Malako 10

Yesu Ekuigisia bua Kuita Isonga.

Mat. 5:31, 32; 19:1-9; Lk. 16:18; I Kol. 7:10-15.

1Nu atukile kuko, nu abasile ku miaga za Yudaya nu ku lisilia lia Yadene: nu musanganano munene wamuendeide lingo, nu abeigisizie lingo anga buagomezie.

2Nu baFalese bamuvuilide kumubuzia bune, Ndi buakulungana ku mulembe muntu kutikia mukikulu wage? bamulindikile. 3Nuwe abakuide bune, Buni buamukakizizie Mose? 4Nu bamutendile bune, Mose atusengezizie kusanza mukanda wa kuita isonga, nu nti wamutikia. 5Tondo Yesu abatendile bune, Ku bubibu bua mitima zeinyu amusanzide kuko kukakizia. 6Tondo kutukila kulinga kua kubumbua kua kisi, mubumbi abumbile wamulume nu mukikulu. 7Kubuno muntu akasiga isi nu nina, nu akalandana na mukikulu wage; 8nubo babili bakaba mubili umozi; aba tabeli babili lingo, tondo beseli mubili umozi. 9Umpanga kikio kiakulumanizie Kalaga, muntu ntanakilekanukia. 10Nu mu numba beigisibua bage bamubuzizie lingo kitondo kikio. 11Abatendile bune, Unsania ukatikagia mukikulu wage, nu kusonga ungo, nti amuitila meiga: 12nu ndi mukikulu wenyene atuka kuiba wage, nu kusongua nongo, nti eita meiga.

Yesu Ekubogiabogia Bana Bato.

Mat. 19:13-15; Lk. 18:15-17.

13Nu bamuvuilide na bana bato, buno eitubie kubeli: nu beigisibua babazugide. 14Tondo gamonine Yesu ku bubo, ongilue, nu abatendile bune, Sigazi bana bato bavue kundi; tamunabazugila: kubuno beli anga babano bukota bua Kalaga buli buabo. 15Lebelebe nkumubula bune, Unsania uteitabizia bukota bua Kalaga anga muana muto, ntakeingila nunse mubo. 16Nu abalelile, nu abikile maboko gantata gabo, nu abakitile mponga.

Muntu Umozi Abasile ku Yesu nu Amutendile Bune, Musozi Musoga Nkite Buni Nibe na Kalamo Katanakuzinda.

Mat. 19:16-30; Lk. 18:18-30; 10:25.

17Nu gendaga mu nzila, muntu umozi eitumine lubilo kueli, nu amukomine mazu, amubuzizie bune, Musozi Musoga, buni bunikita nipiene kalamo katanakuzinda? 18Nu Yesu amutendile bune, Buni bukumana musoga? Takuli umozi musoga tugu Kalaga wewenyene. 19Wizi makakizio buno, Ntuite, Ntuite meiga, Ntuibe, Ntueke munyobe buza, Ntuengelele, Anza so nu nyoko. 20Nu amutendile bune, Musozi nanzile mamano mansania kutukila ku kubutua kuane. 21Nu Yesu gamulolile amutundile, nu amutendile bune, Wagelelua ku bumozi tugu: enda, ukunzie binsania biguli nabio, ubikase bazambi, bubo ukaba neisuku muigulu: nu uvue unyange. 22Tondo abeide na kabebe ku bubo, nu endile: kubuno abezaga na bikulo bingi.

23Nu Yesu alolile ku ntungo insania nu atendile beigisibua bage bune, Kuingila kua bagumi mu bukota bua Kalaga kuli kubibu! 24Nu beigisibua bangamine na bubo buatendile. Tondo Yesu abakuide lingo bune, Bana, kuingila kua babo bakulemanina bikulo mu bukota bua Kalaga kuli kubibu! 25Buli neibineibi ngamia kuingila muitengu lia nsinge, ku mugumi kuingila mu bukota bua Kalaga. 26Nu babo bangamine nunse, nu bamutendile bune, Umpanga nazi unavuama konibua? 27Yesu abalolile, nu atendile bubo, Bubuno tabunakulungana ku bantu, tondo bunakulungana ku Kalaga; kubuno bunsania bunakulungana ku Kalaga. 28Petelo alingile kumutenda bune, U nguilila, isue tuasigile binsania, nu tuakuyangile. 29Yesu atendile bune, Lebelebe nkumubula bune, Takuli muntu wasigile numba zage, aba bato bage, aba babitu bage, aba nina, aba isi, aba bana, aba masoa, ku kabamba kane, nu ku kabamba ka musagu musoga, 30tondo atalikilue mambizi lukama ku nkungu zeno, numba, nu bato bage, nu ba nina, nu bana, nu masoa, na mbabazio; nu mu nkiko zikavua kalamo katanakuzinda. 31Tondo beingi balingaga bakaba bazinda; nu beingi bazindaga bakaba batangi.

