Bafilipo 1

Mukanda Wasingaga Paolo ku baFilipo. Paolo nu Timoteo Bekubasambizia.

1Paolo nu Timoteo, bakobe ba Yesu Klisto, ku basuagibua bansania mu Klisto Yesu beli ku Filipo, nu bakulu nu balangi: 2Mponga zibe kumuli nu bubobelelo bikutukaga ku Kalaga Tateisue nu ku Mukota Yesu Klisto.

Paolo Ekusegela baFilipo ku Kalaga.

3Nkusimaga Kalaga wane ku nkungu na nkungu zinkumukengelaga, 4bindi binsania muisego neisego liane ku kabamba keinyu bansania nkusega na mbogimbogi, 5ku kabamba kakugomia kueinyu mu kusambala musagu musoga kutukila kulinga aba nu lelo; 6nu bubuno ubunkukatizia, buno kitondo kikino, we walingile mulimo musoga mumuli akagusililizia aba ku busi bua Yesu Klisto: 7nu anga bunkumukengela inyue bansania, kubuno nkumukengela aba mu kikando, aba ku kulangia nu kulindia musagu musoga, inyue bansania mugomie nanne mu mponga zeno. 8Kubuno Kalaga eli mulongeki wane, ku lukita lunkumukuila malima mu kiombo kia Yesu Klisto. 9Nu bubuno ubunkumusegela, buno lutundo lueinyu luitile busi na busi mu menge nu mu bumenyinino bunsania; 10buli busoga ubumutunda, buno mube na mitima misoga geteli kabalibango aba nu ku busi bua Klisto; 11muisanane na misako za kuisanana, zili mu Yesu Klisto, ku lutanuno nu luganuno lua Kalaga.

Tubebe tua Paolo Tuakuzizie Musagu wa Yesu Klisto.

12Tondo, mibuto zane, nkutunda mumenye bubuno, bitondo binsania biambaside bialutile bango ku musagu musoga; 13bakoloboyo nu bantu bansania ba mu muino bamenyine buno nakandua, buno nili mu Klisto. 14Nu mibuto zane mingi zise na kilemanizio mu Mukota, kubuno nakandua, bese balangia kusambala idagi lia Kalaga. 15Bamozi bekusambala musagu musoga wa Klisto ku lugi nu na miango; nu bango ku lutundo lusoga: 16babano bekusambala ku kielamo, kubuno bekumenya buno nabikilue ku kusambala musagu musoga; 17tondo bango bekusambala musagu wa Klisto na miango, aba ta ku mutima musoga, bekutunda buno nisungibue. 18Buni? Tondo ku nkita insania, ndi ku buengelezi, aba ku bulili, musagu wa Klisto ukusambalua; nu ku bubuno nkubogaboga, E, nu nabogeboge. 19Kubuno nizi bitondo bibino biabe lonio luane, ku kunsegela kueinyu nu ku kukasia kua Muuza wa Yesu Klisto, 20anga bunalindide nunse nu kulemanina, buno nsibe na nsoni nunse, tondo na bupuka Klisto aganunue mundi, ndi nkulama, aba ganakua. 21Kubuno ndi nkulama nti nkulama mu Klisto, nu kukua kuli mutali. 22Tondo ndi kulama u mutali wa mulimo wane, umpanga nsizi bunasombola. 23Tondo nakandua na bitondo bibili, kubuno nkutunda kuenda kuikala na Klisto; bubo busoga nunsania: 24tondo ku kitondo kienyu busoga ndi nalama. 25Nu bubuno ubunkulemanina, nizi buno nalame neinyu, buno mukule na mbogimbogi mu bukatizio; 26buno muikake nunse mu Klisto Yesu; ku kabamba kane ganabase kumuli lingo. 27Umpanga misako zeinyu zisuage anga buatananina mu musagu musoga wa Klisto: buno, ndi navua kumumonako aba ndi nsiligo, nungue ku lukumu lueinyu, buno mualinda mu bumenyinino bua mutima umozi, mube na mutima umozi mu bukatizio bua musagu musoga; 28nu tamukue beiti beinyu boba mu kitondo kinsania; kakano kabe kalolesio ka kuzimina kubeli, tondo kumuli lonio lueinyu nulo lukutukaga kua Kalaga: 29kubuno muakasilue bubo ku Klisto, ta kumukatizia tugu, tondo kubabazibua ku kabamba kage: 30kubuno mukuluana bita bibio binaluanaga, nu bimukungua buno nikinaluana.

Currently Selected:

Bafilipo 1: NTKI57

Highlight

Copy