Bafilipo 3

Paolo Ntalemanine Biage Kutinga Musagu wa Yesu.

1Umpanga, mibuto zane, bogazibogazi mu Mukota. Nkumusanzila ta kubuno nakutua, tondo ku kumusuagia. 2Muidange na mboa, muidange na bekukitaga bubi, muidange na bekuibigagia: 3kubuno isue tuli bamonesibua, isue bekukumbaminaga Kalaga ku Muuza, nu bekuiganunaga mu Klisto Yesu, aba batakulemanina lukita lua mubili; 4tondo ganalemanina lukita lua mubili; ndi ungo muntu ekukengela kulemanina lukita lua mubili, embe nne lino. 5Gabede bindi kinana biatinga na ganibutilua namonesizibue, nili muntu wa kilongo kia Isalele, wa kikanga kia Benzamini, muEbelo wa baEbelo; ku kitondo kia mulembe, muFalese; 6ku komanizia, muiti wa ekelezia; ku kuisanana kua mulembe, nsiabezaga na katati. 7Tondo bitondo bibio biabezaga mutali kundi, nabiganzile kuba buliabulia ku kabamba ka Klisto. 8E, lebelebe nazimizizie binsania buno ni menye nunse Klisto Yesu Mukota wane: ku kabamba kage nazimizizie binsania, nabimonine buno bili bulia, buno nimenye Klisto, 9nu nibe mueli, nsibe na kuisanana kuane nnenyene, kukutuka ku mulembe, tondo kuko kuli ku bukatizio mu Klisto, kuisanana kuko kukutuka ku Kalaga ku bukatizio: 10nimumenye, nu magala meiyukilo liage, buno nibabazibue anga buababazizibue nu nisusanibue na lukuo luage; 11buno nibase kuiyukilo lia kutuka ku bakuzi. 12Ta kubuno nasila kubasa, aba ta kubuno nasililila: tondo nkinenda buno nikokomezie kikio kinakokomezizibue na Klisto Yesu. 13Mibuto zane, nsikukengela buno nasila kukikokomezia: tondo nkukita kitondo kimozi tugu, nkuibilila bibio bia kulinga, nise nayanga bibio bia luabusio, 14nkuyangilila lugendo nikasue ku lukaso lua mubila munene wa Kalaga mu Klisto Yesu. 15Umpanga isue bansania, basililila, tube na makengelo mamozi; nu ndi muli na mango makengelo, Kalaga nti amulolesiemo: 16tondo ndi tuse tuakimenya, tuendazi bumozi mukio.

BaKlisto Bayange Lukita Lusoga.

17Mibuto zane, nyangazi, nu mulole babo bekuyanga lukita lutuamulolesezie. 18Kubuno beingi bekutabanga, namusambalide mambizi meingi misagu zabo, aba kano kaluma nkumuana nu nkulila, buno beli beiti ba muti wa magu wa Klisto: 19kuzinda kuabo u lukuo, kalaga kabo u nda zabo, nu lutanuno luabo luli mu nsoni zabo, bekukengela bia kisi. 20Kubuno tuli ba kuigulu; tukulanga Monia kutukako, u Mukota Yesu Klisto: 21we ukagalukia mibili zeitu zakega, buno zisusanie na mubili wage wa lutanuno, ku magala mage akangata binsania.

Currently Selected:

Bafilipo 3: NTKI57

Highlight

Copy