Malako 12

Musumo wa Nyene Isoa Wasegaga Biguma ku Bakambi Bage ba Biguma.

Mat. 21:33-46; Lk. 20:9-19.

1Nu alingile kubeisa misumo. Muntu umozi ayikile isoa lia mizigi za biguma, nu atimbizie mukolo, nu ombile itengu lia kuyika biguma bia mizigi, nu akitile numba kuigulu za mulangi, nu endile mu kingo kisi. 2Nu mu nkungu za kukola asingile mukobe ku bakambi buno, embe anamona ku biguma ku bakambi beisoa. 3Nu bamukatile, nu bamususuide, nu bamusubizie nteli na kampa. 4Nu asingile lingo ungo mukobe; nu bamusumitile kuitoe nu bamubabazizie nunse. 5Nu asingile ungo; nu bamuitile: nu bango beingi babalibuide nu bango babeitile. 6Tondo abezaga na ungo, umozi tugu, muana wage watunda: nu amusingile kubeli, nu atendile bune, Embe bananza muana wane. 7Tondo babo bakambi batendile bune, Wozo umupieni wage, vuazi, tumuitazi, nu tupiene bupieni buage. 8Nu bamukatile, nu bamuitile, nu bamuisile ku lutikilo luisoa. 9Nu buni bukakita wozo mukota weisoa lia biguma? akavua nu akabigia bakambi, nu akakasa bango lilio isoa. 10Ndi tamuasomine ku masanzo mamo:

Ikozi liasombagua na bobaki,

Uliabede ikozi inene lia kapindapinda;

11Bubo buatukile ku Mukota,

Nubo bukutuganiagania?#Luimbo 118:22, 23, 24.

12Nu balondile bubamukata; tondo bakule musanganano boba; kubuno bamenyine wozo musumo wabeisaga: bamusigile, nu bendile.

Yesu Ekutenda Buidigo.

Mat. 22:15-22; Lk. 20:20-26.

13Nu bamusingide baFalese bamozi nu baHelode, bavule bubanamukandika bitondo. 14Nu gabasilile, bamutendile bune, Musozi, tuizi buno uli bulili, nu ntukuikutia ku kitondo kia muntu umozi; kubuno ntukulola ku kilungi kia bantu, tondo ukuigisia meigisia ma Kalaga mu bulili: Ndi buakulungana ku mulembe kuliga idigo ku Kaisa, aba kutaliga? 15Tumukase, aba tatumukase? Tondo amenyine kuengelela kuabo, abatendile bune, kubuni kumukundindikila? Vuazi na falanga zeidigo, buno nizimoneko.#Mk. 6:37. 16Nu bamuvuilide nazo, nu ababuide bune, Kikino kisusania nu mamano masanzo bili bia nazi? Nu bamutendile bune, Bili bia Kaisa. 17Nu Yesu abatendile bune, Kasazi Kaisa bia Kaisa, nu ku Kalaga bia Kalaga. Nu bangamine nage nunse.

Yesu Ekutenda Basodoke Kuyuka kua Bantu ku Bakuzi.

Mat. 22:23-33; Lk. 20:27-38.

18Nu Basodoke bamuvuilide, babo bakutendaga buno, takuli iyukilo; bamubuzizie bune, 19Musozi, Mose atusanzide buno, Ndi iselenzi wa muntu akua, nu kusiga mukikulu, nu ndi ntasiga muana, nti muto wage ayana wozo mukikulu, nu abutile iselenzi bana. 20Mutuli muabezaga mutuba kamo bandemozi: nu mutangi asongile mukikulu nu akule ntasigile bana; 21nu wababili amuyanine, nu akule, nuwe ntasigile bana; nu wozo wa basatu bubo nuwe: 22nu babo bansania mutuba kamo, tabasigile bana. Nu bubo, nuwe mukikulu akule. 23Muiyukilo wozo mukikulu akaba wa nazi? kubuno babo mutuba kamo bamusongile. 24Yesu abatendile bune, Ndi tamukuibaga bubuno, kubuno tamuizi masanzo, aba magala ma Kalaga. 25Kubuno gabakayuka ku bakuzi, tabakasonga, aba tabakasongua; tondo babe anga migenzi za muigulu. 26Tondo ku kitondo kia bakuzi buno bakayuka; ndi tamusomaga mu mukanda wa Mose ku kitondo kia kiziki kia guluminaga keiya mu muti, buamutendile Kalaga bune, Nne nili Kalaga wa Abalahama, nu Kalaga wa Isaka, nu Kalaga wa Yakobo? 27We nteli Kalaga wa bakuzi, tondo wa balami: bubo mukuibaga nunse.

