Lucas 13

Ca shiÿaxaua iuen da ÿaxaneec ca n'onataxac

1Qaq nachisoua se'esoua na'axa'te nachi huo'oi soua nvi't, nachi da'aqtaxaatrapeguem so Jesús da so nta'a Pilato huo'o so ÿalauat shiÿaxauapi mayi lma' yi Galilea. Ime, qaq ÿalecneguet na ltago'qpi somayipi nam ltago'qpi som lalaatac shiguiÿacpi mayi ÿauotaique da ÿavigaxat da lachitaqtaxanaqte da ÿanot ñi Dios. 2Nachi so Jesús 'enapeco':

–¿Qami' peta'a qaupi'itaxañiitega da se'eso shiÿaxauapi qai'otec de'eda souaxat da ÿapacteec da 'itaxaloxoicpi, qaq saq 'en'am na laÿipi mayi lma' yi Galilea? 3'A'i, sa ishit. Qami' nataq'en qom sa ishit da qai'axañiideec naua qan'onataxacolli', qaq nataq'en 'enauac da qoñiita qadellivi. 4Qalqo' se'eso dieciocho mayi ipataxañi co'ollaq hualolaguiñi aso naue mayi naña yi Siloé, ¿peta'a da qaupi'itaxañiitega da huo'otaq somayipi ÿapacteec da lta'adaic da lasouaxashit, qaq saq 'en'am nam laÿipi mayi netaña yi Jerusalén? 5'A'i, sa ishit. Qami' nataq'en da sa ishit da qai'axañiideec naua qan'onataxacolli', qaq nataq'en 'enauac da qoñiita qadellivi.

Qaÿaloqnaxana aso higo lchiyic mayi qaca aca ala

6Nachi so Jesús ÿauo'o so daloqnaxana, 'eeta':

–Huo'o so shiÿaxaua huo'o aso languishi higo, qaq asomayi ñaxattalec so n'alhua. Qaq jec da demejnaxana, qalaxayi sa ishit da huo'o aca ÿanata ala. 7Ime, nachi 'enapega som shiÿaxaua mayi ilotague' som 'alhua, 'eeta': “Mashi ivi' naua tres vi'iyi da aÿim ñi'iguelaqta'a ada'ada qo'ipaq da ñi'iguena'a aca ala, qalaq ÿataqta ÿauano' da huo'o aca sanata. Qaq no'on da 'auquesoq adamayi. ¿Shapco' da chochi netalec yi'iyi 'alhua?” 8Qalaxayi som ilotague' se'eso 'alhua 'enapeco': “'Am ñi'aco', no'on da nachaqnata ne'ena vi'i da 'au'aqta'a adamayi, aÿim ñishidot qome adamayi, qataq semetot ca lata'q. 9Qaq souaxai' ishit da huo'o aca ala adamayi. Qaq qom huo'otaq sa ishit da huo'o, qaq ishit qome da qaiquesoq.”

So Jesús nataden aso 'alo qollimai so na'a'q mataxaqui

10Huo'o so na'a'q mataxaqui, nachi so Jesús dapaxaguenataxaatac, huetaigui asom laponaxaqui na judiopi. 11Qaq ÿalectauo aso 'alo mayi mashi ivi' naua dieciocho vi'iyi da sa no'on. Huo'o som n'ec leguemaxaic mayi qollimai naq'en, nachi asomayi sa ishit da ÿalamaxashiguem. 12Nachi so Jesús co'ollaq ila'a, nachi iÿaxana. Qaq 'enapega, 'eeta':

–'Am 'alo, nagui mashi huesouec da 'adalolaxa.

13Nachi ÿashil-lec naq'en na lhuaq asomayi, huaña, nachi asomayi ishit da nlaxaashiguem, nachi ÿi'oxodeetac ñi Dios. 14Qalaxayi som ilotague' asom naponaxaqui ÿataqta dalemata souaxat so Jesús da datannataxangui so na'a'q mataxaqui. Nachi 'enapega so shiÿaxauapi, 'eeta':

–Huo'oi mque' naua seis na'axa'te mayi ishit da qai'onataxanguilo. Qaq nachinauáctaxa huetoiguilo da qauanaqui, da yaqto' qami' qanatade'n, qaq sa ishit da nachiyi yi na'a'q mataxaqui.

15Nachi so qadataxala' ÿasat, 'eeta':

–Qami' mayi qoñiÿapec qami' 'eesoda, ¿peta'a sa ishito' da huo'o ca 'oonolec da qoñiita da isouec ca lauegaxanaxala' huaca, huo'otaq ca lalo 'ashina, ca na'a'q mataxaqui da yaqto' ÿauegaxasom da nÿomaxan? 16Qaq ada'ada 'alo yi maichi llale so Abraham, qaq so Satanás yi icoñitta'aguet adamayi de'eda nalolaxa nagui mashi ivi' naua dieciocho vi'iyi, qaq ¿peta'a sa ishito' da qaisoueguesop de'eda lalolaxa adamayi ne'ena na'a'q mataxaqui?

17Qaq co'ollaq 'enapec de'eda so Jesús, nachi 'enauac nam depa'aguenataxaatac ÿataqta huo'o da l'aloxo. Qaq nam shiÿaxauapi qalaxayi 'enauac huo'o da ntonaxac, souaxat nam ÿauaachigui i'otpi so Jesús mayi qaica ca 'en'am da lli'oxoyic.

