Misako 5

Anania nu Safina.

1Tondo muntu umozi wamanagua Anania, nu Safina mukikulu wage, akunzizie isoa liabo, 2beibindikide nkindi nkeke ku bibio bibakunzagia, nu mukikulu wage amenyine bubo, nu avule na nkindi nkeke ku basingua. 3Tondo Petelo amubuide bune, Anania, kubuni Satana eizazia mutima wobe kuengelela Muuza Wasililila, weibindikila nkindi nkeke ku biwakunzagia kuisoa?

4Galiabezagile ndi taliabezagile liobe? Aba galiasilile kukunzua, ndi taliabezagile ku buangato buobe? Kubuni kuwakengede mu mutima wobe kukita bubuno? Ntueka bantu buza, tondo Kalaga aguweka buza. 5Anania gongule ku bubo, aguide, nu alekene: nu bansania gabongule ku bubuno bakule boba nunse. 6Nu basikila bamukandile, nu bamuekile kumbuga nu bamuyikile.

7Gabeide gatinga nkungu isatu, mukikulu wage eingide nu ntamenyine buabezagako. 8Nu Petelo amuakuide bane, Ntende ndi wakunzizie isoa ku bukunza bubuno. Nu atendile bune, Bubo ububuli. 9Tondo Petelo amubuide bune, Buni bumuagomanizie ku kulindika Muuza wa Mukota? lola, magulu ma bekaga iba wobe bamuyikaga, beli ku muingilo, nubo bakukueka kumbuga. 10Nu kazanga kongo aguide, nu alekene: nu basikila bengidemo nu basangile: esalekana nu bamuekile, bamuyikile gamozi neiba wage. 11Nu boba bunene buabede ku ekelezia linsania, nu ku bansania bonguaga ku bubo.

Magala ma Bantu ba Kalaga.

12Nu ku maboko ma basingua kuakitilue migeleko nu maganogano meingi munkatini mua bantu; nubo bansania babezaga na mutima umozi ku lusu lua Solomo. 13Tondo ku bango bansania takuli umozi wagelekile kugomia nabo: tondo bantu babaganuine, 14nubo bakatizizie batalikidue ku Mukota, nu betide beingi bamulume nu bakikulu: 15nu bekile basambi mu nzila, nu bababikile ga bisasa nu ga migu, buno, Petelo gavue, embe nti kilimelime kiage kiatinge ku umozi wa kubeli. 16Nu misanganano zatukile ku mino zabezaga buigi na Yelusalema, bekile basambi bakuaga na basumbu: nu bansania bonezibue.

Bekusungia baKlisto.

17Tondo gatukile sankoga munene, nu bansania babezaga gamozi nage (ubakikanga kia Basadoke), babeide na lugi, 18nu bakatile basingua, nu bababikile mu kikando. 19Tondo mugenzi wa Mukota akanduide nibi za kikando mu kindi, abatikizie, atendile bune, 20Endazi, muimane mu numba nnene za kukumbamina, nu mubule bantu bunsania bua Kalamo kakano. 21Nubo gabongule ku bubo, beingide mu numba nnene za kukumbamina, nindunindu, nu beigisizie. Tondo sankoga munene avule na babo babezaga nage, bakundamanizie ngatu, nu bakulu bansania ba bana balsalele, nu basingile bantu ku kikando buno bavue nabo. 22Tondo bakiti gababasile tababamonineko mu kikando: nu bavule na musagu, 23nu batendile bune, Tuasangile kikando kiakandua nunse, nu balangi bemine ku nibi; tondo gatueguide tatuamonine ku muntumo. 24Gabongule ku bubo mulangi wa numba nnene za kukumbamina nu basankoga banene, tabamenyine bubatenda, nu buabe kuzinda kua bubo. 25Nu kuavule umozi nu abasambalide musagu bune, Unguililazi, bantu babo bamuabikile mu kikando, beli mu numba nnene za kukumbamina, bemana, nu bakuigisia bantu. 26Nu mulangi endile na bakiti, nu bavule nabo, tondo tababasikuide; kubuno bakule babo bantu boba, banavua kubalibula makozi. 27Nu gabavule nabo bababikile ku ngatu, nu sankoga munene ababuzizie, 28nu atendile bune, Ndi tatuamuzugide bubibu buno, tamuigisie lingo kuizina lilino: nu lolazi, muakukia Yelusalema na meigisia meinyu, nu mukutunda kutulusizia mikila za muntu wono gantata geitu. 29Tondo Petelo nu basingua bakuide bune, Buatutunganana kuanza Kalaga kutinga bantu. 30Kalaga wa batateisue ayukizie Yesu, gumuitile nu umuatakile ku muti. 31Kalaga asakikile wono na kuboko kuage kuaseidume, buno abe Muangati nu Monia, akase balsalele kuiyania nu kusigililua ku misako za buagi buabo. 32Nu isue tuli balongeki ba bubuno, na Muuza Wasililila, wakasile Kalaga ku bansania bekumuanzaga.

33Gabongule ku bubuno, beinine mitima, nu bakalile luango buno babeite. 34Tondo muntu umozi, wa baFalese, izina liage Gamaliele, ngatu za mulembe, anzagua na bantu bansania, akakizizie bakambi buno bababasie kumbuga tanga. 35Nu ababuide bune, Inyue bamulume ba Isalele, idangazi na bumukukitila bantu babano. 36Kubuno ku bingo bindi biatingile Yeuda abasile, atendile buno, we eli muntu munene; nu bantu anga nkama inazi bamuyangile; nuwe akule nu bansania bamuitabizizie bandabene. 37Kumbusa kuage kuabasile Yudasa wa Galela mu bindi bibino bia kusanzua kuidigo, nu alubikanizie bantu beingi kumuyanga; nuwe azimine; nu bansania, bamuitabizizie, bandabene. 38Nu kano kaluma nkumubula bune, Tamunangana na bantu babano, basigazi: kubuno luango luluno aba mulimo wono ndi watukile ku bantu, nti wakue: 39tondo ndi luli lua Kalaga, inyue tamunavuama kuluita, munaba anga bekusaka na Kalaga. 40Beitabizizie bubo buatendile: nu bamanine basingua, babalibuide nu babazugide buno tabatende lingo muizina lia Yesu, nu babasigile. 41Batukile ku ngatu na mbogimbogi kubuno bamonekile anga batananina kusungibua ku kabamba keizina lilio. 42Nu busi na busi, mu numba nnene za kukumbamina, nu mu numba zabo, tabamenkile kuigisia nu kusambala musagu musoga wa Yesu buno u Klisto.

Currently Selected:

Misako 5: NTKI57

Highlight

Copy