Lucas 12

So Jesús detelaqteetega ca shiÿaxaua da 'eetega 'eesa

1Qaq ñaq queta da lapootega't so saq llalcolec shiÿaxauapi. Qaq mashi ivida da huo'o na qaÿi'iguingui. Nachi so Jesús i'auaxaañi da 'enapega so lapaxaguenatacpi, 'eeta':

–Maxatchoxo' qome, qadvichiÿa'a anam ÿashiidaxachigui ana pan mayi huetaigui na fariseopi, qaq damaxa 'eeta': nachida da maichi lataxac namayipi da 'eetega 'eesa. 2Cha'ayi qaica cam lataxac saq cha'a da huo'otaq sa qaila'a, qataq qaica cam qoÿoxottapiguiñi da huo'otaq sa qaÿaÿaten. 3Qaq ÿoqo'oyi 'enauac nam qad'aqtaquipi da huo'otaq qoviitaigui ca napalaxa, namayi 'enauac qai'axaÿa ca na'a'q. Qataq cam qad'aqtaqui da huo'otaq qoviitaigui cam noÿic mayi napochigui, nataq'en qan'axannec da qanasaxauec ca ntaxaÿaqa' mayi pa'ashiguem na noÿicpi.

Cam ishit da qañi'iÿa

(Mateo 10.28-31)

4Qami' ÿaqaÿadolqa, qami' shinapegalo da sa ishit qome da qayi'iÿai cam ishit da ÿalauat ca shiÿaxaua, qaq da ime da ÿalauat, qaq sa ishit da huo'o ca lÿa i'otec. 5Qalaxayi qami' sa'axatema cam ÿoqta ishit da qayi'iÿai, 'eeta': qayi'iÿai qome ñi Dios mayi huo'o naq 'enec da ÿamaxaña ca nhuaxanqa' na 'itaxaloxoicpi ca shiÿaxaua qom imat da nqat da nachaalataxac. Qaq 'iñi qome mayi qañi'iÿai.

6¿Sa ishito' naxa da qaime'n ca cinco qoÿopiolec da lashiue qanqoÿin caua dosole lca'chole? Qalaxayi ñi Dios sa ishit da icoua'ai ca 'oonolec namayipi. 7Cha'ayi na laue ñi 'oonolec da qoñiita ivida'a 'enauac da qanaloqteeta. Qaq ÿoqo'oyi sa ishit qome da qayi'iitac, cha'ayi qami' ÿacteec da qadashiichiÿaxaqui. Sa ishit da qoñiÿa'am da lashiichiÿaxac na qoÿopiolec.

Nam da'aqtaxanem na shiÿaxauapi da quetague' so Jesucristo

(Mateo 10.32-33; 12.32; 10.19-20)

8Qaq aÿim shinapec da 'enauac nam da'aqtaxanem na shiÿaxauapi da aÿim quetague', qaq nataq'en nam shiÿaxaua llalec ishit da i'axat da lalamaxat namayipi qom huetaigui na piguem l'ec lamaxashicpi ñi Dios. 9Qaq ca sa ishit da da'aqtaxanoigui na shiÿaxauapi da aÿim quetague', qaq camayi nataq'en sa ishit da sa'axat da ÿalamaxat qom sootaigui na lamaxashic piguem l'ecpi ñi Dios.

10Qaq da huo'o ca camachicague't shiÿaxaua da huo'otaq ÿasaxalec ca qauem ltaxaÿaxac na shiÿaxaua llalec, qaq camayi ishit da huo'o ca nchoxonnataguec. Qalaxayi ca sa iyacnapec ca l'aqtac da detaxaÿa so Espíritu Santo, qaq camayi sa ishit da huo'o ca nchoxonnataguec.

11Qaq qom ivita da qami' qaÿauegueu'alo anam laponaxaquipi na judiopi huo'otaq nam nta'alpi qataq nam nataxala'pi, qalaq sa ishit qome da tatapigui qadvilli cam qadasataxaqui qataq cam qoñiÿapec. 12Cha'ayi qom ivita ca laloqo' da qautaqai, nachi som Espíritu Santo qami' ÿapaxaguenque cam lataxac cam qad'aqtaqui.

Da lchic ca shiÿaxaua da pe'etega da nsallaxa

13Nachi huo'o so shiÿaxaua mayi huetangui so shiÿaxauapi 'enapega so Jesús, 'eeta':

–'Am mayi 'auapaxaguenataxaatac, qonapegáctaxa ñi ÿaqaÿa da icolaxachigui da nsallaxa qomi' n'onaxata'agueta co'ollaxa so qadta'a.

14Qalaxayi so Jesús 'enapega, 'eeta':

–'Am shinapega, ¿négue't ca aÿim ÿanagui da i'onataxanaxac da ñimit ca nasouaxashit, huo'otaq da seÿodacachi da nsallaxa?

