مَتّا 9

لَنگ و مُنڈێن مردێئے دْرهبکشی

(مَرکاس 2‏:3‏–12؛ لوکا 5‏:18‏–26)

1ایسّا بۆجیگێا سوار بوت و مَزَن‌گوَرمی گوازێنت و وتی جِندئے شهرا آتک. 2همے وهدا لهتێن مردما لَنگ و مُنڈێن مردے که تَهتێئے سرا وپتگ‌اَت، ایسّائے کِرّا آورت. وهدے ایسّایا آیانی ایمان دیست، گۆن لَنگا گوَشتی: ”او منی چُکّ! دلا مزن کن، تئیی گناه بَکشگ بوتنت.“ 3بله شَریَتئے لهتێن زانۆگرا وتی دلا گوَشت: ”اے مرد کُپر کنگا اِنت.“ 4ایسّایا آیانی دِلئے هَبر زانت و گوَشتی: ”شما چێا وتی دلا بدێن هئیالَ کارێت؟ 5کجام هبرئے گوَشگ آسانتر اِنت: ’تئیی گناه بَکشگ بوتگ‌اَنت،‘ یا: ’پاد آ، بتَرّ‘؟ 6بله من اے هبر کرت تانکه شما بزانێت که انسانئے چُکّا اے دنیایا گناهانی بَکشگئے واک و اِهتیار هست.“ پدا گۆن آ لَنگا گوَشتی: ”پاد آ، وتی تَهتا بزور و لۆگا برئو.“ 7گڑا مرد پاد آتک و لۆگا شت. 8وهدے مردمان اے کار دیست، تُرستِش و هُدائے ستااِش کرت که مردمانا چُشێن واک و اِهتیاری داتگ.

ایسّا مَتّایا لۆٹاێنیت

(مَرکاس 2‏:14‏–17؛ لوکا 5‏:27‏–32)

9ایسّا که دێمترا شت، مَتّا نامێن مردے دیستی که سُنگ#9‏:9 سُنگ، بزان مالیات، ٹئیکس. و مالیاتئے کارگِسا نِشتگ‌اَت. گۆن آییا گوَشتی: ”بیا، منی رَندگیریا بکن!“ مَتّا پاد آتک و آییئے همراه بوت. 10وهدے ایسّا مَتّائے لۆگا پَرزۆنَگئے سرا نِشتگ‌اَت و وراک ورگا اَت، بازێن سُنگی و مالیاتگیر و گُنهکارے هم آتک و گۆن ایسّا و آییئے مُریدان یکجاه نانِش وارت. 11وهدے پَریسیان دیست گۆن ایسّائے مُریدان گوَشتِش: ”چێا شمئے اُستاد گۆن سُنگی و گُنهکاران وراکَ وارت؟“ 12ایسّایا اِشکت و گوَشتی: ”دْراه و سلامتێن مردمان تبیب پکار نه‌اِنت، نادْراهان تبیب پکار اِنت. 13بله برئوێت و اے هبرئے مانایا در بگێجێت: منا هئیرات و کُربانیگ پسُند نه‌اِنت، مِهر و رهم پسُند اِنت.#9‏:13 هوشا نبیئے کتاب 6‏:6. من پهرێزکارانی گْوانک جنگا نئیاتکگان، گُنهکارانی گْوانک جنَگا آتکگان.“

رۆچگئے بارئوا

(مَرکاس 2‏:18‏–28؛ لوکا 5‏:33‏–39)

14رندا، یَهیائے مُرید ایسّائے کِرّا آتکنت و جُستِش کرت: ”ما و پَریسی رۆچگَ بێن، بله تئیی مُرید چێا رۆچگَ نبنت؟“ 15ایسّایا پَسّئو دات: ”سالۆنک که نِشتگ، سور و آرۆسئے مهمان گمیگَ نبنت و پُرسَ ندارنت. بله اَنچێن وهدے کئیت که سالۆنک چه آیان جتا کنگَ بیت، هما وهدا رۆچگَ بنت. 16هچکَس نۆکێن گُدئے ٹُکُّرے نزوریت و کوَهنێن پَشکا پَچَّ نجنت، چێا که نۆکێن گُدئے پَچّ نزَّ کئیت و کوَهنێن پَشکا گَنتِرَ دِرّیت. 17همے ڈئولا، کوَهنێن مَشکانی تها نۆکێن شراب#9‏:17 پاکێن کتابئے تها هر جاگه که شرابئے لبز آتکگ، اِشیئے مانا چه انگورا جۆڑ بوتگێن شراب اِنت که اِنگرێزیا ”wine“ گوشگَ بیت. مانَ نکننت، اگن چُش بکننت مَشکَ دِرنت و شرابَ رِچنت و مَشک هم بربادَ بنت. نۆکێن شرابا نۆکێن مَشکان مانَ کننت که شراب و مَشک، هر دوێن بماننت.“

