Lucas 11

So Jesús dapaxaguenataxanec da atamnaxac

(Mateo 6.9-15; 7.7-11)

1Huo'o so na'a'q so Jesús hueta'a so 'alhua da natameetac. Qaq co'ollaq imat da natamnaxac, nachi huo'o so lapaxaguenatac 'enapega, 'eeta':

–Qomi' 'auapaxaguenque qome da qanatamnaxac, 'eeta'am da 'eetec so Juan co'ollaq ÿapaxaguen so lapaxaguenatacpi.

2Nachi so Jesús 'enapeco':

–Da ivita da qanatamñi, qalaq qoñiita':

'Am qadta'a mayi qoneto'ot na piguem,

'enauac qaÿi'oxoden da 'ad'enaxat.

Ña 'anamaxaño' qome da 'ad'onataxanaxac,

yaqto' i'ot ca qonetapeguec 'enauac nam huetalec ana 'alhua,

'eeta'am nam hueto'ot na piguem.

3Ña qomi' 'anañanema cam chochaq huañi qonoq na na'a'q.

4Qataq 'auapalaxat dam qadasouaxashit,

cha'ayi qomi' nataq'en sapalaxataq 'enauac nam qomi' qai'oteque qauem.

Qataq sa ishit qome da qomi' 'auashingueta ca qañi'iguenataguec,

chaqdata da qomi' 'antelaqna'agueta ca sa ÿaÿamaxañi.

5So Jesús nataq'en 'enapeco':

–Saloqnaxanaxa da huo'otaq huo'o ca 'oonolec da qoñiita huo'o ca nauochaxaua. Nachi da mashi laiñi na pe, nachi nqo'ona, qaq 'enapega, 'eeta': “'Am ÿaqaÿa, 'auauo'o qome ca i'aalec nallic. 6Ten, huo'o ñi maichi ñauochaxaua nvideu'a yi ima', chigoqtauec. Qaq qaica ca anoq da sanem.” 7Qaq saloqnaxanaxa da que'eca pa'atauo ÿasat, 'eeta': “Sa ishit da aÿim 'audaxaatapigui'. Ten, ñi lasom mashi sapotagui, qataq na ÿalaqpi nataq'en aÿim mashi ñinanaqtai'. Qaq ÿoqo'oyi sa ishit da sooshiguem da huo'o ca 'am sami'.” 8Qaq aÿim shinapec da ishit da ñishiguem somayi da ÿan som qaiÿaxanaique. Qalaxayi damayi sa ishit da naigui da souaxat da auochaxaua, cha'ayi somayi nshitaique da yaqto' sa ishit da queta da qaidaxaatapigui', nachi nal'en ÿan 'enauac som qaiueetaique. 9Qaq ÿoqo'oyi qami' shinapegalo nagui: Qauÿaxañi, qaq yi ñi Dios qami' ÿanema cam qauÿaxañiitaique; qaumitaxañi, yaqto' qauanachiÿa cam qanmichiitaique; qautoqñiu'a ca lasom, yaqto' qami' qanauategueta. 10Cha'ayi cam deÿaxan, qaq ÿaconguet cam iÿaxanaique. Qaq cam demitaxan, qalaq ÿanata cam nmittaique. Qaq cam itoqneu'a cam lasom, qalaq qanauateguet.

11Qaq, ¿peta'a ishito' da huo'o ca 'oonolec da qoñiita mayi qami' nta'al da ÿañoxot da ÿanem ca llalec ca coma' da huo'otaq iÿaxanaique aca pan? ¿Huo'otaq ÿanem ca n'adaxanaq da iÿaxanaique ca nÿaq? 12¿Huo'otaq ca llalec da iÿaxanaique ca 'olgaxa lco'oue', nachi ÿanem ca pelaqtoit? 13Qami' matem qami' yiloxoiqa, qalaq qauaÿajñi da qai'añiim ca no'on na qai'alquiipi, qaq ¿huá'ago' da saq 'eetec ñi qadta'ai mayi neto'ot na piguem da ishit da ÿanem so Espíritu Santo cam iÿaxanot ñimayi?

So Jesús qoÿiitega da huo'o ca l'ec leguemaxaic

(Mateo 12.22-30; Marcos 3.19-27)

14So Jesús i'ottapeguec so n'ec leguemaxaic mayi qaicaua naua l'aqtaqa naq'en so shiÿaxaua, qaq co'ollaq mashi inoxoneec so n'ec, nachi ishit da detaqa som qaicaua l'aqtaqa. Nachi na shiÿaxauapi ÿataqta huo'o da l'aalaxa de'eda. 15Qalaxayi huo'o na 'enapec somayipi:

–De'eda ÿale mayi i'ottapeguec na n'ecpi leguemaxaicpi, damayi do'otaxaatega da l'añaxac som maichi lataxala' nam n'ec leguemaxaicpi, l'enaxat Beelzebú.