15Nataq'en 'enapeco':

–Maxatchaxa, qadvichiÿa'a qome 'enauac na nqopitaxanaqtaiguesat, cha'ayi da nachaalataxac ca shiÿaxaua sa ishit da ÿachigoxotagui nam saqalota lsallaxa mayi hueto'ot.

16Huaña, nachi huo'o da daloqnaxana, 'eeta':

–Huo'o so shiÿaxaua ÿataqta sallaxanec, so do'onataxaatapeguelec 'alhua ÿataqta saqalota naq'en ana ala so languishic co'ollaq nqat. 17Nachi so sallaxanec deuennataxaatac, 'eeta': “¿Chaq huá'ago' nagui ca shiitec?, yi aÿim qaica cam sacha'ague da saÿamaxat nam ñaqat ala na ÿanguishic.” 18Qaq deuennataxaatac, nachi 'eeta': “Shiita' nagui da 'eetec dam so'ot. Nagui aÿim ñilaxajñi ñim laponaxaqui na ala na ÿanguishic, da yaqto' so'ot ca lÿa ÿacteec da lta'adaic ñaqshin. Qaq qom ime, qaq soxotoigui 'enauac nam ala na ÿanguishic mayi ñaqat, nataq'en 'enauac nam aÿim hueto'ot. 19Ime, qaq shinapega qome som iqui'i, shiita': 'Am iqui'i, nagui mashi ÿataqta qalota nam 'adalamaxatpi mayi 'auaÿamaxat, namayi nalaiguilo caua saqaÿoqteguelo vi'iyi. Nagui 'anmateec, 'auque'e, 'anÿomtac, qataq 'auamachiguiñi.” 20Qalaxayi ñi Dios 'enapega, 'eeta': “'Am shiÿaxaua ÿataqta qaica peta'a ca 'auaÿajnapec, nachina ne'ena pe 'am 'adeleu, qaq 'enauac nam 'auaÿamaxattac, ¿négue't qome cam talec?” 21Qaq 'eda qome da 'eetec cam shiÿaxaua da maichi loguishiguem naq'en da maichi lsallaxa, qalaxayi ñi Dios ÿaÿaten camayi da ÿataqta choxodaq.

Ñi Dios ntela'a nam llalaqpi

(Mateo 6.25-34)

22Qaq co'ollaq ime, nachi so Jesús 'enapega som lapaxaguenatacpi, 'eeta':

–Nagui qami' shinapegalo: Sa ishit qome da qami' ÿaquicoqchi't cam qonoqoi qataq cam qanapoiña. 23Cha'ayi da achaalataxac saq 'en'am cam chochi qanallic, qataq dam n'oquiaxac, damayi saq 'en'am cam chochi qanapogoña. 24Qami' qaumijñi nam teguesanpi, namayipi sa ishit da danaxan, qataq sa ishit da daqataxan, qataq sa ishit da huo'o ca laponaxanaxaqui, qataq qaica ca ladetacnaxanaxaqui. Qalaqca da ñi Dios iqui'axaatac namayipi. ¡Qami', qalaxayi ÿacteec da qadashiichiÿaxaqui, sa ishit da qoñiÿa'am nam maÿopi! 25Qaq, ¿négue't ca 'oonolec da qoñiita da ÿapacteec da lachitataic, nachi ishit da ÿañoxot da nquigaxatshiguem yi lalogaxa? 26Cha'ayi da huo'otaq sa 'aushit cam ÿapacteec saq 'amaqtaq, qaq ¿táloxochiyo' da 'am ÿaquicoqchit 'enauac nam laÿipi?

27Qami' ña qaumijñi da 'eetec da lañaxataxac ana huoue mayi huo'o ana lauoxo. Anamayi sa ishit da do'onataxan, qataq sa ishit da daqalejnaxan. Qalaq aÿim shinapec da so Salomón ÿataqta qaica ca 'en'am da n'otaxac, qalaq sa ishit da ivi' da loyac da n'otaxac aca 'oonole anamayi. 28Qaq da nachi 'eetec de'eda ñi Dios da n'otaxanaxan ana chochi huoue mayi huetauga nagui na n'onaxa, qaq qome nte' nachi qaÿavigaxat, qaÿasaxaigui aca nqatelaxanaxaqui, qaq ¡huá'aguectoxo' da nachi saq 'eetec da qoñiita mayi saq 'amaqtaq da qadpi'iÿaxaqui! 29Qaq ÿoqo'oyi sa ishit qome da qami' ÿaquicoqchi't da huo'otaq qanmichiitaique cam qonoqoi qataq cam qanÿomiigui. 30Cha'ayi nam shiÿaxauapi mayi huetalec ana 'alhua, nachina 'enauac nam nmittaique. Qalaxayi qami' huo'o ñi qadta'ai, qaq ñimayi ÿaÿaten da qaviñiitac 'enauac namayipi. 31Qalaxayi qami' qauamachiu'a qome da l'onataxanaxac ñi Dios da ilo'ogue 'enauacna, yaqto' ishit da qami' taÿoto 'enauac namayipi.