جنێنێئے دْرهبکشی و جنکّێئے زندگ کنگ

(مَرکاس 5‏:22‏–43؛ لوکا 8‏:41‏–56)

18ایسّا اَنگت گۆن آیان هبرا اَت که کَنیسهئے مسترے آتک و ایسّائے پادان کپت و گوَشتی: ”منی جنکّ همے انّون مُرتگ، بله بیا وتی دستا آییئے سرا پِر مُش، آ پدا زندگَ بیت.“ 19ایسّا پاد آتک و گۆن وتی مُریدان آییئے همراه بوت.

20همۆدا جنێنے هست‌اَت که دوازده سال اَت آییئے هۆن پَچ اَت. آ چه پُشتی نێمگا آتک و ایسّائے کباهئے لَمبی دست جت. 21وتی دلا گوَشگا اَت: ”اگن ایسّائے کباها هم دست پِر بکنان، دْراهَ بان.“ 22وهدےایسّایا چَکّ تَرّێنت و جنێنی دیست، گوَشتی: ”او منی جنکّ! دلا مزن کن، تئیی ایمانا ترا دْراه کرت.“ هما دمانا جنێن دْراه بوت.

23وهدے ایسّا کَنیسهئے مسترئے لۆگا رَست، دیستی که نل جنۆک، نل جنَگ و مۆتک آرگا اَنت و رُمبے#9‏:23 رُمب، بزان گرۆه، ٹۆلی. مردم گْرێوَگ و زاریا اِنت. 24گوَشتی: ”دَر آێت، جنکّ نمُرتگ، واب اِنت.“ آیان ایسّائے سرا کندت. 25مردمِش که چه لۆگا در کرتنت، ایسّا تها شت و جنکّئے دَستی گپت و جنکّ پاد آتک. 26اے هال سجّهێن دَمگا شِنگ و تالان بوت.

دو کۆرئے دْرهبکشی

27وهدے ایسّا چه اۆدا راه گپت، راها دو کۆر گْوانک جنان آییئے رندا کپت و گوَشتِش: ”او داوود بادشاهئے چُکّ! مئے سرا رَهم کن.“ 28ایسّا لۆگێا شُت و دوێن کۆر آییئے کِرّا آتکنت. ایسّایا گۆن آیان گوَشت: ”شمارا باور اِنت که من اے کارا کرتَ کنان؟“ آیان جواب دات: ”هئو، او هُداوند!“ 29گڑا ایسّایا وتی دست آیانی چمّانی سرا پِر مُشت و گوَشتی: ”هما ڈئولا که شما باور کرتگ، گۆن شما هما ڈئولا بیت.“ 30و آیانی چمّ رُژنا بوتنت. ایسّایا کڈّن#9‏:30 کَڈَّن، بزان مُهرێن تاکید، هُکم. کرت و گوَشتنت که گۆن هچکَسا اے بارئوا هبر مکنێت. 31بله آ شتنت و ایسّائے نامِش سجّهێن دَمگا شِنگ و تالان کرت.

گُنگێئے دْرهبکشی

(لوکا 11‏:14‏–15)

32وَهدے آ رئوگا اَتنت، گُنگے که جِنّے پِر اَتی، ایسّائے کِرّا آورتِش. 33اَنچُش که ایسّایا جِنّ کَشّت، گُنگ هبر کنگا لگّت. سجّهێن مردم هئیران بوتنت و گوَشتِش: ”چُشێن کار اِسراییلا هچبر نبوتگ.“ 34بله پَریسیان گوَشت: ”اے گۆن جِنّانی سردارئے سرۆکیا جِنّانَ کَشّیت.“

کِشار و رُنۆک

35ایسّا سجّهێن شهر و مێتگانَ شت و کَنیسَهانی تها مردمی تالیمَ داتنت، هُدائے بادشاهیئے مِستاگئے جاریَ جت و مردمانی هر پئیمێن ناجۆڑی و نادْراهی‌ای دْراهَ کرتنت 36ایسّایا که مردمانی مُچّی دیستنت، آیانی سرا بَزّگی بوت، چێا که آ بێشپانکێن پسانی ڈئولا پرێشان و بێوس اَتنت. 37گُڑا گۆن وتی مُریدان گوَشتی: ”کِشار باز اِنت و رُنۆک کمّ اَنت. 38پمێشکا گۆن کِشارئے واهندا دَزبندی بکنێت که په وتی کِشارا رُنۆک دێم بدنت.“

Currently Selected:

مَتّا 9: HPKB

Highlight

Copy