MARK 8

Jesu niu Chamai Sang Madaitu Kikhaibo

(Mt 15.32-39)

1Pating watheng makbo lungga, maidung kengjiu wang madui lande. Sichiujiu paliuniu wadi tiura hamibo tingga, Jesu niu pakhommaidungtu pakhuga kuwang lujiu din-e, 2“Iniu haibo maidungtu lungsa-e, palamra paliuniu atu jeng sum maluangkhang mide, sichiujiu tuhoira paliu tiura leng wadi hamide. 3Iniu paliutu kikhai makjiu paliu kylam langkhai sai, khangsia maira maliu midi sui-e, palamra paliu kadiu lamsuniu wangbo-e.

4Pakhommaidung siniu pakhuga maniu-e, “Haikumbo ramjingga dechiujiu mai khatniu maidung haijiukha leng tiu kabuibo tatek daolu ralo?”

5“Naliu khuga taruak khuang dejiukha bamlo?” chiujiu Jesu niu paliu khuga maniu-e.

Paliuniu paokakge, “Taruak khuang chinnia bamme.”

6Maidung situ kadihga ntao kiura paniu chamtan pikhaide. Paniu taruak khuang chinniase thin lujiu Tingwang tu thuonkiu khaide, khatdi phetpang lujiu pakhommaidung khuga sise pikhaijiu, paliuniu maidung khugase njankhai bide. 7Paliu khuga chakhapekdi bamniu-e, sise Jesu niu khoilujiu thuonkiu lujiu, sisedi paliu khuga njan khaira pikhaide. 8Mai hinaniu tiu magiu lude, siga maidung riakse sang madai kumbo-e. 9Siga tiu malipadbose khommaidung siniu khoimadui lanboga, chabeng chinnia khoiphui padde. Sichiujiu Jesu niu maidung situ paliu kylam langkhai mide. 10Sichiujiu paniu pakhommaidung situ maluang lujiu, aliam khat gasu Dalmanutha luongriang lamse tadmide.

Pharisee Maidungniu Tasibo Lenkhaira Khengbo

(Mt 16.1-4)

11 # Mt 12.38; Lk 11.16. Pharisee maidung khangsianiu wang lujiu Jesu tu chalad ari sude. Patu tathak thiujiu Tingwang niu suikhaibo madan kamlenjiu tasibo tienkam madu khaira pakhuga kheng-e. 12#Mt 12.39; Lk 11.29.Jesu niu siudi thijiu din-e, “Dekamjiu thaidao ken-ga lungmaidung siniu tasibo lenra khengjiulo? Makge, Iniu naliu khuga pachang paling dinbo-e: haibo maidungleng katambo madan pikhai lanlak mide!”

13Sichiujiu paniu paliutu saodiak lujiu, aliam lung gase ngut mide, khatdi Ajai hugen khat lamse kenpad mide.

Pharisee Maidung Nai Herod Gu Chakhi

(Mt 16.5-12)

14Khommaidung siniu taruak phung mangaijiu khuang khat ronna phung lujiu, aliam lung gase tad kin-e. 15#Lk 12.1.Jesu niu paliutu rujiu din-e, “Phuilo, naliuniu Pharisee maidung nai Herod gu chakhi situ marisi lulo.”

16Paliu ronna haichiu dinsude, “Paniu haichiu dinbo rambara aliu khuga taruak habo donniu-e.”

17Paliuniu dinbambose silujiu, paniu paliu khuga maniu sude, “Dekamjiu naliuniu taruak habo donniu, manangjiu aribam jiulo? Naliu sitanglu makha jiuma? Haijiukha naliu chun hajiu bam rama? 18#Jer 5.21; Ezk 12.2; Mk 4.12.Naliu mik bamme, chiudi naliu ngaomak jiuma? Naliu kuon bamme, chiudi naliu chiumak jiuma? 19Iniu chamai sang mangiu leng taruak khuang mangiu phetpang khai mibose naliuniu mangaimi jiuma? Tiu malipadbose naliuniu chabeng dejiu khoiphui lulo?”

Paliuniu paokakge, “Kariu-je-niakiu.”

20Jesu niu maniu lan-e, “Maidung sang madai leng Iniu taruak khuang chinnia phetpang khaiboga, tiu malipadbose chabeng dejiu khoiphui lanlulo?”

