide.

7 # Mt 3.17; Mk 1.11; Lk 3.22. Siga kamuang kenwang paliutu gomnam mide, khatdi kamuangjiu gasu chakhuan khatniu din-e, “Haise Iniu kungbo Anahpiu si-e. Paniu kadinbo lad phunglo!” 8Paliuniu majatjiu khatdi ajangjiu phui-e, chiudi mai khat tudi ngao makge. Jesu ronna paliu khuga chap bamniu-e.

9Sichiujiu paliuniu maluang gasu tadkiu lanbo tingga Jesu niu paliu khuga chamtan pijiu din-e, “Naliuniu ngaokhai mibose, Chamai Nahpiu siniu shailujiu ringsulan makthen, mai khat khugadi dintulo.”

10Pagu chamtanse paliuniu majai-e, chiudi sibo lamga paliu ronna ari sude, “Kashaibo gasu ringsulanbo, chiubo ramba hai detulo?” 11#Mal 4.5; Mt 11.14.Sichiujiu paliuniu Jesu khuga maniu-e, “Dekamjiu Tacheng-tajaigu katipaodung siniu Elijah wangraine chiu din jiulo?

12Paniu paokak khaibo sira: “Elijah sira pachang siakjiu wahina kaden khaira wangrai kamigu-e. Chiusai dekamjiu Chamai Nahpiu situ lukhai makjiu magenthiu chariubo khengsonna rabo-e chiujiu Masanbo ariakniu din jiulo? 13Iniu naliu khuga pachang paling dinbo-e: Elijah sira wangrai kamigu-e, khatdi maidungniu masenbo kumjiu paliuniu pakhuga kamkhai kamigu-e. Haise Masanbo ariakniu palamga dinkhai mibose wangtang raleng-e.”

Jesu Niu Rasa Phungbo Nahpiu Khattu Wikhaibo

(Mt 17.14-21; Lk 9.37-43a)

14Paliuniu khommai khangsiamai khuga wanglanboga, siga maidung kakeng khatu ngao-e, sichiujiu Tacheng-tajaigu katipaodung khangsianiu paliutu arijiu bamme. 15Paliuniu Jesu tu ngaoboga, paliu suang hamide, khatdi pakhuga pakwangjiu patu kahumme. 16Siga Jesu niu pakhommaidung khuga maniu-e, “Dekumbo lamga naliuniu paliutu aribam jiulo?”

17Maidung ruanggasu maipiu khatniu paokakge, “Katipao yo, Iniu anahpiutu nakhuga puiwangbo-e, palamra pakhuga rasa bambo jengniu pahai npaopad ngam makge. 18Sichiujiu sibo rasa siniu kam mathad susai, patu tun nkhuang khaijiu, pamun gasu patai ta-nphopmi, pahiu kagetmi khatdi papum pakhiangna siakmi mibo-e. Iniu nakhommaidung khuga sibo rasa situ hathon khaira khengbo-e, chiudi paliuniu hathon ngam makge.”

19Jesu niu paliu khuga din-e, “Naliu hai dejiukha malum makbo mailo! Iniu dethengkha naliutu maluang bamralo? Iniu dethengkha naliutu nkhajiu bamralo? Ngena situ akhuga puiwanglo.” 20Sichiujiu paliuniu Jesu khuga patu puiwangde. Sibo rasa siniu Jesu tu ngao kaji-kari, ngena situ kadihga tun nkhuangkiu, pamun gasu patai pi ta-nphop khai sude. 21Jesu niu papiu khuga maniu-e, “Haise pating dethengkha wangmi jiulo?”

Paniu paokakge, “Pah nadao gasu haichiu mibo-e. 22Haichiujiu patu tadui chami gasu kam shatra kamjiu wangkinbo-e. Aliutu lungsajiu nkha khailo, nangniu nachun-e sai wikhai ngamme!”

23Jesu niu din-e, “Yo, nang naronna suisai, malumbo mai khugara wahina ngam kamme.”

24Papiu siniu senjiu din-e, “I malumme, chiudi bui makge. Atu nkha khailo!”

25Maidung siniu pakhuga wang mana kinbo situ ngao lujiu rasa situ chamtan pijiu din-e, “Chaqon tidbo nai palad padmakbo hiuna yo, haibo nahpiu khugasu padmilo, sichiujiu wadaodi pakhuga ngutlan tamilo!”

26Sibo hiuna siniu ngena situ kadihga tun nkhuang khai lujiu khatdi kam marakhai lujiu npad mide. Ngenase kashaibo kum mide; sijengniu mai hinaniu din-e, “Pahai shai mide!” 27Chiudi Jesu niu sibo ngena bense jujiu patuse pisu chapsu khaide.

28Jesu niu kalunglam ngutboga, pakhommaidung siniu pakhuga mahin maniu-e, “Dekamjiu rasa situ aliuniu hathonpad ngammak jiulo?”

