مَتّا 7

اێر جنَگ و ائیب‌گیری

(لوکا 6‏:41‏–42)

1ائیب‌گیری مکنێت و کَسا اێر مجنێت، تانکه شما هم اێر جنَگ مبێت. 2هما هسابا که شما دگران اێرَ جنێت، همے پئیما شما هم اێر جنَگَ بێت و گۆن هر کئیل و پئیمانهێا که شما دئیێت، گۆن هما کئیلا شمارا دئیگَ بیت. 3چێا وتی براتئے چمّئے بوچُّکا#7‏:3 بوچُّک بزان دارئے کسانێن ٹُکّر، پیلّاشک. گندئے، بله وتی چمّئے بُنڈا نگندئے؟ 4تئیی چَمّا که بُنڈے مان، چۆن وتی براتا گوَشتَ کنئے: ’بِلّ که تئیی چمّئے بوچُّکا درَ کنان‘؟ 5او دورو و دوپۆستێن شَتَلکار!#7‏:5 شَتَلکار، بزان دورو و دوپۆستێن مردم. پێسرا وتی چمّئے بُنڈا در کن، رَندا شرّیا گندئے و وتی براتئے چمّئے بوچُّکا کَشّتَ کنئے.

6پاکین چیزّان کُچکّان مدئیێت و وتی مُروارِدان هوکّانی دێما دَور مدئیێت، چۆ مبیت که آیان لگتمال بکننت و پِر بترّنت و شمئے جندا دِرّ و دْراش بکننت.

لۆٹۆکا رسیت

(لوکا 11‏:9‏–13)

7بلۆٹێت، شمارا دئیگَ بیت. شۆهاز بکنێت، شمارا رسیت. دروازگا بٹُکّێت، په شما پَچ کنگَ بیت. 8چێا که هرکَس بلۆٹیت، آییا دئیَگَ بیت. هرکَس شۆهاز بکنت، آییا رسیت. هرکَس دروازگا بٹُکّیت، په آییا پَچ کنگَ بیت. 9شمئے نیاما چُشێن مردمے نێست که اگن آییئے چُکّ نگن بلۆٹیت، ڈۆکے بدنتی، 10یا اگن ماهیگ بلۆٹیت، مارے بدنتی. 11نون اگن شما که رَدکار اێت، اَنگت هم وتی چُکّان شَرّێن چیزّانی دئیگا زانێت، گڑا شمئے آسمانی پت همایان انگت گێشتر شَرّێن چیزَّ دنت که چه آییا لۆٹنت.

تلاهێن پرمان

(لوکا 6‏:31)

12پمێشکا، هروَهدا گۆن دگران هما ڈئولا بکنێت که شما لۆٹێت که آ گۆن شما بکننت. شَریَت و نبیانی اَسلیگێن هبر همِش اِنت.

تَنْکێن دروازگ

(لوکا 13‏:24)

13چه تنکێن دروازگا بگْوَزێت، چێا که پْراهێن دروازگ و پْراهێن راه تباهیئے نێمگا بارت و بازێنے هما راها رئوت. 14بله تَنک اِنت آ دروازگ و تَنک اِنت آ راه که زِندئے نێمگا بارت و کمُّک مردم اے راها دَرَ گێجیت.

درچک و بَر

(لوکا 6‏:43‏–45)

15چه درۆگێن پئیگمبران هُژّار ببێت. آ، مێشی پۆست گوَرا کننت و شمئے کِرّا کاینت بله باتِنا دِرّۆک و وَرۆکێن گُرک اَنت. 16شما چه آیانی کار و کِردان آیان پَجّاهَ کارێت. چه ڈَنگران#7‏:16 ڈَنگر، بزان بێتاکێن کُنٹگی درچک و دار. انگور و چه ڈۆلُکا#7‏:16 ڈۆلُک گیابانی کُنٹگی جرّے. اِنجیر چِنَگَ نبیت. 17همے پئیما، هر شَرّێن درچک شَرّێن بَر و سَمرَ کاریت و هَرابێن درچک هرابێن بَر و سَمرَ کاریت. 18شَرّێن درچک، هَرابێن بَر آورتَ نکنت و هَرابێن درچک شَرّێن بَر آورتَ نکنت. 19هَر درچکے که شَرّێن بَرَ نئیاریت، گُڈَّگ و سۆچگَ بیت. 20همے پئیما، شُما دْرۆگێن پئیگمبران چه آیانی کار و کِردان پَجّاهَ کارێت.

21هما که منا ’هُداوند، هُداوندَ‘ گوَشنت، په آ سجّهێنان آسمانی بادشاهیئے دروازگ پَچَ نبیت، تهنا هما شُتَ کنت که منی آسمانی پتئے واهگ و رزائے سرا اَملَ کنت. 22وهدے آ رۆچَ کئیت، بازێنے منا گوَشیت: ’هُداوند، او هُداوند! ما تئیی نامئے سرا هُدایی بَشارت سر کرتگ‌اَنت، تئیی نامئے سرا جِنّ کَشّتگ و تئیی نامئے سرا بازێن مۆجِزهے پێش داشتگ.‘ 23گڑا من آیان تَچکا گوَشان: ’او رَدکاران! من هچبر شمارا پَجّاه نئیاورتگ، چه منی دێما دور ببێت.‘

زانتکاری و نازانتی

(لوکا 6‏:47‏–49)

24پمێشکا، هرکَس که منی اے هبرانَ اِشکنت و اِشانی سرا اَملَ کنت، هما داناێن مردمئے پئیما اِنت که وتی لۆگی مُهرێن کۆهێئے سرا بست. 25هئور بوت، هار و هێرۆپ آتک، تْرندێن گواتان کشّت و لۆگا لگّتنت بله لۆگ نکپت، چێا که آییئے بُنرِد#7‏:25 بُنرِد، بزان لۆگ یا دیوالێئے ائولی و جُهلترێن رِد. کۆهئے سرا اێر کنگ بوتگ‌اَت. 26بله هرکس که منی اے هبران اِشکنت و اِشانی سرا اَملَ نکنت، هما نادانێن مردمئے ڈئولا اِنت که وتی لۆگی رێکانی سرا بست. 27هئور بوت، هار و هێرۆپ آتک، تْرندێن گواتان کشّت و لۆگا لگّتنت و لۆگ کپت و پَهک تَباه بوت.“

28وهدے ایسّایا اے هبر هلاس کرتنت، مُچّ بوتگێن مردم چه آییئے تالیمان هئیران بوتنت، 29چێا که آییا شَریَتئے زانۆگرانی پئیما تالیم ندات، گۆن واک#7‏:29 واک، بزان زۆر، تاکت. و اِهتیارے#7‏:29 اِهتیار، بزان مَستری، کُدرَت، زۆر. تالیم دات.

Currently Selected:

مَتّا 7: HPKB

Highlight

Copy