LUKA 3

Baptistu Johana thu sîr

(Mat.3:1-12; Mk.1:1-8; Joh.1:19-28)

1Khante, Tiberia Kaisara inlal kum sômleiringana kumah khan Pontia Pilata chu Judai Ram-optu a nit a, Heroda chu Galili rama lal a nit. A suapuipa Filipa chu Ituria neh Trakonitis rama lal a nit a, Lusania chu Abilene rama lal a nit. 2Anna neh Kaiafa kha thiampu laltak an nit. Kha zoro lâiah khan ramchârah, Zakaria naipa Johana ziangah Pathian thu a zuang tlung a. #Joh.18:13; TS.4:6; Mat.26:3. 3Khanchu, Johana khan Jordan vadung pang ram tinah arfang vêl a, “Nin sualhei rilet unla, baptisma chang rei; khanchu, Pathianin nangni izâng a ti,” itin thu â sîr a.

4Zânthla Isaia lekhabua riziak angkan:

“Ramchâra mi khêk rôl khan,

Pumapa lampui siam unla,

A lônna rang lampuihei intlûn rei.

5Varuam tin nêl insip nîng a ta,

Mualtlâng tin inriniam nîng a ti.

Lampui ikôihei intlûn nîng a ta,

Lampui inthirhei innâm nîng a ti.

6Khanchu, Pathian saninringna khah mi tinin mûng an ti,” a ti a.#Lk.2:30.

7Khante, Johana ziangah baptisma chang rangin mipui an hong a, an ziangah, “Irûl richihei o, Pathian ningthik zuang itlung rang ata zôk rangin tûm nangni ril? #Mat.12:34; 23:33. 8Nin sual nin rilet titak iti nin nunchanah inlang rei. ‘Ei chibul Abrahama a nit im ki ta,’ ti khâi no rei. Nangni ke ril, Pathianin hi lunghei khom hih Abrahama richi a închang thei kêng ai nit.#Joh.8:33,39. 9Atûna rithokin reipui chu thingbul tinah arzung idêna phûr rangin a om thlâm tâk; thing tin irâ ṭhanoa râ chu rikita meia pai nîng a ti,” a ti a. #Mat.7:9; Heb.6:7,8.

10Khante, mipuihei khan an ridon a, “Khangkan a nitin teh, im kin tho rang tâk?” an ti a.

11Ani khan an ziangah, “Zako bop inei khan â nei inohei sem sela, fâk ineihei khomin â nei inohei sem riseh,” a ti a.#Lk.6:29.

12Siadôltuhei khom baptisma chang rangin an hong a, a ziangah, “Minriseitu, im kin tho rang?” an ti a. #Lk.7:29.

13Ani khan, “Dân bituk nêka tam rifuang no rei,” a ti a.

14Sipaihei khom an hong a, a ziangah, “Keini teh, im kin tho rang?” an ti a.

An ziangah, “Tute sum zâlrâtin lah no unla, milakin mi inrinang no rei. Nin lo-ah lung intluk rei,” a ti pêk a.

15Mipuihei tûngna khah arsâng tak tak a, Johana kha, “Mesia ai nit rang kêng,” itin an lungrilin an ngaitua a.#TS.13:25; Joh.1:19-22. 16Khanchu, Johana khan an rêngkan â ril a, “Keiman chu tuiin nangni ki baptis a; nikhomsela, keima nêka roinpui ual la zuang a ta, keimah hi chu a pheikok rui isût rang khomin inrup mang e. Ani khan chu Rithla Rithiang neh meiin nangni baptis a ti. 17A rîzôla bu zâp infâia panga thun rangin a zâpna rang rilei khah a chôi chak tâk a; arsihei kha chu mei thi ngai inoah hâl inrimang a ti,” a ti a.

18Johana khan lam itam takkan mihei ziangah Thurchi Ṭha khah â sîr a, an omdânhei rilet rangin a ngên ngai a. 19Heroda khom kha, a unaipa nupui Herodi a nei sikin neh thil isual dang ai tho murdi chungchângah khan Johanan a ngo a. 20Khanchu, Heroda khan ama thil isual tho tâk murdi ibôksan Johana kha lung inah a khum tâk a.

