Bafilipo 2

BaKlisto Besigulizie Anga Buisigulizizie Klisto.

1Umpanga ndi kuli kuanana mu Klisto, ndi kuli kubobelezania kua lutundo, ndi kuli kugomia kua Muuza, ndi kuli mponga nu kiombo, 2mbogiazimbogiazi nunse, mube na makengelo mamozi, na lutundo lumozi, na mutima umozi; 3tamukite kitondo kinsania ku miango aba ku luikotio, tondo ku kubota, na muntu na muntu akutie munyage kutinga buikutia; 4muntu na muntu ntakengele bitondo biage wenyene, tondo muntu na muntu bitondo biongo. 5Mube na makengelo mamo mumuli anga bumabezaga mu Klisto Yesu: 6kubuno we abezaga Kalaga, tondo ntakengede buno kuko kulingimana na Kalaga kuli kena. 7Tondo eikunguide lutanuno, abede anga mukobe, abede na kisusania kia muntu; 8nu amonekile na lukita anga lua muntu, nu eisigulizizie, anzile aba ku lukuo lua muti wa magu. 9Ku bubuno Kalaga amukutizie nunse, amuinikile izina liatinga meina mansania; 10buno kuizina lia Yesu izu neizu likakomua, lia binsania bia muigulu nu bia mu kisi nu bia kunsi kua kisi, 11nu lulami na lulami lukeitabizia buno, Yesu Klisto eli Mukota, ku lutanuno lua Kalaga Tateisue.

BaKlisto Bakite Busoga.

12Ububo, batundua bane, anga bubo bumuanzaga bindi binsania, nkungu zinabezagako, tondo ndi nsiliko, zindiliziazi lonio lueinyu, mukue boba nu mugilimine; 13kubuno Kalaga ukukita mumuli, kumukasia kukita anga buakutunda. 14Kitazi binsania geteli manungunungu nu miango: 15buno mube bana ba Kalaga beteli na kabalibango, nu buengelezi, nu mulubu mu kibuti kibi, nu kialubikana, mubeli mukumoneka kuba kiengi mu kisi, 16kungua muakokomezia idagi lia kalamo; neikake mu busi bua Klisto, buno nsitumine lubilo buliabulia aba nsiakitile mulimo buliabulia. 17Tondo ndi nkuikasana buno nibe kisansa ku bukatizio bueinyu, nti nkubogaboga nunse, nkubogaboga neinyuebansania: 18nuinyue bubo mubogeboge, nu bogazibogazi anga bunkubogaboga.

Paolo Ekubasingila Timoteo nu Epapulodito,

19Tondo nkulemanina mu Mukota Yesu kusasia kumusingila Timoteo, buno nibogeboge kungua nungua ku misagu zeinyu. 20Kubuno nsili nongo muntu undi nage bumenyinino bumozi, unamulanga lebelebe mu bitondo bieinyu. 21Kubuno bansania bekulonda biabo tugu, tabia Yesu Klisto. 22Tondo muizi lukumu luage, nu nakitile mulimo nage ku kabamba ka musagu musoga, anga muana neisi. 23Umpanga nkulemanina kusinga wono, nti amenya bunita: 24tondo nkulemanina mu Mukota buno nasasie kuvua nenyene. 25Tondo nakengede kumusingila Epapulodito, mubuto wane nu utukukitaga nage mulimo umozi, nu mukoloboyo gamozi nanne, nu musingua nu mukiti weinyu ku kabamba ka kuiyanina kuane; 26kubuno amukuilaga malima nunse, nu abezaga na kabebe kanene, kubuno mungule buno abezaga na lusambo: 27kubuno abezaga ese buigi na kulekana: tondo Kalaga amukuilide kiombo; aba ta we wenyene, tondo nunne, bubo, nsibe na kabebe kankanka. 28Ku bubuno namusingile mu mbogimbogi nunse, buno gamuamumoneko lingo, nti muabogeboge, nunne kabebe kane nti kakokoke, 29Umpanga musekelazi mu Mukota na mbogimbogi nunse; nu muanze bantu beli anga wono: 30kubuno ku kabamba ka mulimo wa Klisto abezaga ese buigi na kulekana, ntalangilekalamo kage, buno asililizie mulimo wankitilaga gamutabezagago.

Currently Selected:

Bafilipo 2: NTKI57

Highlight

Copy