Ifisiɛŋ 5

Ka sia yɛ̂ɛ kwaa-ponoɔ su-nia-pɛlɛɛ

1Mɛni ma ka kɛ́ a Ɣâla-pɔkɔɔŋ-ƃela yɛ̂ɛ wɛli-kɛ-maa nîa-pɛlɛɛ, 2ka sia wɛli-kɛ-maa su yɛ̂ɛ berei Kôrai máŋ è kúwɛli la é gbîŋ tɛɛ kúmɛni ma yɛ̂ɛ kereŋ-sɛŋ kúŋ nɛ̃ɛ da sâla kúlaa Ɣâla ma.

3Kɛ́lɛ, núu fé wulu-wulu kɛ́ɛ da mɛni maa liƃiɛ kélee, kpaa máŋ sɛŋ maa-lii teɛɛ láa tòli kásama. Ɣâla-ƃela dífa nyíi-ŋai ŋí kɛ̀. 4Lono maa liƃiɛ, ƃoo-lono, da ŋumɛ-lono fè kɛ̀ kásama, nyíi-ŋai dífe lɛlɛ níi. Kɛ́lɛ, sɛɣɛi-fei é kɛ́ káyêei. 5Ka láa la a gɛ́ɛ goyaŋ-wulu-wulu kɛ-nuu, kpaa máŋ núu maa liƃiɛ, kpaa máŋ sɛŋ maa-lii-tee-nuu (nyíi gáa a ɣâla da kpɛni fɛliɛɛi), va Ɣâla da Kôrai díkâloŋ-laai su-sãai da sɔlɔ ƃo. 6Núu da fé kápɛlɛ a wóo folo-ŋa. Kpɛ́ni fêi, nyíŋi-ŋai ƃe da pâ a Ɣâla ŋɔlii-ŋwanai nîa-pɛlɛɛi dîa dífa ŋ̀óo mɛ̀nii. 7Mɛni ma ka dîa-ni káfe nɛ̃ɛ, 8kpɛ́ni fêi, ká kɛ̀ a kpini a tãi da, kɛ́lɛ, kákaa nâa a kwaa-ponoɔ Kúnuu-namui kponôi. Ka sia yɛ̂ɛ kwaa-ponoɔɔ su-nia-pɛlɛɛ. 9Kpɛ́ni fêi, kwaa-ponoɔɔ ŋɔƃa káa mɛni lɛ́lɛɛ kélee su, da mɛni sã́a, é pɛ́lɛɛ tɔ̃yâ ma. 10Ka kɔ́ ká m̀ɛnii maa kɔri nyíi a Kúnuu-namui líi làai. 11Káfe gbínii ŋɔtíi-ŋai da kɛ̀, nyíi-ŋai dífa ƃâi, kɛ́lɛ, ka pá a maa-tii-ŋai ti fíeŋ ŋá. 12Kpɛ́ni fêi, gáa máŋ a ŋumɛ-mɛni a gɛ́ɛ núu é lóno é pîlaŋ mɛni-ŋai dîa da gɛ̀ loo-pere sui. 13Kɛ́lɛ, sɛŋ nyíi kélee fíeŋ a nɛ̀i núu a gàa, kpɛ́ni fêi, sɛŋ kélee nyíi núu a gàai, gáa fíeŋ ŋá. 14Mɛni ma m̀ôɔi,

“Óo nyíi-nuu, íŋɛi lá ƃo í kúla saa yêei,

Kôrai a pâi kwaa-ponoɔɔ tɛɛ̂i ípɔ.”

