Malako 7

Yesu Ekutenda na baFalese.

Mat. 15:1-20.

1Nu baFalese nu basanzi bamozi batukile ku Yelusalema, bamukundamanine, 2nu bamueine ku beigisibua bamozi bakulia, taboga ku maboko. ( 3Kubuno baFalese nu bansania baYuda, tabaliaga ndi taboga ku maboko nunse, banzaga bumba bua beisingulubo; 4nu lingo ndi batuka kuisoko, ndi taboga tabalie; nu bingo bitondo bingi bibabezaga nabio, kusugula bituma, nu nyungu, nu nyungu za nsubi.) 5Nu baFalese nu basanzi bamubuzizie bune, Kubuni beigisibua bobe tabakuyanga bumba bua bakulu, tondo bakulia taboga ku maboko? 6Nu abatendile bune, Yesaya amulenganizizie busoga, inyue bengelezi, anga buasanzilue bune,

Bantu babano bekunanza na milomo zabo,

Tondo mitima zabo zili bulazi nanne:

7Nu bakunkumbamina buliabulia,

Nu bekuigisia meigisia ma malagi ma bantu.#Yesaya 29:13.

8Nuinyue mukusiga kukakizia kua Kalaga, nu mukuanza meigisia ma bantu. 9Nu abatendile bune, Lebelebe mukusomba kukakizia kua Kalaga, buno muanze meigisia meinyu. 10Kubuno Mose atendile bune, Anza so nu nyoko; nu wasuilila isi aba nina akakua: 11tondo inyue mukutenda buno, na muntu watenda kuisi aba nina buno, lukaso lunabezaga nalo kukukasa nalukasile Kalaga; 12aba tamukuziga wono kukitila isi aba nina; 13mukubigia idagi lia Kalaga ku kabamba ka bumba bueinyu, bubo bumuasila kulusia ku bantu; nu bitondo bingi bimukukita. 14Nu gamanine lingo musanganano, nu abatendile bune, Unguililazi, inyue bansania, nu menyininazi; 15takuli kena keli gantata ga mubili wa muntu, nu kaningila munda nu kumubigia; tondo bukutuka mueli ubukumubigia. 16Ndi muntu eli na matuzi makunguilila, nti unguilila. 17Nu geingide mu numba asigile musanganano, beigisibua bage bamubuzizie buno, buisulilua bukizi bua musumo wozo? 18Nu abatendile bune, Ndi inyue tamuba na bumenyinino? Ndi tamuizi buno kokansania keli gantata ga mubili wa muntu takanamubigia; 19kubuno takamuingila mu mutima, tugu munda, nu ndi takanabasa ku mambue? Akubula buno engezie idia linsania. 20Nu atendile bune, Kukutuka ku muntu ukukumubigagia. 21Kubuno munda mua mitima za bantu umukutukaga makengelo mabi, butazi, kuiba, kuita, kuita meiga, 22lutundo lubi, mibi, buengelezi, misako za butazi, liso ibi, bilingano, kuikotia, bukongolo: 23bibino binsania ubikutukaga mu mutima, nu bibio ubikubigagia muntu.

Yesu Ekonia Muana Wabezaga na Basumbu.

Mat. 15:21-28.

24Nu atukile kuko, endile ku miaga za Tula nu Sidona. Nu eingide mu numba imozi ntatundaga muntu umozi kumenya; tondo tabuakulungeine kubisua. 25Tondo kazanga kongo mukikulu umozi, abezaga na muana wage wabezaga na musumbu ongule ku misagu zage, nu avule kuiyisa ku magulu mage. 26Nu wozo mukikulu abezaga muGeleka, wa kilongo kia Suliafoneki. Nu amusegile buno atikie musumbu wa nsese mu mukinga wage. 27Yesu amutendile bune, Siga bana beikute tanga: kubuno tabusoga kuisa idia lia bana ku mboa. 28Tondo amuakuide nuwe bune, E, Mukota; tondo aba mboa zili kunsi kua meza zikuliaga mbobu za bana. 29Nu amutendile bune, Ku kabamba ka kutenda kuobe enda; musumbu atuka mu muana wobe. 30Nu endile kuage ku numba, nu asangile muana wage eiyombekibua ga mugu, nu musumbu amutuka.

Yesu Ekonia Muntu Waziba Matuzi nu Atetumaga.

Mat. 15:29-31.

31Nu atukile lingo mu miaga za Tula, nu atingile ku Sidona, nu endile ku kiziba kia Galela, mu miaga za Dekapoli. 32Nu bamuvuilide na kimbula matuzi, nu atetumaga, bamusegile buno amonie. 33Nu amulombueide mu musanganano lumbisombiso, amuingizizie minue mu matuzi, asuide matazi, nu amutilile ku ntonga za Iulami; 34nu agalamine kuigulu, egemukidue, nu amutendile bune, Efata, buisulilua bua bubo, Zibuka. 35Nu kazanga kongo matuzi mage mazibukile, nu kutetuma kuage kuasilile, nu atuide busoga. 36Nu abakakizizie buno, tabasambalile ungo muntu: tondo bubo buabananagia, ububasambeide nunse. 37Nu bangamine nunsania, batendile bune, Asila kukita binsania busoga; akungusia bimbula matuzi nu tuluma tuse tuatenda.

Currently Selected:

Malako 7: NTKI57

Highlight

Copy