Ibulu 10
10
1Tãi nɔ́ dɔ̂ŋ káa la a m̀ɛni lɛ́lɛɛ-ŋai pâi pâi díninîŋ, kɛ́lɛ, vé a m̀ɛni-ŋai kpîŋ a tɔ̃yâi, diai da lɛ̀ɣɛ Ɣâla kɔlɛi, vé pâi wɔ́lɔ dímaa waai a zâla tɔnɔi nyíi da gula a kóraŋ kéleei. 2Eêi kɛ̀ zâlai é ǹûai maa waa, dífêi kpera sâla kúlaa ma? Eêi kɛ̀ ŋ̀âla-fɛli-ƃelai maa a wɔ́lɔ waa tɔnɔ, dífêi díkili ŋá siai sɔnyɔ̂ŋ mɛni ma. 3Zâla kúlaa-ŋai ŋí su, dísɔnyɔ̂ŋ maa-mɛni è tòo díkili ŋá a kóraŋ kélee. 4Kpɛ́ni fêi, niŋa-ŋãa da ƃoli-ŋãa dífa pɔ̂ri wɔlɔ-wɔlɔ-sɔnyɔ̂ŋ kulâi núu ma.
5Nyíŋi mɛni ma, tãi Kôrai è pà la ŋ̀éniɛi sui, è mo, nyɛɛi,
“Ífe sâla-kúlaa da sama-sɛŋ wɛ̂li ní,
kɛ́lɛ, í kpono kpɛtɛ ḿɛni ma.
6Kéreŋ sama-sɛŋ da sɔnyɔ̂ŋ-sama sɛŋ-mɛni fé ílii laa ni.
7Nya ƃe ŋa mò, nyɛɛi, ‘Gáa, ŋá pá a gɛɛ ŋá ínîa-mɛnii kɛ́, Óo Ɣâla,’
yɛ̂ɛ berei bɔ̃yɛɛ̂i la gɔlɔi su é pîlaŋ ḿâi.”
8Tãi Kôrai è mò la ǹaa mɛi-pere, nyɛɛi, “Ífe zãa-ŋai ŋí wɛ̂li ní, kpaa máŋ dí kɛ́ a ínîa-mɛnii, sâla-kúlaa, sama-sɛŋ-tɛɛ, kéreŋ-sama sɛŋ-tɛɛ, da sɔnyɔ̂ŋ-sama sɛŋ-tɛɛ” da nyíi-ŋai kùla yɛ̂ɛ berei dɔ̂ŋ káa lai, 9nya ƃe è mò ŋɔ́nɔ, nyɛɛi, “Gáa, ŋá pá a gɛɛ ŋá ínîa-mɛnii kɛ́.” È duɛ-tûɛi kpera a gɛɛ é nɛɛ-pôlui kɔ́ɔ pîlaŋ. 10Ǹyaŋ kúmaa a waa nɔ́ zu tɔnɔ a Ɣâla nîa-mɛnii tí Zîsɛ Kôrai kponoi tɛɛ̂i sarâi.
11Sâla láa soŋ-nuu kélee a tɔ̂ɔ a ɣele kélee ŋɔtii-kɛɛi su, gɛ zâla tɔnɔi kúla a tãi kélee, nyíi va wɔ́lɔ sɔnyɔ̂ŋ waa núu mai. 12Kɛ́lɛ, tãi Kôrai è zâla tɔnɔi kùla la zu tɔnɔ sɔnyɔ̂ŋ kélee mɛni mai, è sèe Ɣâla láa-mii-yee mɛi 13a gɛɛ é maa-kpɛŋ kɛ́ é lɛ́ɛ la zu ŋɔkpɔara-ƃelai dí pú gɔ́ɔ mu. 14Kpɛ́ni fêi, ŋɔsâla tɔnɔi è kùlai, diai dímaa waai è dímaa waa nɔ́ zu tɔnɔ. 15Ǹyaŋ M̀ɔlêŋ Maa Waai máŋ a m̀aa-sere-faa kɛ̀ kúŋɛi. Kpɛ́ni fêi, ŋ̀óo-ŋai ŋí ƃoɔɔ mìi,
16“Gbanaŋ-wooi ká ŋí ŋa pâi gɛ̂i Eezuɛ-ŋai yêei
ŋele-ŋai tí pôlu mai, Nuu-namui ƃe mò tí,
ŋa pâi ŋátɔ̂ŋ-ŋai pûi dílii su,
ŋá dípɔ̃yɛ̂ díkili-ŋa.”
17A mò ŋɔ́nɔ, ǹyɛɛi,
“Ŋa pâi niâi dísɔnyɔ̂ŋ mâ da díŋwana-lɔ̂ɔi.”
18Ƃɛ́i su-mɛni-lɛɛ káa naa mɛni-ŋai ŋí mɛni mai, sama-sɛŋ tɛɛ-mɛni fé ŋɔ́nɔ naa sɔnyɔ̂ŋ mɛni mà.
