Ibulu 11
11
Laa-la
1Laa-la káa a zãâi nyii-ŋai dímaa kili-kɛ-zu káa kúyêei dímaa tɔ̃yâ. Kú gɔ́lɔŋ a gɛɛ zãâi kúfa díkàai dímaa mɛni káa a tɔ̃yâ. 2Kpɛ́ni fêi, laa-la sarâi ƃe Ɣâla è ǹyée sèe la ŋwɔlɔ-wɔlɔ-ƃelai mu. 3Laa-la sarâi ƃe kwa târe la zu a gɛɛ Ɣâla è ŋ̀éniɛi kpɛ̀tɛ a ŋ̀óo, ǹyaŋ zãâi kwa díkâai é díkpɛ̀tɛ a zãâi kúfa díkàai.
4Laa-la sarâi ƃe Ebɛɛ è sâla kùla la Ɣâla ma, nyíi kɛ̀ a ǹɛ́lɛɛ é tɛ́ɛ Kîŋ ŋɔi mai. Zâlai ŋí sarâi Ɣâla è Ebɛɛ lɛ̀ a tɔ̃yâ-nuu. Ɣâla è nyíŋi maa-sere-faa kɛ̀ a ǹyée seɛɛ Ebɛɛ ŋɔsama-sɛŋ mu. Ebɛɛ è sàa, kɛ́lɛ, ŋɔlaa-lai sarâi gáa niî lônoi. 5Laa-la sarâi Ɣâla è Inɔsi sìɣe é tɛ́ la Ɣâla-taa a gɛɛ vé saa, ǹyaŋ dífe gáa ni, kpɛ́ni fêi, Ɣâla è zìɣe. Ǹyaŋ Ɣâla é lɛ́ɛ pâi ziɣêi maa-mɛni è kɛ̀ a bɔ̃yɛɛ a gɛɛ è Ɣâla líi laa. 6Núu fa pɔ̂ri Ɣâla líi lâai laa-la ŋ́ɛi pôlu. Kpɛ́ni fêi, ǹúui ŋ̀wɛ̂lii é lɛ́ɣɛ Ɣâla kɔlɛi, fɛ̂ɛ é láa la a gɛɛ Ɣâla káa ɣele ma a gɛɛ é diai líi laa da gɔ̀rii. 7Laa-la sarâi Nôa, nyíi mɛni-ŋai kɛ̀ pâi kɛ̂i Ɣâla è maa-mɛni tòo gíli ŋái, è ŋ̀óli tɔ̀ɔ mà é yá-ŋa-keleŋ kpɛtɛ a gɛɛ é ŋɔpɛ́rɛ-mu-ƃelai ƃálo. Ǹaa-la kɛ́ɛ ŋí sarâi Nôa è tɔ̂ŋ pù ŋ̀éniɛi ma, é kɛ́ a dɔ̃yâ-laai sɔlɔ-ƃo-nuu nyíi a pâ laa-la sarâi.
8Laa-la sarâi Eberaɣɛ̃ɛ è Ɣâla wóo mɛni tãi Ɣâla è dòli la a gɛɛ é lí kwaa da ma ƃɛi è kɛ̀ pâi nàa sɔlɔ ƃôi ǹyêei, ǹyaŋ è kùla bɔ̀ taai é lí. Kɛ́lɛ, vé kɛ́ ní a ƃɛ́i kɔ́lɔŋɔɔ è kɛ̀ liî naai. 9Laa-la sarâi Eberaɣɛ̃ɛ è kɛ̀ gono-tee-lɔii ma yɛ̂ɛ núu a li ŋɔ̃yâ-lɔii ma. È kɛ̀ sua-kɔlɔ seɣe-pɛrɛ mu yɛ̂ɛ berei Aise da Zeeka máŋ dí gɛ̀ lai, da dîa-ni dí gono-tee tɔnɔi sɔlɔ ƃô. 10Kpɛ́ni fêi, è kɛ̀ daa-leei perêi kâai nyíi gɔ́ɔ-pîlanii è kɛ̀ mai, nyíi dɔɔ-nuu da gbɛtɛ-nuu káa a Ɣâlai. 11Laa-la sarâi Seera ǹyaa kpîŋ è wala-wala sɔlɔ ƃô a gɛɛ é koo siɣe, berei máŋ è kɛ̀ la a núu pɔlɔi, kpɛ́ni fêi, è Ɣâla kàa a núu sã́a nyíi góno tèe ǹyêei. 12Mɛni ma surɔ̂ŋ tɔnɔ è nyíi kɛ̀ a bɔlɔɔ kpɔ́ a kɛ́ pâi saâi, núu-suu é kùla gbonôi nyíi zu-ƃelai dí kɛ̀ a dítamaa kpɔ́ yɛ̂ɛ bɛmɛlɛŋ-kao-ŋai díkaa ŋ̀elei sui da ŋãyaai gáa yúo ma nyíi núu fa pɔ̂ri ǹónôi.
