Malako 6

Yesu Eli Lingo ku Nazaleta.

Mat. 13:54-58; Lk. 4:16.

1Nu atukile kuko, abasile ku kilongo kia kuabo; nu beigisibua bage bamuyangile. 2Nu buabezaga busi bua sabato, alingile kuigisia mu numba za musanganano; nu gongule beingi ku bubo bangamine, batendile bune, Kuni kuasangila wono bubuno? nu menge makizi makasua wono? nu migeleko mingi zikukitua na maboko mage? 3Ndi ta uwozo mukulumizi, muana wa Malia, nu iselenzi wa Yakobo, nu wa Yose, nu wa Yuda, nu wa Simona? nu ndi babitu bage tabeli neisue? Nu beinine mitima nage. 4Tondo Yesu abatendile bune, Mulengania ntakubengua ku ungo, umpanga kuabo, nu mu numba zage. 5Nu ntakitile mugeleko wampa kuko, tugu abikile maboko mage ku basambi bamozi nu abonezie. 6Nu angamine na kutakatizia kuabo.

Nu Y esu atimbiletimbile mu mino nu eigisizie.

Yesu Ekusinga Beigisibua bage Ikumi nu Babili Kuigisia Bantu. Nu Konia Nsambo.

Mat. 10:1-42; Lk. 9:1-6.

7Nu amanine babo ikumi nu babili, nu alingile kubasinga babili babili; nu abakasile buangato ku basumbu ba nsese, 8Nu abakakizizie bune, Tamuende na kena mu nzila, tugu na musumbo; aba kampampa, aba nsago, aba falanga mu nsago; 9tondo nti muazuala bisalapata: nu tamuzuale makoti mabili. 10Nu abatendile bune, Kunsania kumukeingilaga mu numba, ikalazi mumo aba nu gamuatukemo. 11Nu kunsania kubatamusekela, nu kumunguilila, kungua musatukamo, nti muatitula mukungu guli ku magulu meinyu, buabe bulongeki ku beli. 12Nu bendile, nu basambeide buno bantu beiyanie. 13Nu batikizie basumbu beingi, nu babongezie beingi ba nsambo makiti, nu babonezie.

Helode Akanda Yoana Mubatizi.

Mat. 14:1-14; Lk. 9:7-9.

14Nu gongule mukota Helode ku musagu; kubuno izina liage liabezaga likusambalua: nu atendile bune, Yoana Mubatizi ayuka ku bakuzi, nu ku bubuno ekukita migeleko zeno. 15Tondo bango batendile buno, Eliya. Nu bango batendile bune, Wono eli mulengania, aba umozi wa balengania. 16Tondo gongule Helode ku bubo atendile bune, Wozo Yoana unasesaga itoe, ayuka. 17Kubuno Helode wenyene asingile bantu bakate Yoana, nu amukandile ku kikando ku kabamba ka Helodia mukikulu wa Filipo muto wage; kubuno amusongile. 18Kubuno Yoana atendile wozo Helode bune, Tabuakulungana ku mulembe kuikala na mukikulu wa muto wobe. 19Nu wozo Helodia abezaga na musona kueli, nu atundaga kumuita; tondo ntavuamine; 20kubuno Helode akuaga Yoana boba, kubuno amumenyine buno eli muntu wisanana, nu wasuagibua, nu amulangile. Nu gamunguilide atubigenue; nu amunguililaga na mbogimbogi. 21Nu gabeide busi bua kubutua kua Helode buika, akitide bakulu bage kisagulo, nu bakoloboyo, nu bakulu ba Galela; 22nu ugago mukinga wa Helodia aminine busoga, atananizizie Helode nu babo babezaga nage mu kisagulo; nu mukota abuide wozo mukinga, bune, Kinsania kiwansegage, nti nakukasekio. 23Nu amulumbilide bune, Kio kinsania kiwansegage nti nakukasekio, aba kindi kia bukota buane. 24Nu azanzukile nu abuzizie nina bune, Nisege kikizi? nu amutendile bune, Itoe lia Yoana Mubatizi. 25Nu kazanga kongo avule lubilo ku mukota, amusegile bune, Nkutunda wampa kano kaluma itoe lia Yoana Mubatizi ga kianzi. 26Nu mukota abeide na kabebe nunse; tondo ku kabamba ka kulumbila kuage, nu ku kabamba ka babo baliaga nabo, ntamuimine. 27Nu kazanga kongo mukota asingile mukoloboyo, nu amukakizizie buno, avue neitoe liage: nu endile nu asesile itoe liage mu kikando, 28nu avule neitoe liage ga kianzi, nu akasile wozo mukinga; nu wozo mukinga akasile nina. 29Nu gongule beigisibua bage ku bubo, bendile kueka kitumba kiage, nu bakibikile mu nsinda.