Paliuniu paokakge, “Chinnia.”

21Siga paniu paliu khuga din-e, “Sichiudi naliuniu wadi sitang makha jiuma?”

Jesu Niu Bethsaida Ga Pamik Tiatbo Piutu Wikhaibo

22Paliuniu Bethsaida ga wangbo tingga, maidungniu pamik tiatbo piu khattu Jesu khuga maluang wangjiu patu ditao khaira kheng-e. 23Jesu niu pamik tiatbo piu situ paben julujiu kareng hanglam tadkiu mide. Sichiujiu paniu sinapiu mik gase patai masiukhai lujiu, patu kaba khaijiu pakhuga maniu-e, “Nang wa ngaoma?”

24Sinapiu siniu ngangphui lujiu din-e, “ Yo, maidungtu ngao-e, chiudi paliuse singbang tadkinbo kumjiu ngao-e.”

25Siga Jesu niu sinapiu mikga paben kabakhai lande. Siga sinapiu siniu wa phui nsijiu phuisuboga, wahina ngao masan mide. 26Jesu niu patu paky lam langkhaijiu chamtan pikhai-e, “Nangniu sibo namgase ngutlan talo.”

Peter Niu Jesu Lamga Din Madupadbo

(Mt 16.13-20; Lk 9.18-21)

27Sigasu Jesu nai pakhommaidungse Caesarea Philippi mungga bambo namdung lamse tad mide. Npuikiga paniu paliu khuga maniu-e, “Maidungniu I hai sao-e chiujiu dinlo?”

28 # Mk 6.14,15; Lk 9.7,8. Paliuniu paokakge, “Khangsianiu nang hai John Baptist si-e chiu, khangsianiu nang hai Elijah si-e chiu, khatdi khangsianiu nang hai phaimiukakung khatle chiujiu din-e.”

29Paniu paliu khuga maniu-e, “Naliura I hai sao-e chiujiu lukhailo?”

Peter niu paokakge, “Nangra Messiah si-e.”

30Siga Jesu niu paliutu chamtan pijiu din-e, “Haise mai khat khugadi din mane.”

Jesu Niu Pah Chariu Khengrabo Nai Shairabo Lamga Dinbo

(Mt 16.21-28; Lk 9.22-27)

31Sigasu Jesu niu pakhommaidungtu katikhai sude: “Chamai Nahpiuse wajiukha chariu magenthiubo khengsune, sichiujiu apaimaidung, singkudung, khatdi Tacheng-tajaigu katipaodung siniu patu lukhai lakge. Patuse kamshat mine, chiudi pase jengsum saiga ringsu lanmi rabo-e.” 32Paniu haise paliu khuga masan siakjiu dinkhaibo-e. Sijengniu Peter niu patu puipat mali lujiu rukhaide. 33Chiudi paniu mariwang pakhommaidung situ phuilujiu khatdi Peter tu kasanjiu din-e, “Akhu gasu tadmilo, Satan. Nangniu maningbo haira Tingwang gu maning makge, chiudi chamainagu maning-e!”

34 # Mt 10.38; Lk 14.27. Sigasu Jesu niu chamai mendi nai pakhommaidungtu pakhuga kuwang lujiu din-e, “Mai khatniu akhuga wang nisai, paniu paronna patu mangai lujiu, khatdi pagu singchai phunglujiu asai suilulo. 35#Mt 10.39; Lk 17.33; Jn 12.25.Palamra mai khatniu pagu ringtingtu ranlura matansai, pase hami rabo-e, chiudi mai khatniu adon jengniu khatdi kawicham jengniu pagu ringting hakhai misai, patuse rankhai bine. 36Mai khatniu kadihpiri pakhiangna daolujiu pagu ringting hamisai, paleng degu kagengbo bamlo? Sichiu makge. 37Mai khatniu pagu ringtingtu nkhiak lurabo wa khatnadi ha-e. 38Sichiusai, mai khatniu ajeng gasu khatdi agu kawicham jengniu haibo charatu simakbo khatdi kasabo ken-ga mangam misai, Chamai Nahpiu siniudi pakendibo Papiu nai masanbo mazadung masuangga wang dasai, pajengniu mangam rabo-e.”

Currently Selected:

MARK 8: LIANBSI

Highlight

Copy