13Nyii-ŋai kélee dí sàa laa-la su, dífe gono-tee-sɛŋ sɔlɔ ƃo ní, kɛ́lɛ, dí kɛ̀ gono-tee sɛŋ perêi kâai a lii-nɛ̃ɛ kwaa kôyaa ma, dí fáa ma a gɛɛ dí kɛ́ a ŋɔ̃yâ-ŋa ǹɔii ŋí ma nyíi-ŋai dí kùla dípɔ-taai. 14Kpɛ́ni fêi, diai da ǹóno sii tí kɛ̂i da gɛ̀ a zu ponoɔ a gɛɛ díkaa lɔii kɔ́rîi a gɛɛ é kɛ́ a dípɔ-taai. 15Eêi kɛ̀ dîi kɛ̀ díkili ŋá siâi gɛ pîlaŋ ǹɔii tí ma nyíi dí kùla zu dí lii, dîi pɔ̂ri tãi kâai dí lene pôlu. 16Kɛ́lɛ, yɛ̂ɛ berei gáa lai, da ŋ̀wɛ̂lii dí lɔii lɛ́lɛɛ sɔlɔ ƃó, ǹyaa ƃa Ɣâla-taa ŋɔ̂i. Mɛni ma ŋumɛ fé Ɣâla ŋ́ɛi a gɛɛ dí dóli a Díɣâla, kpɛ́ni fêi, a taa-lee su kpɛtɛ dímɛni ma.
17Laa-la sarâi, ƃe Ɣâla è Eberaɣɛ̃ɛ su kɔ̀ɔŋ la a gɛ́ɛ é Aise kùla a sâla. Ǹúui nyíi gono-teei sɔlɔ ƃôi, è gbîŋ kpɛ̀tɛ a gɛ́ɛ é gbîŋ loŋ kúla a sâla, 18nyíi dímaa-mɛni ƃò, díyɛɛi, “Da pâi ísuu láa seêi Aise sarâi.” 19È làa la a gɛɛ pɔ̂ri káa Ɣâla mì é núu mu siɣe máŋ saa yêei. M̀ɛni mà, kwa pɔ̂ri m̀ôi kûɛ è zɔlɔ ƃô ŋɔ́nɔ pôlu. 20Laa-la sarâi Aise è lûwa làa Zeeka ma da Isɔɔ tínaa tuɛ-pere mɛni ma. 21Laa-la sarâi tãi Zeeka è kɛ̀ pâi saâi lai, è lûwa làa Zosɛ ǹônii kélee dîa tɛi-tɛi ǹɛ̂ɣɛɛŋ pîlaŋɔɔ ŋɔsia-wurui ŋûa gɛ Ɣâla fɛ̀lii. 22Laa-la sarâi, tãi Zosɛ ŋɔfúlu-laai kpɛɛ-ŋá tãi è sèri lai, è mɛni da ƃò é pîlaŋ tãi ma Eezuɛ-ŋai dí kɛ̀ kulâi la Ize-lɔii sui, é téla gbîŋ-saa loo-pere lɛ́.
23Laa-la sarâi, tãi dí Mose maa sɔlɔ ƃô lai, ŋɔnûa dí ǹoo a ɣáloŋ saaƃa, kpɛ́ni fêi, dí gàa a gɛɛ è kɛ̀ a kwatara lɛ́lɛɛ. Dífe kɛ́ ní yaôi gâloŋ ŋɔtɔ̂ŋ ma. 24Laa-la sarâi, tãi Mose è ƃɔ̀lɔ lai, vé faa ní m̀a a gɛɛ dí dóli a Ize kaloŋ ǹóŋ-nɛnii ǹóŋ. 25È fàa mu a gɛɛ da Ɣâla ŋɔnûai dí mɛni-soli káa é tɛ́ɛ la ǹîa kɛ́ɛ ma a sɔnyɔ̂ŋ lii-nɛ̃ɛ nyíi pâi tɛɛ̂i. 26È làa la a gɛɛ mɛni solii è gàa Kôrai mɛni mai, é kɛ̀ a tɔɔ-sɛŋ kɛ́tɛ é tɛ́ɛ la Ize tɔɔ-sãai dîa, kpɛ́ni fêi, ŋ̀ɛi è kɛ̀ vela-féi perêi. 27Laa-la sarâi è kùla Ize, vé yao ní gâloŋ ŋɔlii-ŋwanai mâ. Kpɛ́ni fêi, è kɛ̀ yɛ̂ɛ ǹyaa ƃe è ǹúui kàa nyíi núu fa gàai. 28Laa-la sarâi è dɛɛ-mɛi-kuui lâai kɛ̀ é m̀ála-ŋãai kpɛ̀mɛŋ a gɛɛ nîa-pɛlɛɛ maa-ŋuŋ su-kara-nuui fé lɛ̀ɣɛ dîa.