Yesu Ekubula Beigisibua Bage Kukua Kuage nu Kuyuka Kuage.

Mat. 20:17-19; Lk. 18:31-33.

32Nu babezaga mu nzila, bendile ku Yelusalema; nu Yesu abatangile: nu bangamine; nu babo bamuyangaga bakule boba.

Nu atolile lingo babo ikumi na babili, nu alingile kubasambalila bibio biamubasile, 33atendile bune, Unguililazi, tuabakama ku Yelusalema; nu Muana wa muntu agabulue ku basankoga banene nu ku basanzi; nu bamusungie buno akue, nu bamugabule ku baBilongo: 34nu bamuililike, nu kumusuila matazi, nu kumususula, nu bamuite; nu kusila kua bindi bisatu nti ayuke.

Yakobo nu Yoana Bekutunda Yesu Abakitile Bubakumusega.

Mat. 20:20-28.

35Nu Yakobo nu Yoana, bana ba Zebedayo, bamuvuilide, nu bamutendile bune, Musozi, tukutunda utukitile butukukusega. 36Nu abatendile bune, Mukutunda nimukitile buni? 37Nu bamutendile bune, Utuitabizie umozi kuikala ku kuboko kuobe kua seidume, nu ungo ku kuboko kuobe kua seikazi, mu lutanuno luobe. 38Tondo atendile bune, Tamuizi kimukusega. Ndi munavuama kunua ku kituma kikio kinkunua kukio? aba bubatizio bunkubatizibua? 39Nu bamutendile bune, Tunavuama. Nu Yesu abatendile bune, Muanue ku kituma kinanue kukio; nu bubatizio bunkubatizibua muabatizibue mubo; 40tondo kuikala ku kuboko kuane kua seidume aba ku kuboko kuane kua seikazi nsinavuama kumukasa; tondo kuikala kuko kuli bantu balongekeidue. 41Nu gongule babo ikumi ku bubo, bongedue Yakobo nu Yoana. 42Nu Yesu abamanine, nu abatendile bune, Muizi buno bakota ba baBilongo bekubangata; nu bakota babo bakubakitia. 43Tondo tabubo gamusamba: tondo unsania ukutunda kuba munene, abe mukambi wa banyage; 44nu unsania ukutunda kuba mutangi gamusamba, abe mukambi wa bansania. 45Kubuno Muana wa muntu ntavule kukambilua, tondo kukamba, nu kukasana kalamo kage kuba bukuluzi bua beingi.

Yesu Ekuzibula Meiso ma Kiuku Kiamanagua Batimayo.

Mat. 20:29-34; Lk. 18:35-43.

46Nu babasile ku Yeliko: aba gabezaga esatuka ku Yeliko, gamozi na beigisibua bage nu musanganano munene, muana wa Timayo, izina liage Batimayo, wozo musegi kiuku, abezaga muntungo mua nzila. 47Nuwe gongule buno Yesu wa Nazaleta alingile, kulaluka neiyuki inene, nu atendile bune, Yesu, muana wa Davidi, nkue kiombo. 48Nu beingi bamuzugide buno, eikale kibibi: tondo eitide kulaluka neiyuki inene bune, Uwe Muana wa Davidi, nkue kiombo. 49Nu Yesu emanukile, nu amutendile bune, Mumanazi. Nu bamanine wozo kiuku, nu bamutendile bune, Kokomezia mutima: emanuka, ekukumana. 50Nu we ateide nsulu zage, emanukile, nu avule ku Yesu. 51Nu Yesu amuakuide bune, Kikizi kiukutunda nikukitile? Nu wozo kiuku amutendile bune, Laboni, nkutunda namona. 52Nu Yesu amutendile bune, Enda tugu; bukatizio buobe buakonia. Nu kazanga kongo amonine, nu amuyangile mu nzila.

Currently Selected:

Malako 10: NTKI57

Highlight

Copy