Ibulu 9
9
Ŋ̀éniɛi su da Ɣâla-taa Ɣâla fɛ̀liɛɛ
1Tɔ̂ŋ-ŋa máŋ dí kɛ̀ gbanaŋ-woo-kɛɛi maa-ŋuŋ su Ɣâla-fɛli mɛni ma, kwaa maa waa kɛ́ ƃo mɛni ma ŋ̀éniɛi su. 2Ɣâla ŋɔsua-kɔlɔ-seɣe pɛrɛi è kɛ̀ a gbɛ́tɛɛ a berei sii ŋí. Loŋpoi maa-ŋuŋ nyíi laŋpo-see-wurui è kɛ̀ zui da teƃelei, é pɛ́lɛ Nɛ-kpoloi mai, da kâa dòli a Gwaa Maa Waai. 3Loŋpoi-la-seɣei veerɛi pôlu loŋpoi su-pere ŋɔi káa naa da dòli a Gwaa Maa Waai Ŋɔkwaa Maa Waai. 4Loŋpoi ŋí su Ŋ̀âla-teƃelei káa naa nyíi gbɛtɛɛ̂i a gôo sâla-sɛŋ kúŋ nɛ̃ɛ kéreŋ mɛni ma, da gbanaŋ-woo-kɛɛi maa-gãlai, nyíi mɛi pɛlɛɛ̂i kpɔ́ gwaa kélee a gôoi. Gãlai ŋí su gôo-sane è kɛ̀ naa nyíi manaa da Eelɔŋ ŋɔsia-wuruii nyíi pɔmuŋ, é pɛ́lɛ gɔni-ƃelai ma nyíi gbanaŋ-woo-kɛɛi è kɛ̀ a bɔ̃yɛɛ mai. 5Gãlai mɛi-pere goôŋ-sãa dí kɛ̀ naa, nyii-ŋai kɛ̂ a Ɣâla ŋɔŋɛ́i-kɛ-maa, díkɛ fólo. Díkoôŋ è gãlai mɛi-pere mɛi pɛlɛ. Ǹyaŋ kúfa pɔ̂ri mɛni támaa ƃoi é pîlaŋ nâa mɛni-ŋai ŋí dîa.
6Mɛni-ŋai ŋí kélee da kpɛtɛ, zâla láa soŋ-ƃelai da lî loŋpoi maa-ŋuŋ su a tãi kélee, díkɛ dísâla-kula tii-ŋai kɛ̀ naa. 7Kɛ́lɛ, loŋpoi zu-pere ŋɔi su, zâla láa soŋ-nuu kɛ́tɛi nɔ́ ƃa lî naa. A lî nɔ́ naa tɔnɔ kóraŋ tɔnɔ su. Va lî naa kpɛ́ni-kpɛni, fɛ̂ɛ é lí a ŋãa, nyíi a gula a sâla gbîŋ mɛni ma da ǹûai dísɔnyɔ̂ŋ. 8M̀ɔlêŋ Maa Waai a ǹɛ bere sii ŋí su a gɛɛ gwaa maa waai maa-perei lá fé niî ƃo nɔ́ tãi nɔ́ loŋpoi maa-ŋuŋ káa niî tɔɔni lai 9nyíi gáa a tãi ŋí maa-pɔkɔɔŋ. Mɛni-kpɛtɛ-perei ŋí su da sama-sãa tɛ̀ɛ dí sâla-ŋa kula nyíi-ŋai dífa pɔ̂ri Ŋ̀âla-fɛli-nuui ŋɔkili-ŋa-siai kɛ̂i a maa waai. 10Kɛ́lɛ, díkaa nɔ́ mii-sɛŋ mɛni ma, kpele-sɛŋ, da núu-waa-pere sii da kpɛni-ŋa, é pɛ́lɛ núu kpono ŋɔtɔ̂ŋ-ŋai dîa nyíi-ŋai da bù ǹûai dîa é lɛ́ɛ la zu mɛni maa-faleŋ tãi é seri.
11Kɛ́lɛ, Kôrai è pà yɛ̂ɛ sâla láa soŋ-nuu kɛ́tɛ mɛni lɛ́lɛɛ-ŋai pâi mɛni ma. Ǹúui nyíi gɛ́tɛ̂i a ŋ̀ánaa maa waai nyíi dífe gbɛtɛ ní a díyêei, zu-kulai ƃa vé a ŋ̀éniɛi ŋí su sɛŋ. 12Zarâi ƃe é lɔ̀ naa Gwaa Maa Waai su nɔ́ a tãi tɔnɔ. Vé lɔ́ ní naa a ƃoli-ŋãa, kpaa máŋ niŋa-loŋ ŋãa. Kɛ́lɛ, è lɔ̀ naa a gbɔɔi-ŋãa a gɛɛ é kúŋuŋ-mâ ƃô wɔlɔ-wɔlɔ da wɔlɔ-wɔlɔ. 13À kɛ̀ ƃoli-ŋãa da niŋa-sirɛ-ŋãa da niŋa-loŋ kɛ́ɛ dí géreŋ dí ǹúu kpɛ́mɛŋ diai dîa dímaa fé waa nii, da pɔ̂ri díkponôi maa waai, 14Kôrai, nyíi maa waai è gbîŋ tɛ̀ɛ Ɣâla pɔ Ŋwɔlɔ-wɔlɔ Mɔlêŋ sarâi, ŋɔŋãai a pâi kálii maa waai a ǹɛ́lɛɛ é tée nyíti ma é kákula kátûa-pere nyɔŋ pɔlɔ-ŋai sú a gɛɛ ka tíi kɛ́ Gɛ-ɣele-ma Ɣâlai mi.
