Misako 4

1Nu gabatendaga na bantu, basankoga, nu mulangi wa numba nnene za kukumbamina, nu basadoke babavuilide, 2babezaga na kabebe nunse, kubuno babezaga bekuigisia bantu, nu kusambala buno, iyukilo lia bakuzi lili mu Yesu. 3Babakatile nu bababikile mu kikando aba nu mu nindunindu: kubuno buabezaga buse muigolo. 4Tondo beingi ku babo bongule ku wozo musagu bakatizizie; nu maganzo ma bamulume makukile tununu tutano.

Bekuenda na Petelo nu Yoana ku Mulondo,

5Nu gabeide buse nindunindu, bakundamaninue mu Yelusalema, bangati nu bakulu, nu basanzi; 6nu Anasa sankoga munene, nu Kayafa, nu Yoana, nu Alesandelo, nu bansania babezaga ba kikanga kia sankoga munene. 7Nu gabababikile munkatini muabo, bababuzizie bune, Ku magala makizi, aba kuizina lia nazi, ku muakitile bubuno? 8Umpanga Petelo, eiyede na Muuza Wasililila, ababuide bune, Bangati ba bantu nu bakulu balsalele, 9ndi isue tuabuzibua lelo misagu za bubuno busoga buakitidue wono muntu musosu, aba ku lukita luonizibue; 10menyazi buno, inyue bansania, nu bantu bansania balsalele, buno muizina lia Yesu Klisto wa Nazaleta, wozo gumuatakile, wayukizie Kalaga ku bakuzi, kuizina lilino ukuemana mugimagima kumuli. 11Wono u ikozi limuasombile inyue bobaki, liabikilue ikozi inene lia kapindapinda. 12Nu takuli lonio mu ungo: kubuno takuli lingo izina kunsi kuigulu, liakasilue munkatini mua bantu, liatunganana konibua kulio.

Bekukanda Petelo nu Yoana.

13Nu gabamonine ku bupuka bua Petelo nu Yoana, nu bamenyine buno, beli anga bantu beteli na menge, tondo beli anga bikongolo, bangamine: nu babamenyine buno babezaga na Yesu. 14Nu gabamonine ku wozo muntu wonezibue, emana gamozi nabo, tababezaga na bua kubakula. 15Tondo gabasile kubembia buno batuke ku bangati, bakalile luango bune, 16Buni butukita bantu babano? kubuno bakitile kalolesio keligo, takabisama ku bantu bansania beli mu Yelusalema; aba tatunavuama kukatuna. 17Tondo bubuno bunavua kukuka ku bantu bansania, busoga ndi tuabeitia boba, buno batende na muntu kuizina lilino. 18Nu babamanine, nu babazugide nunse buno, tabatende, aba tabeigisie lingo kuizina lia Yesu. 19Tondo Petelo nu Yoana babakuide bune, Ndi buisanana ku Kalaga kumuanza kutinga kuanza Kalaga, sombolazi: 20kubuno isue tatunavuama kumenkela kutenda butuamonine kubo nu butungule kubo. 21Nubo, gababeitizie na boba lingo, babasigile, tabamenyine bubabasungia, ku kabamba ka bantu; kubuno bansania baganunaga Kalaga ku bubo buabede. 22Kubuno muntu wono wakitidue kalolesio kakano ka kona, abezaga esakuka miaka zatinga makumi manazi.

BaKlisto Beiyala na Muuza Wasililila.

23Gabakanduidue, bendile ku bantu babo, nu basambede bunsania bubabuidue na basankoga banene nu bakulu. 24Nubo, gabongule, basegile na mutima umozi, ku Kalaga, batendile bune, E, Mukota, wakitile meigulu nu kisi nu bitatenge, nu binsania bilimo; 25watendile na Muuza Wasililila ku kanua ka tateisue Davidi, mukambi wobe bune,

Kubuni baBilongo bekuikaka,

Nu bantu bakengela butakulungana?

26Bakota ba kisi bemene,

Nu bangati bakongene,

Gantata ga Mukota, nu gantata ga Klisto wage: #Luimbo 2:1, 2.

27kubuno buligo, Helode nu Pontio Pilato nu baBilongo nu bantu balsalele, bakundamene mu muino wono ku kabamba ka Mukambi wobe Wasililila, wono Yesu, uwabongezie makuta, 28buno bakite anga kuboko kuobe nu luango luwakalile kutukila wakalazi. 29Nu kano kaluma, Mukota, lola bubekutuitia boba, kasa bakambi bobe magala ma kusambala idagi liobe na luatu, 30lambia kuboko kuobe konia; nu tulolesio nu maganogano makitue kuizina lia Mukambi wobe Yesu Wasililila. 31Nu gabasilile kusega, gago gababezaga bakundamana gatengiletengile, bansania beiyede na Muuza Wasililila nu basambede musagu wa Kalaga na luatu.

Buakitaga Bakatizia.

32Nu kikanga kiabo bakatizizie babezaga na mutima umozi nu makengelo mamozi: takuabede umozi watendile buno, kinsania kieli nakio kili kiage wenyene; tondo babezaga bekubegana biabo binsania. 33Nu ku magala manene basingua balongekile buiyukilo lia Mukota Yesu: nu mponga nnene zakitile ku babo bansania. 34Kubuno takuabezaga wiyaninaga kubeli: kubuno bantu bansania babezaga na bibanza, aba numba, bazikunzisizie nu bavule na bukunza bua bibio biakunzagia; 35nu babibikile lisa na basingua nu biabeganizibue kubeli anga buiyaninaga muntu na muntu. 36Nu Yosefu, wamanagua na basingua Balanaba (buisulilua bualio, muana wa kubobelezia), muLewi, muntu wa kilongo kia Kupulio, 37abezaga neisoa, alikunzizie, avule na bikulo bialio ku basingua, nu babibikile gansi gasamba magulu mabo.

Currently Selected:

Misako 4: NTKI57

Highlight

Copy