Bakolosai 1

Mukanda Wasingaga Paolo ku baKolosai. Paolo Ekubasambizia.

1Paolo, musingua wa Yesu Klisto ku kusombola kua Kalaga, nu Timoteo, mubuto weitu, 2ku basuagibua nu mibuto zeitu bakatizia beli ku Kolosai: Mponga zibe kumuli nu bubobelelo bukutukaga ku Kalaga Tateisue.

Paolo Ekubogaboga ku Kalaga na Musagu wa baKolosai.

3Tukusimaga Kalaga Isi wa Mukota weitu Yesu Klisto, tukumusegelaga bindi binsania, 4kubuno tungule musagu wa bukatizio bueinyu mu Klisto Yesu, nu lutundo lumuli nalo ku basuagibua bansania, 5ku kabamba ka kilemanizio kimuabikidue isuku mu meigulu, musagu wakio muagungule wakalazi muidagi lia bulili lia musagu musoga, 6wabasile kueinyu; anga buguli mu kisi kinsania, nu ukukolama biguma nunse, anga buwitide kumuli, kutukila busi bumungule nu muamenyine mponga za Kalaga mu bulili; 7anga bumuigisizibue na Epapulo muida weitu nu mutundua weitu, we uli kumuli mukiti u mukatizia wa Klisto, 8uwatusambalide lutundo lueinyu mu Muuza.

Paolo Ekubasegela ku Kalaga.

9Ku kabamba kakano nuisue, kutukila busi butungule, tatukulekela kumusegela nu tukutunda muizazibue na bumenyinino bua kusombola kuage mu menge mansania nu bumenyinino bua Muuza, 10kitazi anga buatunganana ku Mukota nu kumutananizia nunse, ku kukolama biguma mu mulimo na mulimo musoga, nu kukula mu bumenyinino bua Kalaga; 11mulindibue na magala mansania, anga buli magala ma lutanuno luage, ku nkiki nu kuikalila mu mbogimbogi; 12simazi Tateisue watusuagizie buno tube na bupieni bua basuagibua mu kiengi; 13watonezie ku kapilo, nu atukumuine nu kutuingizia mu bukota bua Muana wage wa lutundo; 14mueli tuli na bukuluzi bueitu, nu isigililo lia misako za buagi bueitu 15we eli kisusania kia Kalaga utakumonekako, nkula za bibumbua binsania; 16kubuno binsania biabumbilue nage, bili mu meigulu nu bili ga kisi, bikumonekako nu bitakumonekako, ndi bili bisumbi bia bakota aba bukota aba buangato aba magala; binsania biabumbilue nage nu eibumbidebio; 17nuwe abezaga nti binsania tabiba, nu binsania bialindibua nage. 18Nuwe eli muangati wa mubili, u ekelezia; nuwe eli mutangi, alingile kutuka ku bakuzi; buno abe musondelezia wa binsania. 19Kubuno buatananizizie Isi buno kuzindilizia kunsania kuikale mueli; 20nu mueli binsania biakulumanizibue nage, nu agomanizie binsania mu mikila zage ku muti wa magu; aba ndi binsania bili ga kisi, aba bili mu meigulu. 21Nuinyue, mualingaga kuba bulazi nu beiti mu bumenyinino bueinyu mu misako zeinyu mibi, 22tondo kano kaluma amugomania mu mubili wage ku lukuo luage, buno mube basuagibua, geteli itondoki, geteli kubingua: 23ndi muikala tugu mu bukatizio, lindazi nu tamutengetenge, tamugalukibue nu kusiga kilemanizio kia musagu musoga gumungule, wasambedue ku bantu bansania beli mu kisi; ku bubuno nne Paolo nabede mukiti wago.

Paolo Ekusambala Musagu Musoga ku baBilongo.

24Kano kaluma nkubogaboga ku kubabalua kunkumubabalilua, nu nazindilizizie kuko kubabalua kuababedue Klisto ku kabamba ka mubili wage, uli ekelezia; 25nunne nabede mukiti walio, nu mulangi walio ku Kalaga anga bunakasilue ku kabamba keinyu, nizindilizie idagi lia Kalaga, 26nu kakungu kakano kabezaga kabisua wakalazi ku nkiko insania nu ku bibuti binsania tondo kano kaluma kabisulua ku basuagibua bage, 27Kalaga atundaga kubamenesia buni buli bugumi bua lutanuno lua kakungu kakano ku baBilongo, u Klisto mumuli, kilemanizio kia lutanuno: 28musagu wage utukusambala, tukuana muntu na muntu nu kuigisia muntu na muntu mu menge mansania, buno tulusie muntu na muntu ku Kalaga buno asililile mu Klisto; 29nkuikokomezia ku kukita mulimo wage na magala mage makukitaga mundi bubibu.

Currently Selected:

Bakolosai 1: NTKI57

Highlight

Copy