16Qataq huo'o na chochi ÿauotaique da ÿi'iguen, nachi iÿaxaatacot da ishit da i'ot ca n'anec mayi sa qaÿauanapega da chigoqo'ot naq'en na piguem. 17Qalaxayi somayi mashi ÿaÿateetac da lhuennataxa somayipi, nachi 'enapega, 'eeta':

–Camachicague't nataxala'pi da nÿodacachi, qaq deloguiÿa't, nachi camayipi taÿa'a da nlaguiñi; qataq caua nta'al da nÿodacachi, nachi ca llalaqpi nlaguiñi. 18Qaq nachi 'eetec nataq'en so Satanás da maichi nÿodacachi nam quetague', qaq ¿huá'ago' da ishit da jec dam l'añaxac? Qaq de'eda shinapec, cha'ayi qami' qoñiitega da aÿim so'ottapeguec na n'ecpi da so'otaxaatega da l'añaxac so Beelzebú. 19Qaq da nachi 'eetec de'eda, qaq ¿négue'to' ca ÿanem nam qami' ca'attagueto ca n'añaxac da yaqto' i'odauec na n'ecpi? Qaq ÿoqo'oyi namayipi nachina na yi'oq da qami' ÿoqta qauesomiÿapec. 20Qalaxayi nachida da l'añaxac ñi Dios da so'otaxaatega da so'odauec na n'ecpi, qaq damayi naigui da mashi qami' nvitalo da l'onataxanaxac ñi Dios da ilo'ogue 'enauacna.

21Ca shiÿaxaua 'añaxaic da huo'otaq ÿataqta n'atchiguiñi na l'ogoxonaxat, qataq ilo'ogue ca lma', nachi 'enauac na ÿaÿamaxattac, qaica ca ÿi'igueetau'a. 22Qalaxayi da anac ca lÿa shiÿaxaua napacalec da l'añaxac somayi, nachi loxonec. Ime, qaq deuotaxanec 'enauac na l'ogoxonaxatpi mayi pe'etega, nachi maichi ÿoiqueetac nam lhuotaxanaxatpi.

23Cha'ayi ca aÿim iÿottapeuga, qaq nachica ca aÿim npa'aguena, qataq ca sa ishit da llaponaxanaxaua, qaq nachica ca delagaqtaxan.

So n'ec leguemaxaic mayi ñi'iguelaxa so lma'

(Mateo 12.43-45)

24Ca n'ec leguemaxaic da ivita da ca'ai ca shiÿaxaua, nachi jec, huetalec ca tojlec 'alhua, nmittaique ca nmataqa'. Qaq da huo'otaq sa ishit da ÿanata, nachi deuennataxan, 'eeta': “Aÿim no'on da shi'iguelaxa ñi ima' mayi sachigoqtoigui caillayi.” 25Qaq da ivita da ñi'iguelaxa, nachi ilalec se'eso shiÿaxaua da 'eeta'am ca noÿic ÿataqta qaiquelocta qataq qaÿaÿamaxatta. 26Ime, nachi ÿi'iguelaqteec, nachi ÿi'iguena'alo soua lÿa't siete mayi napactelguete somayi, nachi 'enauaque soomayi taiguilo se'eso shiÿaxaua. Huaña, nachi se'eso shiÿaxaua ÿapacteec da aloic saq 'en'am so hua'auchiguiñi.

Da ÿoqta 'eesa namaxayic

27Qaq co'ollaq ña i'axattac de'eda so Jesús, nachi huo'o aso 'alo mayi huetaigui se'eso shiÿaxauapi. Asomayi i'alaq, 'eeta':

–¡Ÿataqta machiguiñi acam 'alo mayi 'am deco'oic, qataq 'am ÿaqchit co'ollaxa!

28Qalaxayi somayi 'enapeco':

–¡Qalaxayi ÿataqta ÿacteec da machiguiñi cam n'axaÿaxana dam l'aqtac ñi Dios qataq ÿalaxaguet!