Jisua baptisma changna

(Mat.3:13-17; Mk.1:9-11)

21Khante, mi murdîn baptisma an chang a; Jisua khomin baptisma a chang a, a ṭongṭai lâiin rivân a zuang ri-ong a. 22Rithla Rithiang kha takpum ineiin vaṭhu angkan a chungah a zuang fûk a, rivân ata ṭong a zuang suak a, “Ki nai lungthlung tak ni nit, ni chungah ki lôm tak tak,” a ti a.

Jisua chibulhei

(Mat.1:1-17)

23Sin a phutah khan Jisua kha kum sômithumka mi a nit a. Mihei ringai dânin chu Josefa naipa a nit.#Joh.8:57. #Riph.5:3-32; 11:10-26; Ruth.4:18-22; 1 Rich.1:1-4; 2:1-15. Ani kha Helia naipa a nit a. 24Ani kha Mathata naipa a nit a, ani kha Levia naipa a nit a, ani kha Melkia naipa a nit a, ani kha Janaia naipa a nit a, ani kha Josefa naipa a nit. 25Ani kha Mattathia naipa a nit a, ani kha Amosa naipa a nit a, ani kha Nahuma naipa a nit a, ani kha Eslia naipa a nit a, ani kha Naggaia naipa a nit. 26Ani kha Maatha naipa a nit a, ani kha Mattathia naipa a nit a, ani kha Semeina naipa a nit a, ani kha Joseka naipa a nit a, ani kha Joda naipa a nit. 27Ani kha Joana naipa a nit a, ani kha Resa naipa a nit a, ani kha Zerubabela naipa a nit a, ani kha Sealtiela naipa a nit a, ani kha Neria naipa a nit. 28Ani kha Melkia naipa a nit a, ani kha Addia naipa a nit a, ani kha Kosama naipa a nit a, ani kha Elmadama naipa a nit a, ani kha Era naipa a nit. 29Ani kha Josua naipa a nit a, ani kha Eliezera naipa a nit a, ani kha Jorima naipa a nit a, ani kha Mathata naipa a nit a, ani kha Levia naipa a nit. 30Ani kha Simeona naipa a nit a, ani kha Juda naipa a nit a, ani kha Josefa naipa a nit a, ani kha Jonama naipa a nit a, ani kha Eliakima naipa a nit. 31Ani kha Melea naipa a nit a, ani kha Menna naipa a nit a, ani kha Matatha naipa a nit a, ani kha Nathana naipa a nit a, ani kha Davida naipa a nit. 32Ani kha Jesaia naipa a nit a, ani kha Obeda naipa a nit a, ani kha Boaza naipa a nit a, ani kha Salmona naipa a nit a, ani kha Nasona naipa a nit. 33Ani kha Aminadaba naipa a nit a, ani kha Admina naipa a nit a, ani kha Arnia naipa a nit a, ani kha Hezrona naipa a nit a, ani kha Pereza naipa a nit a, ani kha Juda naipa a nit. 34Ani kha Jakoba naipa a nit a, ani kha Isaka naipa a nit a, ani kha Abrahama naipa a nit a, ani kha Tera naipa a nit a, ani kha Nahora naipa a nit. 35Ani kha Seruga naipa a nit a, ani kha Reua naipa a nit a, ani kha Pelega naipa a nit a, ani kha Ebera naipa a nit a, ani kha Sela naipa a nit. 36Ani kha Kainana naipa a nit a, ani kha Arpaksada naipa a nit a, ani kha Sema naipa a nit a, ani kha Nova naipa a nit a, ani kha Lameka naipa a nit. 37Ani kha Methusela naipa a nit a, ani kha Enoka naipa a nit a, ani kha Jareda naipa a nit a, ani kha Mahalalela naipa a nit a, ani kha Kenana naipa a nit. 38Ani kha Enosa naipa a nit a, ani kha Setha naipa a nit a, ani kha Adama naipa a nit a, ani kha Pathian naipa a nit.

Currently Selected:

LUKA 3: BIATBSI

Highlight

Copy