مَتّا 6

هئیرات

1هبردار! وتی نێکێن کاران مردمانی چَمدیدا مکنێت. اگن په اے مکسدا نێکێن کار بکنێت که مردم بگِندنت، شمارا چه آسمانی پتئے نێمگا هچّ مُزّے نرسیت. 2وهدے تئو چیزّے هئیراتَ کنئے، گڑا ڈُهل مجن. دورو و دوپۆستێن مردم کَنیسَه و بازاران اے ڈئولا کننت تانکه مردم آیان ستا بکننت. شمارا راستێنَ گوَشان، آیان وتی مُزّ رَست. 3وهدے هئیراتے چه راستێن دستا دئیئے، چپّێن دست سهیگ مبیت، 4تانکه تئیی داتگێن هئیرات چێر و سرپۆش ببیت. گڑا تئیی آسمانی پت که چێرێن کارانَ گِندیت، تئیی مُزّا دنت.

دْوا

(لوکا 11‏:2‏–4)

5وهدے دْوا کنێت، دورو و دوپۆستێن مردمانی ڈئولا مکنێت، چێا که آیان کَنیسَهانی تها و شهرئے چارراهانی سرا اۆشتگ و دْوا کنگ دۆستَ بیت، تانکه مردم آیان بگندنت. شمارا راستێنَ گوَشان، آیان وتی مُزّ رَست. 6هروهدا که دْوا کنئے، لۆگئے اَندرێن جاهێا برئو، لۆگا بند کن و چه وتی آسمانی پتا که چه چمّان چێر و اَندێم اِنت، دْوا بلۆٹ. گڑا تئیی پت که چێرێنانَ گِندیت، تئیی مُزّا دنت. 7وهدے دْوا کنێت، درکئومێن مردمانی ڈئولا مُپت و ناهودگێن#6‏:7 ناهودگ، بزان بێپائدگ. هبران تکرار مکنێت. درکئوم هئیالَ کننت که چه گێشێن تکرارا آیانی دْوا گۆش دارگَ بیت. 8آیانی پئیما مبێت، چێا که شمئے آسمانی پت چه شمئے لۆٹگا پێسر وتَ زانت که شمارا کُجام چیزّانی هاجت اِنت.

9شما چۆ دْوا بلۆٹێت:

’او مئے پت، که اَرشا ائے!

تئیی پاکێن نام شرپدار بات.

10تئیی بادشاهی بیایات.

تئیی اِراده و واهگ#6‏:10 واهگ، بزان لۆٹ، تلَب، هاجَت. زمینئے سرا هم هما ڈئولا پوره و سَرجم بات که آسمانا پورَهَ بیت.

11مئے مرۆچیگێن رِزک و رۆزیگا مرۆچی مارا بدئے.

12مئے رَدیان ببَکش، اَنچُش که ما هما سجّهێن مردم بَکشتگ‌اَنت که گۆن ما بَدی‌اِش کرتگ.

13مارا آزمائِش و چَکّاسا#6‏:13 چکّاس، بزان آزمائش، امتِهان. دئور مدئے و چه شِرّ و شئیتانا برَکّێن#6‏:13 رَکّێنَگ، بزان نجات دئیَگ، بَچّێنَگ..‘#6‏:13 لهتێن دَزنبشتا آتکگ: ”چێا که اَبدمانێن بادشاهی و واک و زۆر و شان و شئوکت تئییگ اَنت. آمین.“

14چێا که اگن شما مردمانی رَدکاریان ببَکشێت، گڑا شمئے آسمانی پت شمارا هم بَکشیت، 15بله اگن شما مردمانی ردکاریان مبکشێت، گڑا شمئے آسمانی پت هم شمئے رَدکاریانَ نبکشیت.

رۆچگ

16وهدے شُما رۆچگَ بێت، دورو و دوپۆستێن مردمانی ڈئولا وتا مُلور و گمیگ مکنێت. آ وتی دێما چۆٹَ کننت که مردم بگندنت که آ رۆچگ اَنت. شمارا راستێنَ گوَشان، آیان وتی مُزّ رَست. 17وهدے تئو رۆچگَ بئے، وتی سرا ٹێل بجن و دێما بشۆد، 18تانکه مردم مزاننت که تئو رۆچگ ائے، تهنا تئیی آسمانی پت که چه چمّان چێر و اَندێم اِنت، هما بزانت. آ وهدی تئیی آسمانی پت که چێرێن کارانَ گندیت، تئیی مُزّا دنت.