Na qauemaicpi shiÿaxauapi iÿaxaataique da qai'ot ca n'anec mayi sa qaÿauanapega

(Mateo 12.38-42; Marcos 8.12)

29Qaq ÿataqta nquictauec na shiÿaxauapi mayi laponeu'a so Jesús. Nachi somayi detaqa, 'eeta':

–Ne'ena shiÿaxauapi nagui ÿataqta qauemaicpi, qataq iÿaxaataique da qai'ot cam n'anec mayi sa qaÿauanapega. Qalaxayi sa ishit da qaltaq qoÿan camayi, chaqsota som n'anec mayi qai'otec co'ollaxa so l'aqtaxanaxanec ñi Dios, l'enaxat Jonás. 30Cha'ayi de'eda 'eetec so Jonás co'ollaq i'ot da l'aalaxa nam shiÿaxauapi mayi lma' yi Nínive, qaq nachida qome nataq'en da 'eetec ne'ena shiÿaxaua llalec qom i'ot da l'aalaxa na shiÿaxauapi mayi huetaigui nagui. 31Qaq que'eca pa'ateec na'a'q qom qanmit na shiÿaxauapi mayi huetaigui nagui, nachi añi nate'e mayi na'ague da taguiñi, añimayi nachajñi da ichoxot da huo'o da lasouaxashit namayipi. Cha'ayi añimayi chigaqa'a yim ÿataqta qaÿoqta 'alhua da n'axaÿaxana da laÿajnec so Salomón, qaq nagui huo'o nam shiÿaxaua mayi napactelec da l'añaxac so Salomón. 32Qaq nam netaña yi la ciudad Nínive nataq'en nachajñi que'eca pa'ateec na'a'q qom ivita da qanmit na shiÿaxauapi mayi huetaigui nagui, nachi ichoxot da huo'o da lasouaxashit. Cha'ayi nam lma' yi Nínive ca'aisalo nam n'onataxaco co'ollaq so Jonás da'aqtaxanem dam l'aqtac ñi Dios, qaq nagui qalaq huo'o nam shiÿaxaua mayi napactelec da l'añaxac so Jonás.

Aca ncoÿadaxanaxaqui mayi icoÿadelec ca shiÿaxaua

(Mateo 5.15; 6.22-23)

33Qaica ca ishit da iqueteteu'a aca lcoÿadaxanaxaqui, ime, qaq ÿanaña ca ÿapochiguiñi, huo'otaq da ÿano'ot na pa'aguiñi aca cajón. Chaqdata da ÿaatchiguem acamayi, yaqto' da huo'o ca pa'auo, nachi yi'oqtelec. 34Naua qad'ai'te nachinaua na 'eeta'ama aca ncoÿadaxanaxaqui mayi icoÿadelec ca shiÿaxaua. Qaq naua 'ad'ai'te da huo'otaq sa ÿaÿama'q, nachi 'enauac da 'ad'oquiaxac huetaigui na napalaxa. 35Qaq maxatchoxo' qome naua 'adcoÿadaxanaqte, ten qom 'ico' qouetaigui ca napalaxa. 36Cha'ayi da 'enauac da 'ad'oquiaxac yi'oqtelec, nachi sa ishit da huo'o ca napaltalec, nda'a't da 'enauac yi'oqojlec, 'eeta'am da huo'otaq icoÿattalec aca ncoÿadaxanaxaqui.

So Jesús nlaxa so fariseopi qataq som dapaxaguenataxaatapeguec na nqataxacpi

(Mateo 23.1-36; Marcos 12.38-40; Lucas 20.45-47)

37Qaq co'ollaq mashi imat da ltaxaÿaxac so Jesús, nachi huo'o so 'oonolec mayi ÿalectaigui na fariseopi ÿayina'a somayi da lqui'axaua ca lma'. Nachi so Jesús pa'auo, nachi nso'ooñi, datalec ca nqui'axala'. 38Nachi som ÿalectaigui na fariseopi ÿataqta huo'o da l'aalaxa souaxat da ÿauaachigui so Jesús da sa ipaguelec da nÿoxo'c naua nhua'q da huo'o ñi yaqta'a da deque'e. 39Qalaxayi so qadataxala' 'enapeco':

–Qami' mayi qaualliquiitaigui na fariseo, qami' qauamataxañiiñi da qauÿoi na pa'auec ana qanÿomaxaquii qataq na qadqui'axaquii, qalaxayi na pa'auo naua qadquiyaqchilli' da'aichigui na chochi qauachigoxochiÿaigui da qadcachaxaqui qataq nam sa ÿaÿamaxañisat. 40¡Ÿataqta saqco' ca qauaÿajñiÿapec! ¿Qami' sa qauaÿajñiÿo' peta'a da ca i'ot na pa'auec, qaq nataq'en na pa'auo i'ot? 41Qaq ÿoqo'oyi qami' da qauachitaqtaxañi, qalaq qai'añi cam huetangui ca qadqui'axaquii, qaq yaqto' 'enauac da qui'itta camayi.

42¡Ÿataqta choxodaxasodo' qami' mayi qaualliquiitaigui na fariseopi! Qami' qai'añiÿot quenaxa ñi Dios añi 'oonole laue ana diez nam nalecnaxanaxat mayi i'ot na laita qataq na lamaic ca nhuoshic qataq 'enauac ana laÿi huoue mayi nalecnaxanaqte. Qalaxayi sa ishit da qau'ochi ca no'on qoyiquiaxaqui, qataq sa ishit da qauauochiic ñi Dios. Qaq 'edáctaxa da qau'ochi, qaq sa ishit da qan'onaxachiÿañi nataq'en na laÿipi.

