Ifisiɛŋ 4

M̀ɔlêŋ ŋɔkɛ-zu-tɔnɔɔi

1Mɛni ma ńyãai ŋ́gaa a kpini-pɛrɛ mu Kúnuu-namui mɛni mai, ŋá m̀ó kâa a gbanaŋɔɔ a gɛ́ɛ kátûa-perei é kɛ́ a maa nɛ̃ɛ dòlii mɛni ma Ɣâla è gɛ̀ a káai, 2da maa-yeŋ-pere, ƃɛlɛ-laa, é pɛ́lɛ lii-kpele ma, a gɛ́ɛ ká kálii kpele kákîe-ni yêei wɛli-kɛ-maa su. 3Ka kɔ́ ká M̀ɔlêŋ ŋɔkɛ-zu-tɔnɔɔi kɛ́ nii-seei su nyíi a nûa kɛ̀ zu tɔnɔɔi. 4Kpono tɔnɔ nɔ́ ƃe naa da M̀ɔlêŋ tɔnɔ, yɛ̂ɛ berei máŋ dí kátòli la kili-kɛ-zu tɔnɔ su kátoli-wooi sui. 5Nuu-namu tɔnɔ nɔ́ ƃe naa, laa-la tɔnɔ, batâi tɔnɔ, 6da Ɣâla tɔnɔ nyíi gáa a kúkelee Kúnâŋ, nyíi gáa kúkelee kúmɛi, gɛ tíi kɛ̀ kúkelee kúkponôi, gɛ ƃo ŋɔ́nɔ kúkelee kúkponôi. 7Kôrai a ŋɔƃɛlɛ-sêe kɛ́tɛi da tɛɛ kúpɔ tɛi-tɛi. 8Mɛni ma m̀ôɔi,

“Tãi è tɛ̀ la ŋ̀elei sui, è kɔ-soŋ támaa ŋuŋ ma ƃo,

é sama-sɛŋ tɛɛ núu-kpune pɔ.”

9Kwà mò kûɛ, “È tɛ̀ ŋ̀elei su,” zu-kulâi ƃa a yeŋ máŋ ǹɔii mu-pere. 10Ǹúui nyíi yèŋ ǹyaa ƃa ǹúui máŋ tɛ̀ ŋ̀elei su póŋ-póŋ, a gɛ́ɛ é sɛŋ kélee láa fɛɛi. 11È núu da-ni tɛ̀ɛ kúpɔ a gɛ́ɛ dí kɛ́ a sia-ƃela, da-ni a Ɣâla ŋɔlóno kɛ́-ƃela, da-ni a Ɣâla-woo taa-taa-ƃela, da-ni a pasɛ-ŋa, da-ni dí ƃo a sɛŋ-lɛ-ƃela, 12a gɛ́ɛ Ɣâla ŋɔnûai dí kɛ́ a díkpɛtɛɛ ŋɔtíi mɛni ma, a gɛ́ɛ Kôrai kponoi é tɔ́ɔ, 13é lɛ́ɛ la zu kúkelee kúlaa-lai é kɛ́ tɔnɔ da Ɣâla Ǹóŋ maa-tarei, a gɛ́ɛ kú ƃɔlɔ kúmɔlêŋ kponôi kú kɛ́ yɛ̂ɛ Kôrai. 14Gɛ̀ ní kúfe ŋɔ́nɔ pâi kɛ̂i yɛ̂ɛ nîa-pɛlɛɛ. Sɛŋ-lɛɛ nina kélee maa-fãai fé pâi kulâi ƃɛ-pere kpaa manaa-pere, kpaa máŋ é kútinâŋ-tinaŋ. Zɛŋ-lɛɛ ninai ŋí a kûla nûa díwôya-pere su, dítare-kiri, da dínuu-pɛlɛ lɛ̂ɛ-ŋai. 15Kúfe ǹɛɛ naa nyíŋi-ŋai ŋí dí kɛ́ a kúa, kɛ́lɛ, fɛ̂ɛ kú dɔ̃yâi ƃo wɛli-kɛ-maa su, kú ƃɔlɔ a pere sii kélee Kôrai kponôi nyíi gáa a kúŋuŋ tuɛ-nuui. 16Kúkponôi kélee puɔɔ̂i gîe ma, ŋoŋo-ŋai kélee díkaa mɛni mai díɣiriɛ ma, Kôrai sarâi. Tãi kúkponôi ŋɔwoŋo-ŋai kélee da tíi kɛ̀ la gîe ma a ǹɛ́lɛɛi, gɛ̀ ní kúkponôi a ƃɔ̂lɔ, é gbîŋ tɔɔ wɛli-kɛ-maa su.