Yesu Ehutenda bua Mulembe.

Mat. 22:34-40; Lk. 10:25-37.

28Nu umozi wa ku basanzi abasile, nu ongule kubakutenda, nu amenyine buno abakula busoga, amubuzizie bune, Kukakizia kukizi kutangi? 29Yesu atendile bune, Kutangi ukukuno, Unguilila Isalele, wozo Mukota, Kalaga weitu, eli Mukota umozi tugu: 30nu tunda Mukota, Kalaga wobe na mutima wobe unsania, nu mu kalamo kobe kansania, nu mu menge mobe mansania, nu na magala mobe mansania.#Dutelenome 6:4, 5. 31Nu kuibili kuli bubo, Tunda munyobe anga buwitunda uwenyene.#Lewitiki 19:18. Takuli kungo kukakizia kuatinga mamo. 32Nu musanzi amutendile bune, Bulili, Musozi, watenda buligo, buno Kalaga eli umozi tugu aba takuli ungo, tugu we: 33nu nti wamutunda mu mutima wobe unsania, nu mu menge mobe mansania, nu na magala mobe mansania, nu kutunda munyobe anga buwitunda uwenyene buatinga kayulo kakugisibua nu bisansa binsania. 34Nu gamonine Yesu buno atendile na menge, amutendile, Uwe ntuli bulazi na bukota bua Kalaga. Nu takuli muntu wagelekile kumubuzia lingo.

Yesu Ekubuzia baFalese Bubekukengela ku Klisto.

Mat. 22:41-46; Lk. 20:41-44.

35Nu Yesu akuide geigisagia mu numba za kukumbamina bune, Kubuni basanzi bekutenda buno Klisto eli muana wa Davidi? 36Kubuno Davidi wenyene atendile mu magala ma Muuza Wasililila bune,

Mukota atendile ku Mukota wane,

Ikala ku kuboko kuane kua seidume,

Aba nu ganangate beiti bobe. #Luimbo 110:1.

37Davidi wenyene amumanine Mukota; nu buni bueseli muana wage? Nu bantu beingi ba wozo musanganano munene bamunguilide na mbogimbogi.

38Nu mu meigisia mage atendile bune, Idangazi na basanzi, nu babo bekuelama kuvuala nsulu ndazi, nu kusambizibua muisoko, 39nu kuikala ga bisumbi bitangi mu numba za musanganano, mu biziki bitangi mu bisagulo, 40babo bakunyaga numba za misigala, nu ku buengelezi bakusega isego nkungu ndazi; babo bakasungibua lusungio lunene nunse.

Masengi ma Mukikulu Musigala.

Lk. 21:1-4.

41Nu eikeide buigi na sanduku za mitebe, nu alolile musanganano bugukuisa falanga muzo; nu bagumi beingi beisile ningi. 42Nu kuavule musigala muzambi, nuisile sengi ibili, anga likuta limozi. 43Nu amanine beigisibua bage, nu abatendile bune, Lebelebe nkumubula buno wono musigala abika ningi kutinga bansania babika bikulo mu sanduku zeno: 44kubuno babikile bia mutali wabo; tondo we ku buzambi buage bunsania esile binsania biabezaga nabio, aba bikulo biage binsania.

Currently Selected:

Malako 12: NTKI57

Highlight

Copy