Malako 11

Yesu Abasa ku Yelusalema.

Mat. 21:1-9; Lk. 19:29-38.

1Nu gababasile buigi na Yelusalema, nu kubasa Betepage nu Betania, ku muiduko wa Oleve, asingile beigisibua bage babili, 2nu abatendile bune, Endazi ku muino uli luabusio lueinyu: nu kazanga kongo gamuabase mugo, muamone ku muana wa mpunda asuikua, utetetelagua geli, nti muazisula, nu nti muavua nazo. 3Nu ndi muntu amubuzia bune, Kimukukitila bubo? muamutenda buno, Mukota akuiyaninazo; nu kazanga kongo azisinge kuno. 4Nu bendile, nu bamonine ku wozo muana wa mpunda asuikua ga muingilo kumbuga kua numba; bazisulile. 5Tondo kuabezaga kuemana bantu bamozi babatendile bune, Kikizi kimukusulila zezo mpunda? 6nu babatendile anga buabalagile Yesu: nu babasigile. 7Nu bavule na wozo muana wa mpunda ku Yesu, nu babikile nsulu zabo gantata gazo; nu eikede gantata gazo. 8Nu beingi banzile nsulu zabo mu nzila; nu bango banzile ntabi za miti zibasesaga mu masoa. 9Nu babo bendaga luabusio, nu babo bamuyangaga, balalukile neiyuki bune, Hosana; mbogimbogi ku wozo ukuvua muizina lia Mukota; 10mbogimbogi ku bukota bukuvua ku buangato bua tateisue Davidi, Hosana mu meigulu.#Luimbo 118:26; Zakalia 9:9. 11Nu abasile ku Yelusalema, mu numba za kukumbamina Kalaga; nu gasilile kulola binsania kundenge insania, kubuno zabezaga nkungu zeigolo endile ku Betania neikumi na babili.

Yesu Asuilila Muti wa Biguma.

Mat. 21:19-21.

12Nu gabeide nindunindu, gabatukile mu Betania, akule na nzala, 13Nu amonine ku muti wa figi bulazi uli na nsamba, endile buno, embe anamona biguma kugo: nu gabasile gago, ntamonine kampa tugu nsamba; kubuno tazabezaga nkungu za kukolama biguma. 14Nu akuide bune, Kutukila lelo aba nu ku nkiko zitanakuzinda, muntu ntakalia ku biguma biobe, nu beigisibua bage bongule ku bubo.

Yesu Ekubalangania Tusenga tua Bagulania.

Mat. 21:12-16; Lk. 19:45-47; Yoana 2:13-16.

15Nu babasile ku Yelusalema; nu eingide mu numba za kukumbamina Kalaga, nu alingile kuimbia babo bakunzagia nu bakunzaga mu numba zezo, nu eidukizie meza ma bagulania ba falanga, nu bisumbi bia bakunzia ba nkulimba; 16nu ntazigile muntu kuvua na kena mu numba za kukumbamina Kalaga. 17Nu abeigisizie bune, Ndi tabuasanzilue bune, Numba zane zikamanua numba za masego ku babilongo bansania? Tondo inyue muazigalukia anga numba za banyagi.#Yesaya 56:7; Yelemia 7:11. 18Nu basankoga banene nu basanzi gabongule ku bubo, balondile bubamuita: kubuno bamukule boba, kubuno musanganano unsania wangamine na meigisia mage.

19Nu busi na busi muigolo endaga kuisula lia muino.

20Nu gababezaga bese batinga nindunindu, bamueine ku wozo muti wa figi woma kutukila ku mizi aba nu ku ntabi. 21Nu Petelo akengeide bubo buatendile, nu atendile bune, Labi; lola, wozo muti wa figi uwasuililagile woma. 22Nu Yesu abakuide bune, Mube na bukatizio ku Kalaga. 23Lebelebe nkumubula bune, Unsania ukatendaga buno muiduko wono bune, Tutumuka nu wiyise mu kitatenge; ntabe na kangonongono mu mutima wage, tondo akatizie buno, bubo buatendaga buakitue, nu amone ku bubo buatendaga. 24Tondo ububo bunkumubula bune, Binsania bimukutunda bisegazi, mukatizie buno muabimone, nu biabe bienyu. 25Nu gamukuemana ku masego, sigilinanazi, ndi uli na kitondo ku munyobe; bubo Soinyue uli muigulu amusigilile misako za buagi bueinyu. 26Tondo ndi inyue tamukusigilila, Soinyue uli muigulu ntamusigilile misako za buagi bueinyu.

Bekubuzia Yesu Buangato Buage.

Mat. 21:23-27; Lk. 20:1-8.

27Nu babasile ku Yelusalema lingo: nu gatabangaga mu numba za kukumbamina, basankoga banene, nu basanzi, nu bakulu bamuvuilide; 28nu bamutendile bune, Ku buangato bukizi bukukitila ku bubuno? 29Nu Yesu abatendile bune, Nne nkumubuzia bumozi, nu muanakulebo, nti namubula nunne buangato bunkukitila ku bubo. 30Bubatizio bua Y oana buatukile muigulu, aba ku bantu? Nakulazi. 31Nu babuzanizie buabo buabo, batendile bune, Ndi tuatenda buno buatukile kuigulu; nti atenda buno, Kubuni tamuamukatizizie? 32Tondo ndi tuatenda buno, Buatukile ku bantu-bakule bantu boba: kubuno bansania bakukatizia buno Yoana eli mulengania. 33Nu bakuide Yesu bune, Tatuizi. Nu Yesu abatendile bune, Nunne lingo nsikumubula ku buangato bukizi bunkukitila ku bubuno.

Currently Selected:

Malako 11: NTKI57

Highlight

Copy