Lucas 14

So Jesús nataden so laataxaic na l'oc

1Qaq huo'o so na'a'q mataxaqui, nachi so Jesús nqo'oneu'a da lqui'aqa' so lma' som 'oonolec nam lataxala'pi na fariseopi. Nachi nam laÿipi fariseopi chochi nauaatac somayi. 2Qaq huetai'yi nataq'en so shiÿaxaua mayi nalauat na l'oc, datato'ot somayi. 3Nachi so Jesús inattac nam dapaxaguenataxaatapeguec na nqataxacpi qataq som fariseopi, 'eeta':

–¿Ishit peta'a da qaÿashiita da qanataden ca dalolaxaic yi na'a'q mataxaqui, loqo' sa ishit?

4Qalaxayi somayipi ÿataqta ñi'imaxattom. Nachi so Jesús ipoteu'a so sa no'on, nachi no'oita naq'en, nachi 'enapega da jec. 5Nachi 'enapega so fariseopi, 'eeta':

–Da huo'o ca 'oonolec da qoñiita da huo'otaq tangui aca pozo ca lalo 'ashina huo'otaq ca lauegaxanaxala' huaca, qaq ¿sa ishit peta'a da nqatshiguem, nai'ctaxa da huo'otaq huetoigui ca mataxaqui?

6Qalaxayi sa ishit da huo'o ca ÿasat somayipi.

Som qaicoyiguenpi da yaqto' ÿalectauo ca nadonaxac

7Qaq so Jesús co'ollaq ÿauaachigui som ncoyiguenatacpi da lca'atau'a anam ÿi'oxodaq so'onaxaquipi som nqui'axala'. Nachi ÿan da lqataxac, 'eeta':

8–Da huo'otaq huo'o ca 'am icoyiguen da yaqto' 'aualectaigui ca nadonaxac, qalaq sa ishit qome da 'anso'oongui aca so'onaxaqui mayi ÿi'oxodaq, cha'ayi sa iuena'a da nvideuo ca lÿa ncoyiguenatac mayi 'am napacalec ÿacteec da ÿi'oxodaq. 9Nachi cam qami' icoyigue'n ishit da anac, nachi 'am 'enapega, 'eeta': “Ña 'ai'anem ana 'anso'onaxaqui de'eda 'adÿa.” Huaña, nachi 'am huo'o da 'ad'aloxo da 'anso'oongui aca pa'ateec so'onaxaqui. 10Qaq ÿoqo'oyi da 'am qaicoyiguen, qalaq 'am 'anso'oongui aca pa'ateec so'onaxaqui, yaqto' da nvi' ca 'am icoyiguen, qaq 'am 'enapega, 'eeta': “'Am ÿaqaÿa, 'ayala, 'anso'oongui ana'ana so'onaxaqui mayi ÿi'oxodaq.” Huaña, nachi huo'o da 'añi'oxonnataguec, 'am ÿi'oxoden nam 'anso'onaxauapi. 11Cha'ayi ca nshitaique da n'amaqten, qaq nachica ca saq 'amaqtaq qanqoÿin, qaq cam sa n'amaqten, qaq nachica ca 'amaqtaq qanqoÿin.

12Nataq'en 'enapega som shiÿaxaua mayi dequi'axanataxan, 'eeta':

–Da ivita da huo'o ca 'ai'an nallic huo'otaq camachaqca npetaxanaxatolec, qalaq sa ishit qome da 'auqui'axan ca 'anauochaxaua qataq ca 'adqaÿa huo'otaq ca camachaqca 'adhuo' l'ec huo'otaq na 'adhuodeuapi sallaxanecpi, cha'ayi namayipi ishit da qaltaq 'am qaÿi'iguelaxateguet da 'am qaiqui'axan, huaña, qaq huo'o da 'anshiitenaguec. 13Qaq ÿoqo'oyi da ivita da 'au'ot ca 'adqui'axac, qalaq 'auachit nam choxodaqpi qataq na ÿamaxaic qataq nam ñi'idauo naua lchil qataq nam qanamaicpi, 14yaqto' ÿataqta 'auamachiguiñi. Cha'ayi namayipi sa ishit da 'am ishiitena'aguet. Qalaxayi 'am qome huo'o da 'anshiitenaguec qom ivita da qaltaq qanca'alaxateec nam no'on shiÿaxauapi.

Qaÿaloqnaxana ca lta'adaic nqui'axac

15Qaq co'ollaq hua'aqchigui de'eda som 'oonolec mayi nso'ootañi, datatalec so nqui'axala', nachi 'enapega so Jesús, 'eeta':

–Ÿataqta machiguiñi qome ca dequi'iÿapegueuo ca nallic qom qanayiuta'a ca l'onataxanqa' ñi Dios.