Da nsallaxa mayi hueta'ague da piguem

(Mateo 6.19-21)

32Sa ishit qome da qayi'ii, qami' mayi qoñiita'am acam ÿalamaqte qagueta mayi selotague'. Ÿataqta qami' saq 'amaqtachi, qalaxayi ñi qadta'ai ÿataqta qami' ÿaÿamaxadeete' da qanhuañiÿau'a naq'en da l'onataxanaxac da ilo'ogue 'enauacna. 33Qaq qaumiñi qome na qami' hueto'oto. Ime, qaq qai'añiim nam deuenaxaatapigui'. Ime, qaq qau'ochi cam qadchoxonaxaquii mayi sa ishit da lto qataq ca nsallaxa hueta'ague da piguem mayi sa ishit da imeuo, qataq sa ishit da inoxoneu'a cam cachaxaic, qataq sa ishit da chic ca lalaxat. 34Cha'ayi cam hueta'ague da qadsallaqai, qaq nachica cam hueta'ague da qadquiyaqteÿaxaqui.

Ÿataqta naÿamaxattai' ca shiÿaxaua

35Ÿataqta qanaÿamaxachiitai' qome, aca qadcoÿadaxanaxaquii qalaq sogote da 'ettaigui qanqashiñi. 36Qoñiita'am qome ca nlatac da iuattaique ca n'aco' da ivita da ñi'iguelaq da chigaqa'a ca nadonaxac, da yaqto' lhuotta da ÿauateguet da ivita da nvi' camayi qom huo'otaq chochi deÿaxan. 37Ÿataqta huo'o qome da lamaxayic ca nlatacpi qom huo'otaq ca n'aco' ilalec camayipi da nlotauec qom ivita da nvi'. Qaq aÿim shinapec da que'eca 'aco' ishit da maichi huapegue' qome da nso'onaxanaxaañi camayipi da ÿataxaalec ca nqui'axala', ime, qaq nÿoxoshiguem ca nallic. 38Qaq nai'ctaxa da laiñi na pe da nvi' camayi, huo'otaq da mashi yaqta'a da yi'oxoñi, qalaxayi nachi 'en'am nlotauec camayipi da qaivideu'a. Qaq ÿataqta machiguiñi qome que'eca nlatacpi. 39Qataq qauaÿajñiita de'eda shinapec da huo'otaq ca lalamaxat ca noÿic da huo'otaq ÿaÿaten ca laloxoqui da nvi' ca cachaxaic, nachi camayi sa ishit da do'ochi, qataq sa ishit da ÿashin da qainoxotau'a da yaqto' qaicachiÿot. 40Qaq qami' nataq'en ÿataqta qanaÿamaxachiitai' qome, cha'ayi qom huo'otaq sa ishit da huo'o ca taÿapigui qadvilli, nachi nvi' ne'ena shiÿaxaua llalec.

Ca nlatac mayi ipactelec ca l'onataxanaxac qataq cam sa ipaguelec

(Mateo 24.45-51)

41Nachi so Pedro denataxan, 'eeta':

–'Am qadataxala', de'eda 'aualoqnaxana ¿peta'a ndotreec qomi' da qomi' tachiguilo, loqo' chaq nataq'en 'enauac na laÿipi?

42Nachi so qadataxala' 'enapeco':

–¿Chaq négue'to' ca 'eeta'am cam nlatac mayi ca n'aco' ipataxalec da ilo'ogue naq'en ca lma' qataq da dequi'axanataxan da ivita ca laloqo' da nqui'axac, qaq camayi ÿataqta ipacchigui cam qaÿamaxalec qataq ÿataqta sa nqalaat? 43Qaq ÿataqta machiguiñi que'eca nlatac qom huo'otaq nvi' ca n'aco', qaq ilalec camayi da i'ottac dam l'onataxanaxac. 44Qaq aÿim shinapec da ÿoqta 'eesa da que'eca 'aco' ishit da ÿanagui camayi da ilo'ogue naq'en 'enauac nam hueto'otpi. 45Qalaxayi que'eca nlatac da huo'otaq 'enapec: “Ca ñi'aco' ÿataqta saqaÿaloqteguet,” nachi jec da iuaxaatac so laÿipi nlatacpi qataq aso nlatapi, ime, qaq cot da lqui'axac qataq da nÿomaxac qataq na ltaxa, 46qaq se'eso n'aco' da lvidaxac huetoigui ca na'a'q qataq cam laloqo' da huo'otaq se'eso nlatac sa ishit da ÿaÿaten qataq saq huotaique, ime, qaq qaÿauo'o ca nhuaxanaguec mayi qaica ca 'en'am da lchic, 'eeta'am qanqoÿin da nhuaxanaguec cam sa da'amqajnataxan.