آیۆکێن جهانئے تۆشگ

19اے دُنیایا په وت مال و مَڈّی#6‏:19 مَڈّی، بزان گنج و هستی. اَمبار مکنێت، که اِدا وَرۆک و رَمێزِشَ#6‏:19 وَرۆک و رمێز، بزان گوَنڈێن کِرم و لولُّک که دار و پُچَّ وارت. ورنت یا زَنگَ گرنت یا دُزَّ پُترنت و برنتِش. 20په وت آسمانا مال و مَڈّی اَمبار بکنێت که اۆدا نه وَرۆک و رَمێزِشَ ورنت، نه زنگَ گرنت و نه دُزَّ پُترنت و برنتِش. 21پرچا که همۆدا که تئیی مال اِنت، تئیی دل هم همۆدا بیت.

بدنئے چِراگ

(لوکا 11‏:34‏–36)

22چَمّ بدنئے چِراگ اَنت. اگن تئیی چمّ شرّ اَنت، تئیی سجّهێن بدن رُژنا بیت. 23بله اگن تئیی چمّ هراب اَنت، تئیی سجّهێن بدن تهارَ بیت. نون اگن تئیی باتنئے رُژن وت تهاریے ببیت، گڑا آ تهاری سَکّێن مزنێن تهاریے بیت.

آسودگێن زِند

(لوکا 12‏:22‏–31)

24هچکَس دو واجهئے گُلامیا کرتَ نکنت، یا گۆن اِشیا نَپرتَ کنت و آییا دۆستَ داریت، یا گۆن اِشیا وپادارَ بیت و آییا مانَ نئیاریت. چۆ بوتَ نکنت که شما هُدائے گُلامیا هم بکنێت و زَرّئے گُلامیا هم. 25پمێشکا شمارا گوَشان، په وتی زِندا پرێشان مبێت که چے بوَرێن یا چے بنۆشێن، نه په وتی بدنا که چے بپۆشێن. زِند چه وراکا و بدن چه پۆشاکا دێماتِر اِنت. 26آسمانئے دێما بالی مُرگان بچارێت، نه کِشنت و نه رُننت و نه اَمبارَ کننت، بله اَنگت شمئے آسمانی پت آیان رِزک و رۆزیگَ دنت. شمئے اَرزش چه آیان باز گێشتر اِنت. 27هِچکَس په پِگر و پرێشانی وتی زِندئے رۆچان دمانے هم گێش کرتَ نکنت.#6‏:27 یا: ”وتی بالادا یکّ دستے بُرزتر کرتَ نکنت.“ 28گڑا په پُچّ و پۆشاکا چێا پرێشان اێت؟ گیابانئے گُل و پُلّانی نێمگا دلگۆش کنێت که چۆنَ رُدنت. نه زهمتے کَشّنت و نه رێسنت و گوَپنت، 29بله شمارا گوَشان که سُلئیمانا گۆن وتی مزنێن شان و شئوکتا اے پُلّانی ڈئولێن پۆشاک گوَرا نبوتگ. 30او کَمباوران! وهدے هُدا گیابانئے کاهان که مرۆچی هست‌اَنت و باندا تَرونا سۆچگَ بنت، چۆ بْرهدارَ کنت، گڑا شمارا اَلّما شرترێن پۆشاکَ دنت.

31پمێشکا پرێشان مبێت و مگوَشێت که چے بوَرێن یا چے بنۆشێن یا چے بپۆشێن. 32هُداناباورێن مردم اے سجّهێن چیزّانی رَندا تچنت، بله شمئے آسمانی پتَ زانت که شمارا اے چیزّ پَکار اَنت. 33چه درْستان پێسر، هُدائے بادشاهی و آییئے داتگێن پاکی و پَلگاریئے#6‏:33 پلگاری، بزان ساپ و سَلّهی، بێپۆلِنگی. شۆهازا ببێت، گُڑا اے سجّهێن چیزّ هم شمارا دئیگَ بنت. 34په بانداتیگێن رۆچا گَم مکنێت، چێا که بانداتیگێن رۆچ وتی گَما وتَ کنت. په مرۆچیگا، مرۆچیگێن جنجال بَسّ اَنت.

Currently Selected:

مَتّا 6: HPKB

Highlight

Copy