Malako 8
8
Yesu Ekulisia Bantu Tununu Tunazi.
Mat. 15:32-39.
1Mu busi bubo, musanganano wabeide munene lingo, nu tababezaga neidia, nu amanine beigisibua bage abatendile bune, 2Nkukuila musanganano kiombo, kubuno nise nabo bindi bisatu, nubo tabeli neidia: 3nu ndi nabasinga kuabo tabalia, nti bakutua mu nzila; kubuno bamozi batukile kulazi. 4Nu beigisibua bage batendile bune, Kiziki kikino kili kalula, nazi muntu unikutia babano na tumpampa? 5Nu ababuzizie bune, Tumpampa tunga tumunato? Nu bamutendile bune, Mutubakamo tugu. 6Nu akakizizie musanganano wikale gansi: nu atolile tumpampa mutubakamo, nu asegile, nu atubunguide, nu akasile beigisibua bage, buno babakaseto; nu batukasile musanganano. 7Nu babezaga na tuabiena tukeke tugu: abisegeide, nu abakakizizie buno babakasebio. 8Nu balile, nu bembukile: nu basongezie mbobu za tumpampa zabeide nzi mutubakamo. 9Nu babo baliaga babezaga bakuka bantu tununu tunazi, nu alagane nabo. 10Nu kazanga kongo eingide mu buato na beigisibua bage, nu babasile mu ndenge za Delamanuta.
BaFalese Bekubuzia Migeleko ku Yesu: Yesu Ekutenda Beigisibua Bage Mugago.
Mat. 16:1-12.
11Nu baFalese babasile, nu balingile kumubuzia, balondaga kalolesio kueli kakutuka kuigulu, bamulindikaga. 12Nu egemukidue bubibu mu mutima, nu atendile bune, Kubuni kibuti kikino kikulonda kalolesio? Lebelebe nkumutenda buno, kibuti kikino takikalolesibua kalolesio. 13Nu abasigile, nu eingide lingo mu buato, nu endile ku lisilia.
14Nu beibilide kueka tumpampa; tondo bendile na kamozi tugu mu buato. 15Nu abakakizizie bune, Idangazi na mugago wa baFalese nu wa Helode, 16Nu bakanizanizie buabo buabo, batendile bune, Tatuli na tumpampa. 17Nu Yesu amenyine, nu abatendile bune, kimukuakanizania kubuno tamuli na tumpampa? Ndi tamumenya, aba tamumenyinina? Ndi mitima zeinyu zikili mibibu? 18Muli na meiso tamukumona? Nu muli na matuzi, tamukungua? aba tamukukengela? 19Ganabunguide tumpampa tutano ku bantu bakuka tununu tutano, nzi inga zizeide na mbobu zimuasongezie? Nu bamutendile bune, Ikumi neibili. 20Nu nkungu za tumpampa mutubakamo kukasa bantu bakuka tununu tunazi, nzi inga zizeide na mbobu zimuasongezie? Nu bamutendile bune, Mutubakamo. 21Nu abatendile bune, Ndi tamumenyinina aba nu kano kaluma?
Yesu Ekuzibula Kiuku Meiso ku Betesaida.
22Nu babasile ku Betesaida nu bamuvuilide na kiuku, nu bamusegile buno itubie kukio. 23Nu akatile kiuku geikoko, nu endile nage kuisula lia muino; nu gamusuilide matazi ku meiso, nu abikile maboko gantata geitoe liage, amubuzizie bune, Ndi use wamona busoga? 24Nu alolile kuigulu, atendile bune, Nise namona bantu anga miti zikuenda. 25Kububo abikile lingo maboko mage ku meiso mage; nu alolile kizungululu, nu onizibue, nu amonine binsania busoga. 26Nu amusingile ku numba zage, amutendile bune, Ntubase mu muino.
Petelo Ekubula Buno Yesu Eli Muana wa Kalaga.
Mat. 16:13-16; Lk. 9:18-20.
27Nu Yesu endile na beigisibua bage mu mino za Kaisalia Filipo: abuzizie beigisibua bage mu nzila, bune, Bantu bekutenda buno, nili nazi? 28Nu bamutendile bune, Yoana Mubatizi; nu bango buno, Eliya; bango buno, umozi wa balengania. 29Nuwe ababuzizie buno, Tondo inyue mukutenda nili nazi? Petelo amuakuide bune, Uwe u Klisto. 30Nu abakakizizie buno, tabasambalile muntu umozi musagu wage. 31Nu alingile kubeigisia buno, buatunganana Muana wa muntu kubabazibua bubibu, nu kusombua na bakulu, na basankoga nu na basanzi, nu kuitua, nu kusila kua bindi bisatu nti ayuke. 32Nu ntana kiampa kiabisile. Nu Petelo amulutile, nu alingile kumuzugila. 33Tondo agalukile, nu alolile beigisibua bage, azugide Petelo, nu amutendile bune, Enda kumbusa kuane, Satana; kubuno ntukukengela bitondo bia Kalaga, tondo bia bantu. 34Nu amanine musanganano, nu beigisibua bage, nu abatendile bune, Ndi muntu ekutunda kunyanga, eitune wenyene, eke muti wa magu, nu anyange. 35Kubuno muntu unsania ukutunda konia kalamo kage akakazimizia; nu muntu unsania ukukazimizia ku kabamba kane, nu ku musagu musoga wono nti akakonia. 36Kubuno mutali mukizi wa muntu, ndi angata kisi kinsania, nu kumbusa kuzimizia kalamo kage? 37Aba muntu anagulania kikizi na kalamo kage? 38Kubuno muntu unsania ukankuaga nsoni nu ukakuaga nsoni kuidagi liane mu kibuti kikino kia butazi nu bubi, buno nuwe Muana wa muntu nti akamukua nsoni, gakavua mu lutanuno lueIsi na migenzi zage zasililila.
Currently Selected:
Malako 8: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
