Bafilipo 4
4
Paolo Ekutunda baKlisto Babogeboge na Musagu Wage.
1Umpanga, mibuto zane, batundua bane, nu bankukuila malima, mbogimbogi zane, nu nkumbu zane za bukota, lindazi mu Mukota, batundua bane. 2Nkuana Esodia, nu nkuana Suntuke, babe na bumenyinino bumozi mu Mukota. 3Nu nkukusengezia, muida wane wa bulili, ukasie bakikulu babo, kubuno bakitile mulimo umozi nanne mu musagu musoga, nu Kulemento, nu babo bango banakitaga nabo mulimo, meina mabo masanzua mu mukanda wa kalamo.
4Bogazibogazi mu Mukota bindi binsania: nkutenda lingo, bogazibogazi. 5Kubota kueinyu kumenyue na bantu bansania. Mukota eli buigi. 6Tamuikutie ku kitondo kinsania; tondo mu kitondo na kitondo, ku kusega nu ku kubuzia na kusima, masego meinyu mamenyue ku Kalaga. 7Nu bubobelelo bua Kalaga, buatinga menge mansania, bualindie mitima zeinyu nu makengelo meinyu mu Klisto Yesu.
8Umpanga, mibuto zane, bitondo binsania bili bia bulili, binsania bili bia luanzo, binsania bili bisanana, binsania bili bisoga, binsania biakutananizia, binsania bikulumba busoga; ndi bili bisoga, ndi bili bia luganuno, nti mukengele ku bitondo bibino. 9Kubuno bitondo bibio bimuigile, nu bimuakasilue, nu bimungule, nu bimuamonaga nkukita, bibio ubimukita: nu Kalaga wa bubobelelo eikale neinyu.
Paolo Ekubogaboga ku Babo Bamukitide Busoga.
10Tondo nabogilebogile nunse mu Mukota, kubuno muankengede lingo; nuinyue muankengelaga kankanka, tondo tamuamenyine bumukita. 11Nsikutenda bubuno kubuno nkuiyanina: kubuno nalindizie mutima ku bitondo binsania biambasilaga; 12mu buzambi aba mu bugumi, kungua neimbuka aba nsiembuka, kungua nili na kena aba nsili na kena. 13Nkuvuama kukita binsania mu we ukunkasaga magala. 14Tondo muakitile busoga nunse kubuno muagomezie nanne mu mbabazio. 15Nuinyue baFilipo muizi buno, mu kulinga kua musagu musoga, ganatukile ku Makedonia, takuabede lingo ekelezia liagomezie nanne ku kitondo kikino kia kukasana, umpanga inyue benyene; 16kubuno aba ku Tesolonike muansingide bingi biniyaninaga. 17Ta kubuno nkulonda lukaso; tondo nkulonda buno mutali weinyu weitilile. 18Tondo nsikuiyanina kena, kubuno namonine ku bimuansingilaga na Epapuludito, bulago bua nsunu nsoga, kisansa kitabizibua nu kikutananizia Kalaga. 19Nu Tatane Kalaga amukase kinsania kimukuiyanina anga buli bugumi buage mu lutanuno luage mu Klisto Yesu. 20Kalaga Tateisue aganunue ku nkiko na nkiko. Amena.
21Sambiziazi basuagibua bansania mu Klisto Yesu. Mibuto zeitu zindi nazo bamusambizia. 22Basuagibua bansania bekumusambizia, tondo lebelebe babo beli mu numba za Kaisala.
23Mponga za Mukota Yesu Klisto zibe neinyu.
Currently Selected:
Bafilipo 4: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
