Bakolosai 2

1Kubuno nkutunda muamenya bita binene bindi nabio ku kabamba keinyu, nu ku kabamba ka babo baLaodekia, nu babo batamonineko; 2buno mubobelezibue, nu mukulumanibue mu lutundo, nu ku bugumi bunsania bua kilemanizio kia bumenyinino, buno bamenye kakungu ka Kalaga, u Klisto, 3bikagi binsania bia menge nu bumenyinino biabisilue mueli. 4Nkutenda idagi lilino, buno muntu ntamuengelele na buengelezi buage. 5Kungua nsili neinyu, tondo nti nili neinyu mu bumenyinino bua muuza, nkubogaboga kubuno mukukita busoga nu mualinda mu bukatizio bueinyu mu Klisto.

6Umpanga anga bumuakatizizie Klisto Yesu Mukota, ubo bumuende mueli, 7buno mulinde mueli nu kulindibua mu bukatizio, anga bumuigisizibue, nu kuitila mubo nunse na mbogimbogi.

Klisto Ekutukasia mu Bitondo Binsania.

8Muidange buno muntu ntamubigie na menge mage ma kisi, nu buengelezi bua buliabulia ku nkita za mpala za bantu, nu ku lukita lua bumba bua ba mu kisi, tondo ta ku lukita lua Klisto; 9kubuno mu mubili wage umuli kuzindilila kunsania kua buKalaga, 10nuinyue muazindilila mueli, uli muangati wa buangato bunsania nu magala; 11muamonesizibue mueli ku kumonesibua kutakitilue na maboko, mu kuikungula kua bumba buagi ku kumonesibua kua Klisto; 12muayikilue nage mu bubatizio, nu muayukile nage ku bukatizio bua magala ma Kalaga, wamuyukizie ku bakuzi. 13Nuinyue, muabezaga mualekanuka na Kalaga ku kabamba ka buagi bueinyu nu ku kutamonesibua ku bumba bua buagi, amulamizie nage, amusigilide misako za buagi bueinyu; 14nu asilile kuzimia masanzo makukakizia mabezaga kutuli, mabezaga makutuita: amatikizie kutuli, amabikile ku muti wage wa magu; 15asilile kuikungula buangato nu magala, abulilide binsania, abikindile ku muti wa magu.

BaKlisto Tabayange Lutundo Lubi.

16Umpanga muntu ntamusungie kuidia, aba ku bia kunua, aba ku kitondo kia busi bunene, aba ku kubala kua muezi, aba ku busi bua sabato: 17bibino bili kilimelime kia bitondo bikavua; tondo mubili uli wa Klisto. 18Muntu ntamunyage ku lukaso lueinyu mu lutundo luage lua kukumbamina migenzi, ekuikala mu bitondo bibio biamonine kubio nu ekuikotia buliabulia na menge ma bumba bua buagi, 19aba ntakuidanda ku Muangati, wozo wakunga ku mubili unsania, ukukungua nu kukulumanibua ku ngiginyo nu miki, nu ukukula na kukula kukutuka ku Kalaga.

20Umpanga ndi tualekanukile na misako za bumba bua kisi ku lukuo lua Klisto, kubuni, kumukuibika ku misako zeno, anga mukulama mu kisi, 21tamukate, nu tamusonde, nu tamuitubie 22(misako zeno zikukitua zabiga), ndi mukuyanga misako za bantu nu meigisia mabo? 23Misako zeno zikumenyua buno zili na menge mu nkita za kukumbamina zimuikitide inyue benyene, nu kuisigulizia kuzo, nu kuangata mubili ku bubi; tondo tazili kampa ku kuizugila ku lutundo lua bumba bua buagi.

Currently Selected:

Bakolosai 2: NTKI57

Highlight

Copy