43¡Ÿataqta choxodaxasodo' qami' mayi qaualliquiitaigui na fariseopi! Cha'ayi qami' qadqopitaxachi da qanso'oñiingui ana nso'onaxaqui nam ÿataqta ÿi'oxodaq añi laponaxaqui na judiopi, qataq da ÿataqta qami' qaÿi'oxode'n da qami' qaiqui'n da huangui na nqa'aic.

44¡Ÿataqta choxodaxasodo' qami' mayi qauapaxaguenataxañiitapeguec na nqataxacpi qataq nam fariseopi mayi qoñiitega da qami' 'eesoda! Cha'ayi qami' qoñiita'am acam huachiqui mayi sa qaila'a, nachi na shiÿaxauapi chochi qauatapeguelec, sa ishit da ÿaÿaten.

45Nachi ÿasat som 'oonolec nam dapaxaguenataxaatapeguec na nqataxacpi, 'eeta':

–'Am mayi 'auapaxaguenataxaatac, de'eda 'anasaxauec nataq'en ivida'alo qomi' da qomi' i'aloqchi't.

46Qalaxayi so Jesús 'enapeco':

–¡Ÿataqta choxodaxasodo' qami' mayi qauapaxaguenataxañiitapeguec na nqataxacpi! Cha'ayi qami' ÿataqta qaica ca ishit da ÿañoxot da ÿachi na lli'ac mayi qauachiilec ca shiÿaxaua, qaq qami' sa ishit da chochi 'oonole qai'axaatai aca ipotapegueu'a qanqashiñi.

47¡Ÿataqta qami' choxodaxasodo'! Cha'ayi qami' maichi qan'oxoñiitapiguishiguem ana nhuachiquipi som l'aqtaxanaxanecpi ñi Dios mayi ÿalauat co'olloxochiyi som hua'au qadta'aipi. 48Qaq de'eda qau'ochi nachida da yi'oq da qami' ÿataqta qauaÿamaxayiñiita dam i'ot som qadta'aipi. Cha'ayi som qadta'aipi ÿalauat somayipi, qaq nagui qami' qalaq qan'oxoñiishiguem ana nhuachiquipi.

49Qaq ÿoqo'oyi ñim Dios mayi ÿajnaxanaxaic co'olloxochiyi 'enapeco': “Samaxaña qome namayipi ca i'aqtaxanaxanecpi qataq ca ÿamaxashicpi, qaq yimayipi huo'o qome ca ÿalauat, qaq ca laÿipi qalaq icaatac.” 50Yaqto' ne'ena shiÿaxauapi mayi huetaigui nagui ñi Dios ÿachilec 'enauac na ltago'qpi som l'aqtaxanaxanecpi mayi qaÿalauat, chigoqchiguiña naq'en co'ollaq chita'ague da qai'ot ana 'alhua. 51Qaq chigoqchiguiña naq'en co'ollaq qaÿalauat so Abel, chochi ivitta'a da nalaataguec so Zacarías mayi qaÿalauat co'ollaq huangui na laiñi aso n'onaxanaxaqui late'edai yim naña aso nca'atoxonaxalate. Qaq ÿoqo'oyi aÿim shinapec da ñi Dios ÿachilec da nalaataguec somayipi qome naq'en ne'ena shiÿaxauapi mayi huetaigui nagui.

52¡Qaq ÿoqo'oyi choxodaxasodo' qami' mayi qauapaxaguenataxañiitapeguec na nqataxacpi! Cha'ayi qami' qanamataxañiilec asom ÿauatoigui cam lasom mayi huetaigui da nauattonaxanaxac, qalaxayi qami' sa ishit da qaunoxoñiiuo, qalaq sa ishit da qauashiñiim da inoxoneuo nam huotaique da pa'auo.

53Nachi co'ollaq ime da nasaxauec de'eda so Jesús, nachi nam dapaxaguenataxaatapeguec nam nqataxacpi qataq nam ÿalectaigui na fariseopi, ÿataqta dalemataÿa somayi. Nachi qanayictot da sa qaÿalemaxat da qainattac. Qalota nam qainataxaatapeguec. 54Chochi qanqoviitac somayi, sa iuena'a da huo'otaq huo'o ca nasaxauec l'aqtac da sa ÿaÿamaxañi, qaq nachica chigoqchigui qanqoÿin da huo'o ca qaÿasaxalec lasouaxashit.

Currently Selected:

Lucas 11: TBSNT

Highlight

Copy