47Qaq cam nlatac mayi ÿaÿateeta cam 'eetapeguec cam n'aco', qalaxayi sa ishit da naÿamaxattai', qataq sa ÿalaq, qaq camayi ÿataqta lta'adaic da nhuaxanaguec. 48Qaq cam nlatac mayi ÿoqta 'itchiguiñi da sa ÿaÿaten cam i'ottac mayi ishit da chigaqaigui da huo'o qanqoÿin ca nhuaxanaguec, qaq camayi saq 'amaqtaq qome ca nhuaxanaguec. Qaq ca qalota cam qoÿanem, qaq nataq'en qalota cam qaiÿaxaneu'a, qataq cam qalota cam qaipataxalec, qaq nataq'en ÿacteec da qalota cam qaiÿaxanaique.

So Jesús nachiso so chigoqchigui da huesogui naq'en na shiÿaxauapi

(Mateo 10.34-36)

49Aÿim ñanac da se'edaxatoigui ca nodec ana 'alhua, qaq ¡aÿim ÿataqta huo'o da iyaxa da nal'en nachi 'edoigui camayi nagui! 50Qalaxayi aÿim saigui qome da ñique'ejnaxac, 'eeta'am ca qanachilaxan, qaq ÿoqo'oyi ¡ÿataqta huo'o da ÿaquicoxo da iyaxa da nal'en nachi ime! 51Qaq qami' ¿qaupi'itaxañiitega peta'a da aÿim ñida'a ca l-lagaxayic na shiÿaxauapi? 'A'i, sa ishit. Chaqdata da huesogui ñaq'en namayipi. 52Qaq nachi chigoqchiguiña nagui da ca cinco nhuodeuapi camayipi huesodachi, caua tres npa'agueneto caua dosolqa, qaq caua dosolqa qalaq npa'agueneto caua tres. 53Ca nta'a qalaq maichi npa'aguene' ca llalec, qaq cam ñalec qaq maichi npa'aguene' ca lta'a, qaq aca nate'e npa'aguene' aca maichi llale, qaq aca ñale qalaq maichi npa'aguene' aca late'e, qataq aca nachodo maichi npa'aguene' aca late, qataq aca nate maichi npa'aguene' aca lachodo.

Nam l'anaxatpi na piguem

(Mateo 16.1-4; Marcos 8.11-13)

54So Jesús nataq'en 'enapego' so shiÿaxauapi, 'eeta':

–Qami' naxa da qauloiÿa'a na l'oc da chigaqa'ague da avit da nashiiyishiguem, nachi qoñiÿapec da huo'o ca auot. Qaq damayi ipacchigui. 55Qataq na l'at da nashiiyishiguem da chigaqa'ague da taguiñi, nachi qoñiÿapecnaxa da qad'aqtaqui: “Yi'oqta da huotaique da napaxaÿañi,” qaq damayi ipacchigui. 56Qaq ¡qami' mayi qoñiÿapec da qami' 'eesoda! Qami' qauaÿajñi da qau'axachi na l'anaxatpi na piguem qataq ana 'alhua, qalaq ¿tá'ainco' yi sa ishit da qau'axachi da lataxac naua souaqtaiguilo na'axa'te nagui?

'Anpogoxoinapegue' da 'anmane' ca 'anpa'aguenaxaua

(Mateo 5.25-26)

57Qaq qami' ¿tá'ainco' yi saq maichi qanmichiila't, da yaqto' qau'ochi ca ÿaÿamaqchiguiñi? 58Cha'ayi sa iuena'a da huo'otaq huo'o ca 'am ÿasaxalec ca 'adasouaxashit, ime, qaq 'am ÿauegueu'a ca nta'a. Qaq qom ña qoquetague' ca nqa'aic, qaq no'on da 'anpogoxoinapegue' da 'anaÿamaxate' camayi, yaqto' sa ishit da 'am ÿauecau'a cam nmit na nasouaxashitpi. Cha'ayi que'eca nmit na nasouaxashit ishit da 'am ÿaneu'a ca huataxanaq, qaq que'eca huataxanaq ishit da 'am ÿamaxaigui aca ncoñitaxanaxaqui. 59Qaq aÿim shinapec da 'am sa ishit da 'annoxoneeguesop aca ncoñitaxanaxaqui qom huo'otaq saxanaxa da 'ashiiten aca pa'ateec 'adavigaxaiste.

Currently Selected:

Lucas 12: TBSNT

Highlight

Copy