16Nachi so Jesús 'enapeco':

–Huo'o so shiÿaxaua i'ot so lta'adaic lqui'axac, nachi damaxasoxoneuga so qalota shiÿaxauapi da lqui'axaua. 17Qaq co'ollaq mashi iviteuga so laloqo' da deque'e, nachi ÿamaq so l-latac da ÿi'iguenauga so lqui'axauapi da 'enapega, 'eeta': “Qauanaqui qome, cha'ayi mashi ime da nallic.” 18Qalaxayi 'enauac somayipi huo'oi naua qoÿigalo. Nachi som l'auaxanec 'eeta': “Aÿim chita'ague da seshijnaxana yi ñi'alhua, qaq aÿim ashic da semejnaxaneuga. Qaq nagui 'am ñachoxonnot da chochi aÿim 'auchoxoden qome.” 19Qaq so lÿa qalaq 'eeta': “Aÿim qalaxayi chita'ague da seshijnaxanalo yiua cinco nataxa'u ÿauegaxanaxale'te huaca, qaq nagui aÿim sauotaique da shi'igue'n. Qaq aÿim 'adqouaguec, chochi aÿim 'auchoxoden.” 20Qaq so lÿa qalaq 'eeta': “Aÿim chita'ague da sadon, qaq ÿoqo'oyi aÿim sa ishit da ashic.” 21Qaq so nlatac co'ollaq mashi ñi'iguelaq, nachi da'aqtaxaatapeguem 'enauac de'eda so n'aco'. Nachi 'enapega so l-latac, 'eeta': “Qojec qome, sa 'anaÿaloxon da qoqueguelo naua lta'al nqa'aico qataq naua nqa'aicolqa nam la ciudad. Ime, qaq 'anauegueuo qome na choxodaqpi qataq nam ÿamaxaicpi qataq nam ñi'idauo naua lchil qataq nam qanamaicpi.” 22Qaq co'ollaq mashi ñi'iguelaq so nlatac, nachi da'aqtaxan, 'eeta': “'Am ñi'aco', mashi sogote da so'ot 'enauac da aÿim 'auamaxalec, qalaxayi ñaqaiyita ñaq huo'o yi ndaqa'.” 23Nachi so 'aco' 'enapega so l-latac, 'eeta': “Qojec, 'anqo'oneugalo qome naua nqa'aico lta'al qataq naua nqa'aicolqa. Ime, qaq 'anauecauo na laÿipi da yaqto' nnoxoneuo, yaqto' ishit da nlaqchigui na ima'. 24Cha'ayi aÿim shinapec da sa ishit qome da huo'o ca chic da anoq 'enauac nam hua'auchiguiñi secoyiguenpi mayi sauotaique da ñiuaxanaxaua.”

Da lqalaic cam nshitaique da quegue so Cristo

25Qaq ÿataqta qalota so shiÿaxauapi mayi quetague' so Jesús, nachi somayi nqoileeguet somayipi. Nachi 'enapega, 'eeta':

26–Sa ishit da ÿapaxaguenatac ca aÿim nau'a, da huo'otaq ÿapagaqnauec da ÿauotec ca lta'a, huo'otaq aca late'e, lhua, qataq ca llalaqpi, lqaÿañicpi ÿallippi qataq 'alpi, qataq ivida'a da maichi nachaalataxac. 27Qataq ca aÿim quegue, da huo'otaq sa ishit da lhuennataxa da aÿim ileetalec, qaq camayi sa ishit da ÿapaxaguenatac. 28Qaq da huo'otaq huo'o ca 'oonolec da qoñiita da nshitaique da n'oxooshiguem aca naue, qaq ¿sa ishit peta'a da i'auaxaañi da nso'ooñi da naloqten da huo'otaq nalotalec aca lshiitenaxanaqte que'eca i'ot? 29Cha'ayi sa iuena'a da huo'otaq mashi lapaxañi cam l'oxonaxala' naq'en aca'aca naue, qaq da ime da lapaxañi, nachi sa ishit da imat. Qa nachi 'enauac nam ÿauaachigui camayi, nachi ishit da qaÿi'en. 30Nachi qoÿinapec da n'aqtac: “De'eda ÿale, damayi n'oxooshiguem ada naue, qalaxayi sa ishit da imat.” 31Huo'otaq ca nta'a da huotaique da delogui' ca lÿa nta'a, qaq ¿sa ishit peta'a da i'auaxaañi da naloqnapec da ca diez mil nallippi ishit da nala'aguet cam huotaique da delogui' mayi nnaictague' ca veinte mil nallippi? 32Qaq da huo'otaq ila'a da sa ishit da nalo'oguet, nachi da ña qaÿata'aguet ca lÿa nta'a, nachi ishit da ÿamaq ca l'aqtaxanaxanec da yaqto' nmane' camayi. 33Qaq 'eda da 'eetec da huo'o ca camachaqca 'oonolec da qoñiita da sa ishit da ÿaxaneec 'enauac nam hueto'ot, nachi camayi sa ishit da ÿapaxaguenatac.

Ca toue da huo'otaq mashi sa ishit da ñi'iua

(Mateo 5.13; Marcos 9.50)

34Ca toue ÿataqta no'on, qalaxayi da huo'otaq imeuo na lli'iuaxa, qaq ¿ishit peta'a da qaltaq ÿi'iguelaxalec da no'on? 35Camayi nachi sa ishit da huo'o ca taiguet, nai'ctaxa da qaÿasaxaigui na 'alhua, huo'otaq da qaÿaÿamaxat da lata'q qanqoÿin ca nanguishi lma'. Chaqdata da qaÿalat. Cam ÿaÿaten da n'axaÿaxanaxac, qaq no'on qome da n'axaÿaxaachiguiñi.

Currently Selected:

Lucas 14: TBSNT

Highlight

Copy