Malako 5

Yesu Ekutikia Basumbu ba Nsese mu Muntu Wabezaga ku Nsinda.

Mat. 8:28-34; Lk. 8:26-37.

1Nu babasile ku lisilia lia kiziba, ku kisi kia Gelasa. 2Nu gatukile mu buato, kazanga kongo akulumeine na muntu watukaga ku nsinda, abezaga na musumbu wa nsese, 3nuwe abezaga akuikala ku nsinda; nu takuabezaga muntu wavuamaga kumukanda na makoki; 4kubuno akandagua mambizi meingi na bilunga nu makoki, nu asesaga mamo makoki, nu kukalikia bibio bilunga: nu takuabezaga muntu wavuamaga kumubotia. 5Nu bindi binsania, musi nu kindi, eikalaga ku nsinda nu ku miduko, alalukaga nu eisumitaga na makozi. 6Nu gamonine ku Yesu bulazi, eitumine lubilo nu amukumbamine; 7nu alalukile neiyuki inene, atendile bune, Nili nobe buni, Yesu, Muana wa Kalaga uli muigulu? Nkukulumbizia ku Kalaga buno, ntumbabazie. 8Kubuno atendile musumbu wa nsese bune, Tuka mu muntu wono uwe musumbu wa nsese, 9nu amubuzizie bune, Izina liobe? Nuwe amutendile bune, Izina liane. Legioni; buisulilua buno, tuli beingi. 10Nu amusegile bubibu buno ntabatikie mu kisi kikino. 11Nu buigi na kuko ku muiduko, kuabezaga muimba muingi wa ngulube, waliaga. 12Nu bamusegile buno tusinge mu zezo ngulube, tuiyingilile muzo. 13Nu abakasile buangato. Nu basumbu ba nsese batukile, nu beingide mu zezo ngulube: nu muimba wongo unsania wakumbile mu mpembue nu wizisile mu kiziba, zabezaga zakuka tununu tubili; nu zakule mu kiziba. 14Nu balangi bazo batinine, nu basambeide musagu mu muino, nu mu masoa. Nu bantu bendile kulola buabeide kuko. 15Nu gababasile ku Yesu, nu bamonine ku wozo wabezaga na basumbu eikile, nu ese azuala nsulu nu eli na menge, wozo wabezaga na basumbu: nu bakule boba. 16Nu babo bamonaga basambeide bubo buabeide ku wozo wabezaga na basumbu, nu musagu wa buabeide ngulube. 17Nu balingile kumusega buno, atuke mu miaga zabo. 18Nu abezaga eseingila mu buato, wozo muntu wabezaga na basumbu amusegile buno ikale nage. 19Tondo ntamuzigide, umpanga amutendile tugu bune, Enda ku numba zobe ku beida bobe, nu kubasambalila bitondo bibino binene biakukitide Mukota, nu buakukuilide kiombo. 20Nu endile, nu alingile kusambala ku Dekapoli bitondo bibino biamukitide Yesu: nu bantu bansania bangamine.

Yesu Ekonia Mukikulu Wabezaga na Lusambo lua Mikila Miaka Ikumi nu Ibili. Nu Ekonia Muana wa Yailo Wabezaga Musambi.

Mat. 9:18-26; Lk. 8:41-56.

21Nu gasokile Yesu lingo ku lisilia mu bubo buato, musanganano munene wamukundamanine; nuwe abezaga mu ntungo mua kiziba. 22Nu umozi wa ku babo bakota ba mu numba za musanganano, izina liage Yailo, amuvuilide; nu gamumonineko, amukomene mazu, 23nu amusegile nunse bune, Muana wane wa mukazi ese buigi na kukua: nkukusega, buno uvue kumubika maboko gantata gage buno, one, nu alame. 24Nu endile nage; nu musanganano munene wamuyangile, bamulimbanizie.

25Nu mukikulu umozi, wabezaga na lusambo lua mikila miaka ikumi neibili, 26nu kubabazibua bubibu ku basakizi beingi, nu agabuide bikulo binsania biabezaga nabio, nu ntonine nunse, umpanga lusambo luage luitide nunse, 27nu gongule ku musagu wa Yesu, abasile kumbusa kuage mu musanganano, nu eitubizie ku nsulu zage. 28Kubuno atendile bune, Ndi neitubia ku nsulu zage tugu, nti nonibua. 29Nu kazanga kongo kanua balongo ka mikila kakamine; nuwe amenyine mu mubili wage buno ona lusambo luluno. 30Nu kazanga kongo Yesu, amenyine buno, magala makokoka kumo, nu akebetukile mu musanganano, nu atendile bune, Nazi weitubia ku nsulu zane? 31Nu beigisibua bage bamutendile bune, Ntukumona ku musanganano wono wakulimbania, nu ukubuzia bune, Nazi wetubia kundi? 32Nu alolile ndenge insania buno amone ku wozo wamukita bubo. 33Tondo wozo mukikulu akule boba nu agilimine, nu amenyine buabeide, avule nu amukumbamine, nu amusambalide bulili bunsania. 34Nu amubuide bune, Mukinga wane, bukatizio buobe buakonia; enda mu bubobelelo, nu ntube na lusambo lulo lingo.

35Nu gatendaga bubuno, nu kua wozo muangati wa numba za musanganano kuatukile bantu, batendile bune, Mukinga wobe alekana kalazi; kikizi lingo kiukukutizia Musozi? 36Tondo Yesu gongule kukutendua bubo, atendile muangati wa numba za musanganano bune, Ntunakua boba, katizia tugu. 37Nu ntazigile muntu umozi kumuyanga, tugu Petelo, nu Yakobo, nu Yoana wozo muto wa Yakobo. 38Nu beikile mu numba za wono muangati wa musanganano; ongule ku kazege keingi, nu bantu balilaga nsanda nnene. 39Nu geingide, abatendile bune, Kubuni mukukita kazege, nu kulila? wozo mukinga ntalekana, tondo eiyombeka tugu. 40Nu bamusekile nunse, nuwe gabasizie musanganano kumbuga, atolile isi wa muana nu nina, nu babo babezaga nage, beingide mumo muabezaga muana. 41Nu akatile wozo mukinga geikoko, amutendile bune, Talita kumi; buisulilua bua bubo, Mukinga, nkukubula bune, Zanzuka. 42Nu kazanga kongo wozo mukinga azanzukile nu endile; kubuno abezaga ese miaka ikumi nu ibili. Nu kazanga kongo bangamine nunse. 43Nu abakakizizie buno muntu ntamenye wono musagu: nu ababuide bune, Mukasazi idia.

Currently Selected:

Malako 5: NTKI57

Highlight

Copy