Kwaa kú lɛ́ɣɛ a Ɣâla
19Mɛni ma, ŋánûa, tãi nɔ́ laa-la káa la kúyêei a gɛɛ kú lí Gwaa Maa Waai ma Zîsɛ ŋãai sarâi, 20da bere ninai da vúlu-laa ninai nyíi è ǹáa ƃo kúmɛni ma zeɣei sarâi, zu-kulai ƃa ŋɔkponoi sarâi, 21tãi nɔ́ ŋɔ́nɔ sâla láa soŋ-nuu kɛ́tɛ káa la kúyêei Ɣâla ŋɔpɛ́rɛi mɛi, 22kwaa lɛ́ɣɛ mà a tɔ̃yâ-lii laa-la láa fɛ́ɛ su da kúlii nyíi m̀aa waâi kúlaa kili-ŋa-sia nyɔ́mɔɔ su, é pɛ́lɛ kúkpono ma nyíi ŋ̀waâi a yá maa waai. 23Kwaa kúkili-kɛ-zui sóŋ a gbanaŋɔɔ nyíi kwa mòi, kúfe siɣe kútɔɔ̂i, kpɛ́ni fêi, ǹúui gono-teei kɛ̀i, zã́âi. 24É lɛ́ɛ kúkili ŋá berei kwa pɔ̂ri wɛli-kɛ-maa pui la kúkîe-ni kponôi da tíi lɛ́lɛɛ kɛɛi. 25Kúfe tãi siɣe kúkîe-ni kɔɣɛŋ mɛni ma, yɛ̂ɛ berei núu da-ni da tãi siɣe lai, kɛ́lɛ, kwaa kúkîe-ni fɔlɔ, kpɛ́ni fêi, ka Ŋelei tí kâai gɛ̀ lɛɣɛ.
Sɔnyɔ̂ŋ-kiriɛ maa-lia-woo
26Kpɛ́ni fêi, à kɛ̀ kwa gìri kwa sɔnyɔ̂ŋ kɛ̀ dɔ̃yâi maa-tarei sɔlɔ ƃoɔɔ kûɛ pôlu ma, gɛ̀ ní sâla kúlaa fé ŋɔ́nɔ naa kúsɔnyɔ̂ŋ mɛni mà. 27Kɛ́lɛ, fɛ̂ɛ mɛni ŋá-teɛɛ maa pɔlɔ-pɔlɔɔ da ŋɔŋ-soŋ kɛ́tɛ nyíi pâi Ɣâla ŋɔkpɔara-ƃelai kérenîi. 28Ǹúui a Mose ŋɔtɔ̂ŋ karâi, maa-nuui a sâa, dífa malôŋ kàa à kɛ̀ sere feerɛ kpaa saaƃa à fàa ma. 29Káfe gɔ́lɔŋ a gɛɛ ǹúui a Ɣâla Ǹóŋ kpɔ̀ara é gbanaŋ-woo-kɛɛi maa-ŋãai kara, nyíi maa waai, é tela Mɔlêŋ ŋumɛ nyíi a ƃɛlɛ-sêe tɛ̂ɛi, ŋɔtɔŋ-kpɛ́-maai kɛ́tɛ̂i é tɛ́ɛ nyíŋi ma? 30Kpɛ́ni fêi, kú ǹúui kɔ́lɔŋ m̀o, nyɛɛi, “Ńyãa ƃa tɔ̂ŋ kpɛ̀ núu ma. Ŋa pâi bɔɔ-teei kulâi.” È ŋɔ́nɔ mò, nyɛɛ, “Nuu-namui a pâi ŋɔnûai dímɛnii ŋá têei.” 31Gáa a mɛni maa pɔlɔ-pɔlɔɔ a gɛɛ Vulu-laa Ɣalai é tɔ̂ŋ kpɛ̀ núu ma.
32Kɛ́lɛ, ŋele pɔlɔ-ŋai dí lɛ́ɛ kákili ŋá gwaa-ponoɔi káa kâa pôlu ma, tãi ká kɔ̀ la kpɔ́ a gbanaŋɔɔ mɛni-soli-kaa sui. 33Tãi da, da ká tɔɔi bànaŋ ma dí ŋumɛ-tua kɛ́ a káa dí mɛni-kpɔ̂lu láa kâa. Tãi da diai da dua-tarei tí kɛ̀ a diai, ka kpɔ̂ŋ dîa ká dímɛni-kpɔ̂lui da siɣe. 34Kpɛ́ni fêi, maloŋ-kaa è kɛ̀ káyêei ǹuɛ-ŋai mɛni ma, ǹyaŋ ká káyee sèe mu a lii-nɛ̃ɛ a gɛɛ dí kákɔ̂liŋ kúla káyêei, kpɛ́ni fêi, ká kɛ̀ a gɔ́lɔŋɔɔ a gɛɛ kɔ̃liŋ lɛ́lɛɛ káa káyêei nyíi gáa nɔ́ naa wɔlɔ-wɔlɔ da wɔlɔ-wɔlɔi. 35Mɛni ma káfe kálaa-lai pîli, nyíi fela-féi kɛ́tɛ káa zui. 36Kpɛ́ni fêi, fɛ̂ɛ lii-kpele é kɛ́ káyêei a gɛɛ ka Ɣâla nia-mɛni kɛ́ ká ŋɔkono-teei sɔlɔ ƃo.
37“Nàa guro à gɛ̀ tí,
ǹúui nyíi gáa pâi, a pâi pâi a maa félaa, vé pâi tãi siɣêi.
38Kɛ́lɛ, ŋátɔ̃yâ-nuui a pâi ŋɔfúlu-laai kɛ̂i laa-la sarâi.
À kɛ̀ à pène pôlu,
gɛ̀ ní ńii fé pâi lâai.”
39Kɛ́lɛ, kúfe diai sama da pène pôlu a gɛɛ dísu é karai, kɛ́lɛ, kúkaa diai sama laa-la káa díyêei a gɛɛ dí dímɔlêŋ ƃáloi.
Currently Selected:
Ibulu 10: KWB
Highlight
Share
Copy
Want to have your highlights saved across all your devices? Sign up or sign in