29Laa-la sarâi ǹûai dí Ǹyúo kpɔ̂lui tiyeŋ yɛ̂ɛ nàa à kɛ̀ lɔii kpala mà. Kɛ́lɛ, Ize-ƃelai, nyíi-ŋai kɔ̀ a gɛɛ dí m̀ɛni tɔnɔi tí kɛ́i, dí lɛ̀ɛ ǹyái su. 30Laa-la sarâi ziɣãŋ kɛ̀ a dínaŋɔɔ Zɛleko mai, maa tinaŋɔɔ ǹûai diɛ a fólo lɔ́ɔlu mɛi féerɛi, è wòlo. 31Laa-la sarâi Leea nyíi gbîŋ tɛ̀ɛ sinâa pɔ sɛŋ-kao mɛni mai, da diai dífe Ɣâla wóo mɛni ni dífe saa ni gîe ma, kpɛ́ni fêi, diai dí dítɛ̀ɛ a gɛɛ dí li Zɛleko kâai, è ǹyée sèe dímu a wɛli-kɛ-maa pere.
32Le ƃe ŋɔ́nɔ ŋa pɔ̂ri m̀ôi naa pôlu ma? Kpɛ́ni fêi, tãi fé pâi kɛ̂i naa a gɛɛ ŋa lono é pîlaŋ Gidiɔŋ ma, Bara, Saŋsiŋ, Zɛfita, Deeƃé da Samia é pɛ́lɛ Ɣâla ŋɔlóno-kɛ-ƃelai dîa. 33Laa-la sarâi ǹûai ŋí dí lɔii-ŋuŋ ŋa yée kùla, dí pá a tenîŋ-ƃo-mɛni, dí kono-tee támaa sɔlɔ ƃo, dí yala-sulu-ŋa lá tɛ́. 34Dí ŋɔŋ-soŋ kɛ́tɛ liɣiiŋ, dí kúla ƃóa-sɔkpɔ ŋá, vii-kpɛɛ-ƃelai kponôi é kpanaŋ, dí kɛ́ a kɔ́-kɔ-ƃela lɛ́lɛɛ-ŋa, dí lɔii da kpɛni su kɔ-kɔ-ƃela kɛ́ dí pú. 35Nɛyâai dí dísaa-ƃelai sɔlɔ ƃô mu-siɣe saa-yêei sarâi. Dí ǹúui da-ni lòkwa dípaa mɛni ma, nyíi-ŋai dífe díyee see ni mu a gɛɛ dí ŋuŋ-maa-ƃo sɔlɔ ƃo a gɛɛ dí dímu siɣe ŋɔ́nɔ fúlu-laa lɛ́lɛɛ sui. 36Dí ɣɛ́lɛ-maa kùla núu da-ni kponôi dí dílokwa dí yɔlɔ pú dîa máŋ dí dípili kpini-pɛrɛ mu. 37Dí dísɔ̂ɔ a kɔni dí díƃela-ƃela gîei feerɛ dí dísu kɔɔ̀ŋ dí dípaa a ƃóa-sɔkpɔ. Da-ni dí kɛ̀ sia-siai ƃála-kɔlɔ su da ƃoli-kɔlɔ, da-ni dí díkɔ̃liŋ kélee láŋ. Da-ni dí mɛni-kpɔ̂lu kàa, dí ŋwana-lɔ̂ɔ-tua kɛ́ a da-ni. 38Ŋ̀eniɛi maa fé kɛ́ ni a nɛ̃ɛ ǹûai ŋí mɛni ma. Dí kɛ̀ nɔ́ díkɔɔ ŋá fɛ̃ɛ-kpalaŋ-ŋa su gɔni-wolo-ŋai sú da ǹóa-ŋa sú ǹɔii ḿu.
39Ǹûai ŋí kélee, berei máŋ Ɣâla è ǹyée sèe la dímu dílaa-lai sarâi, dífe gono-tee-sɛŋ sɔlɔ ƃo ni. 40Kpɛ́ni fêi, Ɣâla è mɛni lɛ́lɛɛ kàa nàa tuɛ kúmɛni ma a gɛɛ kwa dîa-ni kú kɛ́ a maa-waa-ƃela gîe ma.
Currently Selected:
Ibulu 11: KWB
Highlight
Share
Copy
Want to have your highlights saved across all your devices? Sign up or sign in