Beigisibua ba Yesu Basubia Kubendaga Basambala.

Lk. 9:10.

30Nu basingua bakundameine ku Yesu; bamusambalide misagu za binsania bibakitile, nu binsania bibeigisizie. 31Nu abatendile bune, Vuazi, inyue benyene ku kalula, nu mumune tanga, kubuno bantu beingi, bavuaga nu bendaga, nubo tababezaga na nkungu zakulia.

Yesu Ekulisia Bantu Tununu Tutano.

Mat. 14:13-21; Lk. 9:10-17; Yoana 6:5-13.

32Nu bendile ku kalula kiziki kitabezaga ku bantu mu buato bobenyene. 33Nu bantu beingi bamonine kubakuenda, nu beingi bamenyine, nu beitumine kuko lubilo na magulu, kutukila ku mino insania, nu balingile kubasa. 34Nu gabasile Yesu nu amonine ku musanganano munene, wamukundamanina, agukuilide kiombo, kubuno babezaga anga mikoko ziteli na mulangi: nu alingile kubeigisia bitondo bingi. 35Nu gabeide busi buse muigolo, beigisibua bage bamuvuilide, batendile bune, Gano geli kalula, nu busi buseida; 36balage buno, bende ku masoa nu ku mino za mu lulenge nu beikunzile idia. 37Tondo abakuide bune, Bakasazi idia. Nu bamutendile buno, ndi tuende kukunza tumpampa tua falanga nkama ibili buno tubakaseto? 38Nu abatendile bune, Tumpampa tunga tumuli nato? Endazi tanga mulole. Nu gabamenyine batendile buno, tuli na tutano nu biena bibili. 39Nu ababuide buno, Ikalazi bansania bibombo bibombo beikale gantata bisugu bibisi. 40Nu beikeide gansi ku bibombo bibombo, nkama na nkama, nu makumi matano matano. 41Nu atolile tuto tumpampa tutano nu biena bibili, nu agalamine kuigulu, abisegeide nu abunguide tuto tumpampa; nu atukasile ku beigisibua bage buno babakaseto; nu abeganizizie babo bansania biena bibili. 42Nu bansania balile, nu bembukile. 43Nu basongezie mbobu, nzi ikumi neibili zizeide, nu mbobu za biena. 44Nu babo baliaga tuto tumpampa babezaga bakuka bamulume tununu tutano.

Yesu Ekuenda.

Mat. 14:22-32; Yoana 6:15-21.

45Nu kazanga kongo akakizizie beigisibua bage bengile mu buato nu balinge kuenda ku lisilia aba ku Betesaida, gabezaga esalagana na musanganano. 46Nu gasilile kulangana nabo endile kusega ku muiduko. 47Nu gabeide busi buse muigolo buato buabezaga buse munkatini mua kiziba, nuwe abezaga wenyene ku muse. 48Nu abamueine bese bakutua na kuluga, kubuno kisoa kiabezaga kinene, nu gabasile nkungu za mulangi wa banazi mu kindi endile ku beli, endaga na magulu gantata ga kiziba; nu atundaga kubatinga: 49tondo gabamonine ekutabanga gantata ga kiziba, bamenyaga buno embe kili kilimelime, nu balalukile; 50kubuno bansania bamumonineko, nu bazangilezangile. Tondo kazanga kongo atendile nabo, nu abatendile bune, Kokomeziazi mitima zeinyu, nne wono tamunakua boba. 51Nu gabakamine mu buato bubabezaga mubo; kisoa kiabotile; nu bangamine nunse; 52kubuno tabamenyine kitondo kia tuto tumpampa, tondo mitima zabo zabezaga mibibu.

Yesu Ekonia Nsambo za Bantu ku Genesaleta.

Mat. 14:34-36.

53Nu gabasokile, babasile ku kisi kia Genesaleta, bakomine musa mu luzi. 54Nubo gabasilile kutuka mu buato, kazanga kongo bantu bamumenyine, 55nu beitumine lubilo ku ntungo za kisi kikio, nu kueka bantu babezaga basambi ku migu, ku kiziki kikio kibonguaga buno u kueli. 56Nu kunsania kuendaga, mu tuino nu mino nu ku masoa, bendaga babika basambi ku masoko, nu bamusegaga buno, betubie ku mupimpo wa nsulu zage; nu bansania beitubizie bonine.

Currently Selected:

Malako 6: NTKI57

Highlight

Copy