Malako 9

1Nu abatendile bune, Lebelebe nkumubula buno, bamozi bemana gano, tabakakua aba nu gabakamona ku bukota bua Kalaga busavua na magala.

Kugaluka kua Kilungi kia Yesu.

Mat. 17:1-8; Lk. 9:28-36.

2Nu kusila kua bindi mutuba Yesu atolile Petelo, nu Yakobo, nu Yoana, nu endile nabo gantata ga muiduko munene nabo bebenyene: nu kilungi kiage kiabagalukide; 3nu nsulu zage zakelimine, zabezaga zenga nunse, butanamenya mukulumizi wa ga kisi kuzengia. 4Nu babasidue na Eliya nu Mose: nu besatenda na Yesu. 5Nu Petelo akuide Yesu bune, Labi, buli busoga ndi tuikala gano: nu tobakazi nusu isatu; lumozi luobe, nu lumozi lua Mose, nu lumozi lua Eliya. 6Kubuno ntamenyaga buakuakula; kubuno bakule boba nunse. 7Nu kimpa kiabakukide; nu iyuki liatukile mu kimpa bune, Wono eli Muana wane, u Ngoli zane: munguililazi. 8Nu kazanga kongo gabagebilegebile, tabamonine ku muntu, umpanga Yesu nabo.

9Nu gababezaga bese bakumba muiduko, abakakizizie bune, Tamusambalile muntu ku bumuamonakubo, aba Muana wa muntu gakayuka ku bakuzi. 10Nu bakokomezizie idagi lilio, babuzanizie buabo buabo, buno kuyuka ku bakuzi kuli buni? 11Nu bamubuzizie bune, Kubuni basanzi bekutenda buno Eliya atunganana kulinga kuvua? 12Nu abatendile bune, Lebelebe Eliya akalinga kuvua, nu kukunga binsania: nu buni buasanzidue Muana wa muntu, buno ababazibue nunse nu kusombua? 13Tondo nkumutenda buno, Eliya avule kalazi, nu bamukitile anga bubatundaga anga buasanzilue.

Yesu Ekonia Muana Uli na Musumbu.

Mat. 17:14-21; Lk. 9:37-42.

14Nu gabasile beigisibua bage, bamonine ku musanganano munene wabatimbikania, nu basanzi babuzanizie nabo. 15Nu kazanga kongo musanganano wamumonineko nu bangamine nunsania, nu beitumine lubilo kuko nu bamusekeide. 16Nu ababuzizie bune, Buni bumukubuzania nabo? 17Nu muntu umozi mu wozo musanganano amutendile bune, Musozi, nakuvuilide na muana wane wamulume, nu abezaga na musumbu wa kaluma; 18nu gakumubuila, nu nti amugusia; nu nti esabasa iyulo, nu kukeketa meinyo, nu ese onda: nu natendile ku beigisibua bobe buno bamutikie; nu tabavuamine. 19Nu Yesu abakuide bune, Inyue kibuti kikio kiteli na bukatizio ndi nkeikalaga neinyu kankanka? Gani gankakutilua? Vuazi nage kundi. 20Nu bavule nage kueli: nu gamumonineko, kazanga kongo musumbu amugusizie nunse, nu aguide gansi, nu ebulubutizie, nu abasile iyulo. 21Nu abuzizie isi nkungu nkizi zamulingile wono musumbu? Nu amutendile bune, Kutukila ku buana buage. 22Nu mambizi meingi ekumutumbaga ga keiya nu mu mazi, buno amubigie: tondo ndi unavuama kukita, tukuile kiombo, nu tukasie. 23Nu Yesu amutendile bune, Ndi unavuama! Bunsania bunakulungana ku wozo wakatizia. 24Kazanga kongo isi wa wozo muana alalukile, nu atendile bune, Nakatizia, nkasie ku kutakatizia kuane. 25Nu gamonine Yesu ku musanganano use wakundamana azanzuide wozo musumbu, amutendile bune, Uwe musumbu wa kaluma, nu kimbula matuzi, nakukakizia buno, tuka mu wono nu ntuingile mueli lingo. 26Nu alalukile, nu amugusizie nunse, nu atukile; nu abeide anga mukuzi; nu beingi batendile bune, Akua. 27Tondo Yesu amukatile geikoko, nu amuzanzuide, nu emene. 28Nu geingide mu numba beigisibua bage bamuvuilide ku lumbisombiso, Kubuni tatuavuamine kumutikia? 29Nu abatendile bune, Bubuno tabunamoneka tugu kute ku kusega.