Qaÿaloqnaxana aso ala ana mostaza

(Mateo 13.31-32; Marcos 4.30-32)

18Qaltaq 'enapeco':

–¿Negue'tom ca 'en'am ñaqshin da l'onataxanaxac ñi Dios da ilo'ogue 'enauacna? ¿Chaq negue'tom ca saloqnaxana? 19Damayi 'eeta'am peta'a aca ala ana l'enaxat mostaza da ca shiÿaxaua ÿacona, ime, qaq ÿaalec ca n'alhua, ime, qaq ñaxat, ivitta'a da 'eeta'am aca qo'ipaq ÿataqta late'edai. Ime, qaq anac nam maÿopi, nachi i'ot na lpata'cpi naiguilo naua lcoue.

Qaÿaloqnaxana acam ÿashiidaxachigui ana pan

(Mateo 13.33)

20So Jesús nataq'en 'enapeco':

–¿Chaq negue'tom ca saloqnaxanem da l'onataxanaxac ñi Dios da ilo'ogue 'enauacna? 21Damayi 'eeta'am peta'a aca ÿashiidaxachigui aca pan mayi ÿacona aca 'alo. Ime, qaq ÿasaxaigui ca lta'adaic lvigoxoshic, nachi acamayi ima da ÿashiidaxachigui 'enauac cam nvigoxoshic.

Cam lasom mayi saq 'amaqtaq

(Mateo 7.13-14, 21-23)

22Nachi so Jesús co'ollaq tata'ague da Jerusalén, nachi taÿalec nam pueblopi qataq nam nañalo nam saq 'amaqtaq shiÿaxauapiolec, nachi dapaxaguenataxaatac. 23Nachi huo'o so denataxan, 'eeta':

–'Am qadataxala', ¿saq 'amaqtaq peta'a qome na qanca'alaxateec?

Nachi somayi 'enapeco':

24–Qan'añaxachi qome da qaunoxoñiu'a ñim lasom mayi saq 'amaqtaq, cha'ayi aÿim shinapec da ÿataqta qalota qome na nshitaique da inoxoneuo, qalaxayi sa ishit da ÿañoxot. 25Cha'ayi que'eca lma' ca noÿic, da ime da ñishiguem, nachi ÿapogui ca lasom ca lma', nachi qami' mayi qaupa'aitauec nachi qauÿaxañiitapegueu'a que'eca lasom. Qaq qoñiita': “'Am qadataxala', qomi' 'anauategueta.” Qalaxayi camayi ÿasat, 'eeta': “Aque', sa saÿaten ca qauachigoqoita'ague qami'.” 26Huaña, nachi qami' qome qoñiita': “Qomi' 'am qadqui'axaua qataq 'am qanÿomaxaua caillayi, qataq 'auapaxaguenataxaatac can huaña yi sonaqtaña qadma'.” 27Qalaxayi camayi qami' 'enapegalo, 'eeta': “Aÿim mashi qami' shinapegalo da aÿim sa saÿaten ca qauachigoqoita'ague. Aÿim qoquiÿa'ai 'enauac da qoñiita, 'enauac qami' mayi qau'ochiitac da sa ÿaÿamaxañi.” 28Huaña, nachi qami' qanoÿiñiitac qome qataq qauanaquiÿa't naua qadvilli' souaxat da qadalemataiqui qom qauloiÿa'a ca Abraham, Isaac, Jacob qataq 'enauac som l'aqtaxanaxanecpi ñi Dios, qom qanayiuta'a ca l'onataxanqa' ñimayi. Huaña, nachi qami' qaÿamaqdauec. 29Cha'ayi anac qome na shiÿaxauapi mayi chigaqa'ague da shi'u qataq da taguiñi qataq na chigaqa'ague da yi'oxoñi qataq da avit, da yaqto' nso'ooñi da lqui'aqa' cam l'onataxanqa' ñi Dios. 30Huaña qome, qa nachi huo'o nam nagui nca'ataxaatauo, qaq nachina qome na l'auaxanec, qataq huo'o qome nam nagui l'auaxanec, qaq nachina nam qaipa'axaateec.

So Jesús nÿiilec so Jerusalén

(Mateo 23.37-39)

31Qaq nachiso se'eso na'a'q nachi nvildeuo soua chigoqdaigui na fariseopi. Nachi qai'aqtaxanem somayi, qoÿiita':

–Qoca'ai qome ne'ena, ten ñi Herodes ÿauotaique damaxasoxoolec da 'am qaÿalauat.

32Qalaxayi somayi 'enapeco':

–Qauesomiÿa, qau'aqtaxañiim qome que'eca nanoicnaxaic, qoñiita': “Nagui na na'a'q qataq qoyi'oxoñi so'odauec na n'ecpi leguemaxaicpi, qataq ñataden na sa no'onpi, qaq que'eca lÿa na'a'q nachi yome.” 33Qalaxayi no'on da ñaq cada'acolec da ashic na na'a'q qataq'en qome nte' qataq ca lÿa na'a'q, cha'ayi sa ÿaÿamaxañi da saq huaña yi Jerusalén da ileu cam 'oonolec nam l'aqtaxanaxanecpi ñi Dios.

34¡Aicoue qami' mayi qoñiitaña yi Jerusalén mayi qaualauachi som l'aqtaxanaxanecpi ñi Dios, qataq qauasaqaitalec na coma' som lamaxashicpi mayi qami' namaxalo! ¡Ÿataqta da iyaxacnaxa da llaÿona't na 'ai'alaqpi, da shiita'am aca 'olgaxa da nqapaxaalec ca llalaqpiolec, qalaq qami' sa ishit da qanashiñi! 35Qomoxochictaxa naua qadma'chilli' qome qalaq ÿataqta tojleguete, qaq nachi tachiguiña nagui da sa ishit da aÿim qanauañi', to' qom qoñiita': “Ÿataqta no'on qome da lliquiaxac cam nactaigui da l'enaxat ñi qadataxala'.”

Currently Selected:

Lucas 13: TBSNT

Highlight

Copy