15Mɛni ma ka kásia-pere maa kpɛɛ a ǹɛ́lɛɛ. Káfe sia yɛ̂ɛ ƃoo-ƃela, kɛ́lɛ, ka sia yɛ̂ɛ táre-ƃela. 16Tãi gáa káyêeii ka tíi kɛ́ la a gbanaŋɔɔ. Kpɛ́ni fêi, ŋele-ŋai díkaa a sɔnyɔ̂ŋ-ɣele-ŋa. 17Maa-mɛni ma káfe ƃoo. Kɛ́lɛ, ka táre Kúnuu-namui ńîa-mɛnii su. 18Ŋwãai fé kákɛ̀, nyíi gáa a gɛ́-ɣeniɛ ŋuŋ fuloŋɔɔi. Kɛ́lɛ, kálaa é fɛ́ɛ a M̀ɔlêŋ. 19Ka lóno kákîe-ni pɔ wule-woo-ŋa su da Ɣâla-wule-ŋa, kakɛ wule too kakɛ pêle kɛ̀ Kúnuu-namui ma a kálii kélee. 20Ka sɛɣɛi-fei tɛɛ Kúnâŋ Ɣâla pɔ a tãi kélee sɛŋ kélee mɛni ma Kúnuu-namui Zîsɛ Kôrai láai su.

Ka kɛ́ kákîe-ni mu

21Ka kɛ́ kákîe-ni mu Kôrai ŋɔyao-maai su. 22Nɛyâa, ka kɛ́ kásinâai mu, yɛ̂ɛ berei kákaa la Kúnuu-namui mui. 23Kpɛ́ni fêi, surɔ̂ŋ ƃe gáa a ŋɔnɛnîi tuɛ-nuu, yɛ̂ɛ berei Kôrai káa la a Kôrai-toli-kpɔŋ ŋuŋ, gbono kɛ́ ƃo a Kôrai-toli-kpɔŋ. Kôrai ǹyaa kpîŋ káa a Kôrai-toli-kpɔŋ ƃálo-nuu. 24Berei Kôrai-toli-kpɔŋ káa la Kôrai mui, tɔɔ ǹɛyâai máŋ dí kɛ́ ti dísinâai mu mɛni kélee su. 25Sinâa, ka kánɛyâai wɛ́li yɛ̂ɛ berei Kôrai è Kôrai-toli-kpɔŋ wɛ́li la é gbîŋ tɛɛ mɛni ma, 26a gɛ́ɛ é m̀aa waai. È m̀aa wâa a yá da ŋ̀óoi, 27a gɛ́ɛ é Kôrai-toli-kpɔŋ siɣe a ǹáa fɛɛ a fólo-laa, nyíi pɔ́ɔ fé mà, kpaa máŋ milîŋ, kpaa máŋ sɛŋ kélee yɛ̂ɛ nyiti-ŋai, a gɛ́ɛ é kɛ́ a maa waa, kpɔlɔ̂ŋ fé kɛ̀ ma. 28Bere ƃe máŋ fɛ̂ɛ sinâa dí dínɛyâai wɛli la yɛ̂ɛ díkpono kpîŋ. Ǹúui nyíi ŋɔnɛnîi wɛli níi, è gbîŋ wɛli ni. 29Kpɛ́ni fêi, núu fa gbîŋ kponoi kpɔara, kɛ́lɛ, a ŋá kɔ̀ŋ é mɛi káa, yɛ̂ɛ berei Kôrai a gɛ̀ la a Kôrai-toli-kpɔŋ, 30kpɛ́ni fêi, kúkaa a gbonoi woŋo-ŋa. 31“Sâpoi ŋí ma, surɔ̂ŋ a ǹâŋ lɛ̀ɛ da ǹee é kánaŋ ŋɔnɛnîi ma, dífeerɛ dí kɛ́ tɔnɔ.” 32Nyíŋi ŋá káa la walai, kɛ́lɛ, ŋa lônoi é pîlaŋ Kôrai ma da Kôrai-toli-kpɔŋ. 33Kɛ́lɛ, kákelee ka kánɛyâai wɛli tɔnɔ́-tɔnɔ́ yɛ̂ɛ kákpîŋ. Fɛ̂ɛ ǹyaŋ ǹɛyâai dí gáa a gɛ́ɛ dí ƃaa kɛ́-maa tɛɛ dísinâai pɔ.

Currently Selected:

Ifisiɛŋ 5: KWB

Highlight

Copy