Yesu Ekutenda Beigisibua Bage Kukua Kuage nu Kuyuka Kuage.

Mat. 17:22, 23; Lk. 9:43-45.

30Nu batukile kuko, batingile mu Galela; nuwe ntatundaga muntu kumenya bubo. 31Kubuno eigisagia beigisibua bage buno, Muana wa muntu asila kugabulua ku maboko ma bantu, nubo bamuite; nu gasile kuitua, kusila kua bindi bisatu nti ayuke. 32Tondo tabamenyinine bubo, nu bakule boba kumubuzia.

Yesu Ekubula Beigisibua Bage Kuanza.

Mat. 18:1-6; Lk. 9:46-48.

33Nu babasile ku Kapenuma; nu gababeide bese mu numba, ababuzizie bune, Kikizi kimuakananizanagia mu nzila? 34Tondo beikeide kibibi: kubuno babezaga bakuakanania mu nzila buno, nazi uli munene. 35Nu ekede gansi, nu amanine babo ikumi na babili, nu abatendile bune, Ndi muntu ekutunda kuba mutangi, abe muzinda ku bansania, nu mukambi wa bansania. 36Nu atolile muana muto, nu amubikile munkatini muabo: nu amukatile geikoko, nu abatendile bune, 37Na muntu na muntu wasekela muana muto anga wono muizina liane, nti ansekela: nu wozo wansekela nti ntansekela, tondo nti asekela wozo wansingile.

Yesu Abuide Buno Tabazugile Muntu Ukukita Migeleko.

Lk. 9:49, 50.

38Yoana amutendile bune, Musozi, tuamonine ku muntu umozi watikagia basumbu kuizina liobe; tondo tuamuzugide, kubuno ntakutuyanga. 39Tondo Yesu abatendile bune, Tamumuzugile: kubuno takuli muntu unakita mugeleko kuizina liane, nu kuntenda bubi. 40Kubuno wozo utakututuna, nti tuli nabo bumozi. 41Kubuno unsania ukamunusagia kituma kia mazi ma kunua, kubuno muli bantu ba Klisto, lebelebe nkumutenda buno, ntakaziminua na lukalilo luage lusoga. 42Nu unsania ukeinagia umozi wa ku babano bana bato bakunkatizia mutima, buatunganana akandue ikozi lia kugoga muikosi liage, nu kuisoa mu kitatenge. 43Nu ndi kuboko kuobe kuakuinia mutima, nti wakusesa; gunulumba wingila kitunga mu kalamo, kutinga kuba na maboko mabili nu kutumbua mu kiziba kia keiya katakuzimaga. 44Mukuso wabo tagukue, nu keiya takazime. 45Ndi kugulu kuobe kuakuinia mutima, nti wakusesa; gunulumba wingila kitunga mu kalamo, kutinga kuba na magulu mabili nu kutumbua mu kiziba kia keiya. 46Nu mukuso wabo tagukue nu keiya takazime. 47Nu ndi liso liobe liakuinia mutima, nti walitikia, gunulumba wingila mu bukota bua Kalaga na liso limozi kutinga kuba na meiso mabili nu kutumbua mu kiziba kia keiya; 48nu mukuso wabo tagukue nu keiya takazime. 49Kubuno na muntu na muntu nokalungua na keiya. 50Munkange uli musoga; tondo ndi munkange taguli na nse lingo, gunasuagibua na kikizi? mube na munkange mu muli, nu mube na bubobelelo bueinyu bueinyu.

Currently Selected:

Malako 9: NTKI57

Highlight

Copy