Vulu-laa ninai gáa Kôrai kponôi

17Mɛni ma ŋá nyíŋi ƃó kâa ŋa sere-faa kɛ̀ Kúnuu-namui kponôi a gɛ́ɛ káfe ŋɔ́nɔ tua yɛ̂ɛ berei Zɛ̃tai-ŋai da tûa la díkili-ŋaisiai kɛ́ ƃo kpɛni-kpɛni. 18Díkaa kpinîi dímɛni ŋa-kaai su, dí kúlaa Ɣâla ŋɔfúlu-laai ma, kpɛ́ni fêi, maa-tare fé diɛ, kpɛ́ni fêi ŋɔ́nɔ dílii kpanaŋɔɔ̂i. 19Dífe kpaaŋ ni mɛni da kélee ma, da díkpîŋ kula a wolii-kpɔlɔ-ƃela díkɛ ŋ̀wɛli a gɛ́ɛ dí mɛni nyɔ́mɔɔ-sii kélee kɛ́. 20Kɛ́lɛ, káfe Kôrai mɛni maa kɔri ni a bere-sîi-ŋai ti! 21À kɛ̀ ká ŋ̀óo mɛ̀ni é sɛŋ lɛ kâa yɛ̂ɛ berei tɔ̃yâ káa la Zîsɛ kponôi, 22a gɛ́ɛ ká tée kátûa-pere pɔlɔi ma, nyíi pâi karâi, kpɛ́ni fêi, ŋɔmɛni-wɛliɛi káa a pɛlɛ. 23Ka kɛ́ a núu nina kákili ŋɔmɔlêŋ su. 24Ka dua-pere ninâi siɣe, nyíi Ɣâla è gbɛ̀tɛ a molôŋ maa tɔ̃yâ laa-la sãa su da maa-waa-laai.

25Mɛni ma kà kɛ̀ teêi wôya-pere ma, ká lóno a tɔ̃yâ kákɔlɛ-mâ-ƃelai pɔ, kpɛ́ni fêi, kúkaa a kúkîe-ni pɔ́ɔ. 26Kálii à ŋwàna, káfe sɔnyɔ̂ŋ kɛ̀. Kálii-ŋwanai fé lɛ̀ɛ zu fólo é li. 27Kpaa máŋ káfe tãi tɛɛ Dɛ̂ƃele pɔ. 28Ŋuma-nuu fé ŋɔ́nɔ ŋuma kɛ̀. Tɔɔ é tíi kɛ́ a ǹyée tɔ̃yâ-pere su, a gɛ́ɛ sɛŋ da é kɛ́ ǹyêei é da tɛɛ ǹúui pɔ a da wɛlii. 29Káfe ǹɛɛ naa lono nyɔ́mɔɔ é kúla kála, kɛ́lɛ, lono nɔ́ a nyíi a lii-laa tɛ̀ɛ núu pɔi, nyíi ǹɛ́lɛɛ̂i mɛnii ka gɛ̂i mɛni mai, a gɛ́ɛ kálono-wooi é lûwa láa diai dîa da káwoo mɛnii. 30Káfe Ɣâla Ŋɔmɔlêŋ Maa Waai líi tòo pôlu, nyíi kálɛ-mɛnii su kpanaŋ ŋuŋ-ma-ƃo ɣelei mɛni mai. 31Ka ƃó lii-ŋwana ma, lii-nyɔŋ, sóoŋ, larâŋ, da ŋɛi-kpala sii kélee. 32Sɔŋ-lɛlɛ da lii-lɛlɛ dí kɛ́ káyêei kákîe-ni mɛni ma. Ka kákîe-ni su-mɛni lɛɛ nɔ́ yɛ̂ɛ berei Ɣâla è kasu-mɛni lɛɛ la Kôrai sarâi.

Currently Selected:

Ifisiɛŋ 4: KWB

Highlight

Copy