15Mɛni ma, gáa a gbanaŋ-woo-kɛɛ ninai tɛɛ-nuu, a gɛɛ diai a dítôlii, dí ŋwɔlɔ-wɔlɔ pɔɔ-sɛŋ sɔlɔ ƃó nyíi Ɣâla è góno tèe la díyêei. Kpɛ́ni fêi, saa-mɛni a pá nyíi a díkula dísɔnyɔ̂ŋ-ŋai su nyíi kɛ̀ gbanaŋ-woo-kɛɛi maa-ŋuŋ mui. 16Bɛ́i nuu-kɔ̃liŋ lɛɛ-yeei kɛ́-kɔlɔ-mɛni káa naai, fɛ̂ɛ dí maa-nuui saa-mɛni maa kpɛ́ɛ a ǹɛ́lɛɛ. 17Kpɛ́ni fêi, ǹúui a gɔ̃liŋ-lɛɛ-yeei kɛ-kɔlɔ kpɛtɛi, zaa pôlu ma nɔ ƃe da tíi kɛ̀ la a maa-kɔlɔi ti, kɛ́lɛ, tãi gáa niî la ɣele mai, dífa tíi kɛ̀ la. 18Mɛni ma Ɣâla fé gbanaŋ-woo-kɛɛ maa-ŋuŋ kɛ́ ní máŋ ŋãa ŋɛ́i pôlu. 19Kpɛ́ni fêi, tãi Mose è kɛ̀ dɔ̂ŋ kélee lɛ̂ la ǹûai kélee dîai, è niŋa loŋ ŋãa siɣe da ƃoli-ŋãa é yá pu zu é sua-leɣa kpɔ̂lu siɣe da kpalo é ǹiŋa-loŋ-ŋãai da moli-ŋãai kpɛ́mɛŋ gɔlɔi kpîŋ ma da ǹûai kélee, 20nyɛɛi, “Gbanaŋ-woo-kɛɛi maa-ŋãai ká ŋí nyíi Ɣâla è dɛ̀ɛ kápɔ̂i.” 21Bere sii tɔnɔi tí sú nɔ́ ƃe è ǹiŋa loŋ-ŋãai da moli-ŋãai kpɛ́mɛŋ la Ɣâla ŋɔpɛ́rɛi lá da ŋ̀âla-fɛli sɛŋ-folo-ŋai kélee dí kɛ̀ mui. 22Tɔ̃yâ ma, dɔ̂ŋ yée mu sɛŋ kélee maa waai a ŋãa, ǹyaŋ sɔnyɔ̂ŋ su-mɛni-lɛɛ fé naa ŋãa puɔɔ ŋ́ɛi pôlu.
Kôrai ŋɔsâlai è sɔnyɔ̂ŋ kpera
23Maa nɛɛ̂i kɛ̀, fɛ̂ɛ ŋ̀âla-taa mɛni-ŋai dípɔkɔɔŋ-ŋai dí kɛ́ a dímaa waa a zâla-kula tii-ŋai ŋí, kɛ́lɛ, ŋ̀âla-taa mɛni-ŋai dia kpîŋ, fɛ̂ɛ dí kɛ́ a dímaa waa a sâla lɛ́lɛɛ-ŋa é tɛ́ɛ nyíi-ŋai día. 24Kpɛ́ni fêi, Kôrai fé lì ní gwaa maa waai ma nyíi dí gbɛtɛ a díyêei, nyíi gáa a dɔ̃yâ-kwaa maa waai ŋɔpɔkɔɔŋ, kɛ́lɛ, è lì Ɣâla-taa kpîŋ a gɛɛ é nâa kùla é tɔ́ɔ Ɣâla ŋ́ɛi kúmɛni ma. 25Vé lì ní Ɣâla-taa a gɛɛ é gbîŋ tɛ̀ɛ a tãi támaa, yɛ̂ɛ berei zâla láa soŋ-nuu kɛ́tɛi è lɔ̀ la Gwaa Maa Waai ma a kóraŋ kélee a ŋãa nyíi vé kɛ́ ní a gbîŋ ŋãai. 26Eêi kɛ̀ tí, gɛ̀ ní Kôrai eêi pɔ̂ri mɛni-soli kâai a tãi támaa é síɣe ŋ̀éniɛi kɔ́ɔ pîlaŋ tãi ma. Kɛ́lɛ, berei gáa lai, è pà nɔ́ zu tɔnɔ a gbanaŋ-woo-kɛɛ pɔlɔi maa-ɣeniɛi kpɛɛ ŋá a gɛɛ é sɔnyɔ̂ŋ kpera a gbîŋ kúlaa a sâla. 27Ǹyaŋ berei nɔ́ ǹɛ́lɛɛi la a gɛɛ fɛ̂ɛ núu-kpune é sáa zu tɔnɔ, nâa pôlu ma mɛni ŋa-teɛɛ é pâi, 28bere nɔ ƃe Kôrai nyíi gbîŋ tɛ́ɛ nɔ́ zu tɔnɔ a gɛɛ é núu támaa dísɔnyɔ̂ŋ siɣei, a pâi pâi la a tãi veerɛi. Vé pâi sɔnyɔ̂ŋ mɛni ma, kɛ́lɛ, a pâi diai ƃálôi díkaa m̀aa kpɛnii kpɔ́ a gbanaŋɔɔi.
Currently Selected:
Ibulu 9: KWB
Highlight
Share
Copy
Want to have your highlights saved across all your devices? Sign up or sign in
