MARK 7

Pao-peh Maidungniu Katikhaibo

(Mt 15.1-9)

1Pharisee maidung khangsia nai Jerusalem lamsu wangbo Tacheng-tajaigu katipaodung khangsia Jesu khuga wang madui bamme. 2Siga pakhommaidung siniu, paliugu tajai saisuijiu paliu ben ntik makjiu wa tiubo paliuniu ngao lude.

3(Palamra, Pharisee maidung nai Jehudi maidung siniu, paliu pao-pehdungniu katikhaibo saisuijiu tadkinbo-e: paliura tajai saisuijiu paliu ben ntik mawi maksai wa tiu makbo-e, 4sichiujiu senky lamsuniu liuwangbose khiurai makthen tiu makbo-e. Sichiujiu paliuniu katam tambo tajaidung chiubora chakuang, chapiang, khatdi kakibo hinadi majai kamna kinbo-e).

5Sijengniu Pharisee maidung nai Tacheng-tajaigu katipaodung siniu Jesu khuga maniu-e, “Dekamjiu nakhommaidung hainiu aliu pao-peh maidungniu dinkhai diakbose majai makjiu, paliu bense tajai saisuijiu ntik masan makjiu wa tiu jiulo?”

6 # Isa 29.13. Jesu niu paliutu paokakge, “Isaiah niu sailad dinkhaibo hai dejiukha majibo gulo! Naliu hai wasao kathiu maidung-e, sichiujiu paniu raokhai-e:

Tingwang niu din-e, haibo maidungniu, paliu munniu atu chakhuang thiu-e,

chiudi paliu lungchun sira, akhugasu diuchang diu-e.

7Paliuniu atu kahum bamdi, paliuleng kagengbo ha-e,

palamra chamainaniu kamlubo chamtanse,

Tingwang gu chamtan kumjiu katikhai-e!’

8Sichiujiu Jesu niu din-e, “Naliuniu Tingwang gu chamtan haitu pajai khatlam khailujiu chamainagu chamtan situ katikhai-e.”

9Sichiujiu Jesu niu dinkiu-e, “Naliuniu Tingwang gu chamtan haitu lukhai mak lujiu, naliuniu katikhaibo chamtan situ pon makura kamme. 10#Tad 20.12; Taj 5.16;Tad 21.17; Lev 20.9.Palamra Mose niu chamtan pikhai-e, ‘Napui napiutu chakhuang thiulo,’ khatdi ‘Mai khatniu papui papiutu siangsai, pase shaimi sulo.’ 11Chiudi naliuniu katikhaibo sira, mai khatniu papui papiutu nkha lubuibo bamdi, haichiu din-e, ‘Haise Corban-e’, chiubora (haise Tingwang gu-e), 12sichiujiu paniu papui papiutu nkha makra kamme. 13Haichiujiu naliuniu maidungtu katikhaibo jengniu maidung siniu Tingwang ladtu lukhai makge. Sichiujiu naliuniu katam-tambo kengjiu kambo bamme.”

Chamaitu Kam Tania Khaibo Mania

(Mt 15.10-20)

14Sichiujiu Jesu niu maidung situ pakhuga kuwang lujiu paliu khuga din-e, “Naliu mathiu kinglo, khatdi silulo. 15Lenlamsu ngutbo mania siniu mai khattudi kam tania makge. Chiudi mai khat khugasu padbo siniu kam taniabo-e.” 16Pakuon kabam mai hina nking lulo.

17Maidungniu patu saokhai lujiu tadmiboga khatdi paniu kalunglam ngutboga haibo rambase pakhommaidung siniu pakhuga maniu-e. 18Jesu niu paliu khuga din-e, “Chiusai, naliudi maidung suang ningting sonbo makge. Haise naliu simak jiuma? Mai khat khuga lenlamsu ngutbo mania khatniudi patu kam tania makge, 19palamra hainiu palungchun ga ngutbo makge, chiudi pawonpuiga ngutbo-e, sichiujiu papum lenlam tadmibo-e.” (Jesu niu haichiu dinbo sira, wa tatek tiubo hina suikamme chiubo madu khaibo-e).

20Sichiujiu paniu dinkiu-e, “Chamaina lungchun gasu padbo siniu patu kam taniabo-e. 21Palung lamsu, kasabo maning padbo siniu patu kamaobo tien thiura, agara, maitu gira, 22npui-npiu thiura, patiuni-sabo khatdi katam-tambo kasabo hina chiubora, aratbo, pa-nkhai rili kasabo, manmabo, mai-ken tiabo, wasao thiubo, khatdi kapangbo lungchun 23haikumbo kasabo hina hai chamaina lungchun gasu padbo siniu patu kam taniabo-e.”

Maipui khatgu Malum

(Mt 15.21-28)

24Sichiujiu Jesu niu saodiak lujiu Tyre namdi luongriang lamse tad mide. Paniu mai khat ky lungga ngut lujiu, pah bamme chiubo mai khat tudi pisikhai ni makge, chiudi nbaijiu bam ngam lulak mide. 25Siga panahpui rasa phungbo maipui khatniu wanglujiu, Jesu phiga makhum kiujiu kheng-e. 26Sibo pui sira nkengmai-e, patuse Syria gu Phoenicia gasu manabo-e. Paniu panahpui khugasu rasa situ hathonpad khaira Jesu khuga khengbo-e. 27Chiudi Jesu niu patu paokakge, “Aliuniu nahmaidunggu tatekse khoilujiu tathitu pibo pajai makge.”

28Paniu paokakge, “Katipao yo, chiudi nahmaidung kuangkai gasu kamtao kiubose tathiniudi khoitiu-e.”

29Sijengniu pakhuga Jesu niu din-e, “Nangniu haichiu dinbo donniu nakylam wang sulo, nanahpui khugasu rasase npad mide.”

30Sichiujiu paniu pakylam malanwang mide, khatdi panah khugasu rasase npad mijiu jibam niude.

Jesu Niu Pakuan Tidbo Khatdi Palad Padmakbo Piutu Wikhaibo

31Jesu niu Tyre luongriang situ phutkhai lujiu, Sidon tadron wangjiu, Galilee Ajai hugenlam, Namdi Kariu gase wangde. 32Siga maidung khangsianiu pakuon tidbo khatdi palad padmakbo piu khattu puiwangjiu, pariga,paben kabakhaijiu wikhaira leng Jesu khuga kheng-e. 33Sichiujiu Jesu niu patuse maidung rong gasu puipad mali lujiu, sinapiu kuonki nia gase pa-njung kariokhai lujiu khatdi patai masiukhai lujiu, paleese dikhaide. 34Sichiujiu Jesu niu tinggen lam ngangphui lujiu, siudi thijiu sinapiu khuga din-e, “Ephphatha” chiubo rambara, “Lepad sulo.”

35Siga sinapiu kuonse chiunuang mide, khatdi paleedi chalad dinpadnuang mide. Sichiujiu pase wadi kakhambo thiu makjiu chalad npao sude. 36Haise mai khat khugadi din makra, Jesu niu paliu khuga chamtan pikhaide, chiudi paliuniu haibo lamga din mathiujiu dintad sude. 37Sichiujiu haise chiulumai hina paliu suang hachang hamide. Sichiujiu paliuniu din-e, “Paniu wahina hai dechiujiu kamlu jiulo! Paniu pakuon tidmai tudi pichiu khai-e, khatdi palad padmak maitudi palad pipad khai-e.

Currently Selected:

MARK 7: LIANBSI

Highlight

Copy