29Jesu niu paokakge, “Kakheng thiuboniu makjiu wakhat niudi haikumbotu hathonpad ngam lakge.”

Jesu Niu Pah Shairabo Lamga Dinlanbo

(Mt 17.22-23; Lk 9.43-45)

30Paliuniu sibo bamse saodiak lujiu Galilee lamse tadwangde. Jesu niu pah dega bamlo chiubo mai khat tudi pi sini makge, 31palamra paniu pakhommaidungtu haichiujiu katikhai bamme, “Chamai Nahpiu situ maidung khuga pikhaijiu kamshat mine, chiudi pase jengsum saiga ringsulan rabo-e.” 32Haichiujiu katikhai bambo rambase, paliu sitanglu makge, chiudi paliuniu pakhuga maniuping-e.

Saoniu Dithu Ralo?

(Mt 18.1-5; Lk 9.46-48)

33Paliuniu Capernaum ga wangtangde, sichiujiu namga ngutboga Jesu niu pakhommaidung khuga maniu-e, “Naliuniu npuikiga nde lamga arikin jiulo?” 34#Lk 22.24.Chiudi paliuniu patu npao kak makge, palamra npuiki gase paliu ronna saoniu dithu ralo chiubo lamga arikhai mibo-e. 35#Mt 20.26,27; 23.11; Mk 10.43,44; Lk 22.26.Jesu niu ntaokiu pakhommaidung khang kariu-je-niakiu situ pakhuga kuwang lujiu din-e, “Mai khatniu rainisai, pase mathiu suang nathurabo-e, khatdi mathiu vang thiu rabo-e.” 36Paniu ngena khattu kuwang lujiu, paliu suangga pichap khai lujiu khatdi patu ben-gai lujiu paliu khuga din-e, 37#Mt 10.40; Lk 10.16; Jn 13.20.“Mai khatniu haikumbo ngena khattu azan-ga lukhai sai, atu lukhaibo-e; khatdi mai khatniu atu lukhai sai, atu ronna lukhaibo makge, chiudi atu langkhaibo Apiu tudi lukhaibo-e.”

Aliutu Atungmak Maise Aliu Gu-e

(Lk 9.49-50)

38John niu pakhuga din-e, “Katipao yo, mai khatniu nazan gasu rasatu hapad bamniubo aliu ngao lujiu, patu aliuniu kham mibo-e, palamra pahai aliu sai suimak mai-e.”

39Jesu niu paokakge, “Patu khammi tulo, palamra mai khatniu chamtan gasu tasibo ngam kambam sai, paniu atu kasabo kammi lakge. 40#Lk 22.24.Palamra aliutu atungmak maise aliugu thiurabo-e. 41#Mt 10.42.Haise maningtao lulo! Naliuniu asai kasuibo jengniu mai khatniu naliutu tadui piang khat sakra pikhai bisai, pagu tathuonse daosiak rabo-e.”

Nuan-ga Jukhaira Hiambo

(Mt 18.6-9; Lk 17.1-2)

42Mai khatniu atu malumbo nahmai khattu paphi masuira nuan-ga jukhai rabo suang, paniu tatupen pawongga khinkhai lujiu duipuiga thonkhai miboniu wi-nkiu-e. 43#Mt 5.30.Sijengniu natu nabenniu pimao khaisai, danthon milo! Naben nia bam lujiu midlan lakbo charuidihgu chamijiuga natu thonkhai mirabo suang, ben khat hajiu tingtheng karingboga ngutbo siniu wi-nkiu-e.#9.43: Ariakkhuang kasia gara chaladriang 44 haise khaisanne. Siga parikse wadaodi shai lakge, khatdi sibo mise wadaodi midlan lakge. 44[Siga parikse wadaodi shai lakge, khatdi sibo mise wadaodi midlan lakge] 45Khatdi naphiniu natu pimao khaisai, danthon milo! Naphi nia bamlujiu charuidihga thonkhai mirabo suang, naphi khat hajiu tingtheng karingboga ngutboniu wi-kiu-e. 46[Siga parikse wadaodi shai lakge, khatdi sibo mise wadaodi midlan lakge] 47#Mt 5.29.Khatdi namik khatniu natu pimao khaisai, ladthon milo! Mik nia bamlujiu charuidihga thonkhai mirabo suang, mik khat hajiu Tingwang gu Chawangdihga ngutboniu wi-nkiu-e. 48#Isa 66.24.Siga parikse wadaodi shai lakge, khatdi sibo mise wadaodi midlan lakge.

49“Palamra mai hinatu matai maruakbo kumjiu maruak rabo-e.

50 # Mt 5.13; Lk 14.34,35. “Matai hai wi-e, chiudi matai siniu pahumse hamisai, dechiujiu haisitu pi humkhai lanralo? Naliu khuga matai humse bamlulo, sichiujiu naliu khat-khat khuga agi-manaijiu bam lulo.”

Currently Selected:

MARK 9: LIANBSI

Highlight

Copy