Ifisiɛŋ 6

Nîa-pɛlɛɛ da díkaa-ƃela

1Nîa-pɛlɛɛ, ka kákaa-ƃela wóo mɛni Kúnuu-namui kponôi, kpɛ́ni fêi, nyíŋi káa a tɔ̃yâ. 2“Ƃâa kɛ́ ínâŋ ma da ílee” (dɔ̂ŋ maa-ŋuŋ ká ŋí nyíi gono-tee-wooi káa mai), 3“a gɛ́ɛ í mɛni lɛ́lɛɛ sɔlɔ ƃo, ífulu-laai su é kôyaa ǹɔii ma ƃɛ.” 4Lóŋ kaa-naŋ-ŋa, káfe kálônii líi ŋwana-mɛni kɛ̀, kɛ́lɛ, ka dítɔɔ Kúnuu-namui ŋɔsɛŋ-lɛɛi su da ŋɔyao-maai.

Luɛ-ŋa da dímɛi-ƃela

5Luɛ-ŋa, ka diai wóo mɛni díkaa a kámɛi-ƃela ǹɔii ma ƃɛi. Ka yao dîa ká ƃaa kɛ́-maa tɛɛ dípɔ a kálii kélee, yɛ̂ɛ berei ka Kôrai wóo mɛni lai. 6Káfe nuu-ŋɛi-woo mɛni kɛ̀ nɔ́ a dia. Káfè kɛ̀ nɔ́ a núu lii-laa-ƃela. Kɛ́lɛ, ka kɛ́ yɛ̂ɛ Kôrai yée-mu-ƃela, ká kɛ́ Ɣâla nia-mɛni kɛ̀ é kúla kálii su. 7Ka kátii kɛ́ é kúla kálii su yɛ̂ɛ kà kɛ̀ gɛ̂i Kúnuu-namui mi, kɛ́lɛ, núu-kpune fei. 8Kpɛ́ni fêi, ká gɔ́lɔŋ m̀ɛnii kélee núu a gɛ̀i, é kɛ́ ni a luɛ, kpaa máŋ luɛ fei, a pâi maa-mɛni-ŋai ti sɔlɔ ƃôi Kúnuu-namui yêei. 9Nuu-mɛi-ƃela, ka mɛni tɔnɔi ti kɛ́ a dia. Káfe dímaa yao. Ka gɔ́lɔŋ a gɛ́ɛ ǹúui gáa a ka dîa-ni kámɛi-nuui gáa Ɣâla-taa. Gáa núu kélee mɛni ma.

Ɣâla ŋɔkɔ-kɔ-sãai kélee

10Gbɛɛ ŋái, kákponôi é kpánaŋ Kúnuu-namui kponôi da ŋɔwála-wala-laai ŋɔsu-kpanaŋ. 11Ka Ɣâla ŋɔkɔ-kɔ-sãai kélee tóo kâa a gɛ́ɛ pɔ̂ri é kɛ́ kâa ká tɔɔ Dɛ̂ƃele ŋɔwôya-tua-pere-ŋai dîa. 12Kpɛ́ni fêi, kúfe kɔ̂i núu-kpune pɔ, kɛ́lɛ, kúkaa kɔ̂i nuu-mɛi-ƃelai pɔ, nyíi-ŋai díkaa a ŋwála-wala-ƃelai. Díkaa a tãi ŋí su-lɔii kpiniɛi su-nuu tuɛ-ƃela nyɔ́mɔɔ-ŋa, dí ƃo a nyînaŋ nyɔ́mɔɔ-ŋa nyînaŋ nyɔ́mɔɔ-ŋai pɔ taai. 13Mɛni ma ka Ɣâla ŋɔkɔ-kɔ-sãai kélee tóo kâa, a gɛ́ɛ pɔ̂ri é kɛ́ káa ká tɔ́ɔ ŋele nyɔ́mɔɔi su. Kà kpɛ̀ɛ nyíŋi kélee ma ka tɔ̂ɔ. 14-15Mɛni ma kà kpɛ̀ɛ a dɔ̃yâ-bɛ̂tii toɔɔ káleŋei, ká dɔ̃yâ-laa kɔli-kalaŋ pɛ́lɛ kákeŋe lá, ka Duŋ Lɛ́lɛɛi ŋɔlii-sêe kɔɔ-ŋa-kɔlɔi lɔ́ kákɔɔ ŋá kákpîŋ kpɛtɛ mɛ̂ni ma, ká tɔ́ɔ. 16Nyíŋi kélee pôlu ma, ka laa-laa kɔli-kalaŋ soŋ nyíi ka pɔ̂ri sɔnyɔ̂ŋ-nuu ŋɔsɔla-ŋɔŋ kélee kperâi lai. 17Ka m̀alo-lâa-gbaƃɛlɛi síɣe, da M̀ɔlêŋ ŋɔƃóa-sɔkpɔ̂i nyíi gáa a Ɣâla ŋɔwóoi. 18Ka Ɣâla fɛli M̀ɔlêŋ su a tãi kélee a Ɣâla-fɛli pere sii kélee mare-kɛɛ-pere su. Ka kámɛi káa fɔlɔ-fɔ̂lɔ su, ka Ɣâla marê kɛ́ Ŋ̀âla-ƃelai kélee mɛ̂ni ma. 19Ka Ɣâla fɛli máŋ ḿɛni ma a gɛ́ɛ ŋá m̀ɛnii kɔlɔŋ ŋa pâi m̀ôi tãi ŋà ńâ ƃò-la a gɛ́ɛ ŋa Duŋ Lɛ́lɛɛi su loo-mɛnii ƃo a lii-kpelei. 20Ŋ́gaa a Ɣâla pɔɔ-ŋa-nuu Duŋ Lɛ́lɛɛi mɛni ma, ŋ́gɛ ƃo yɔlɔ ŋá. Ka Ɣâla fɛli a gɛ́ɛ ŋà kɛ̀ Duŋ Lɛ́lɛɛi ƃôi, ŋá m̀ó a lii-kpele yɛ̂ɛ berei fɛ̂ɛ ŋá m̀ó lai.

Ǹaa-ti-maai gbɛɛ ŋái

21Tasikɔ nyíi gáa a kúƃarâŋ nuu wɛli-kɛ-maa sui, gɛ ƃo a Kúnuu-namui ŋɔtii-kɛ-nuu sãai, a pâi m̀ɛnii kélee ƃôi kâa a gɛ́ɛ ká gɔ́lɔŋ berei ŋ́gaa la da m̀ɛnii ŋa gɛ̂i. 22Ŋá dɛ̀ɛ kápɔ naa m̀ɛnii ŋí ma a gɛ́ɛ ká gɔ́lɔŋ berei kúkaa la, a gɛ́ɛ ŋɔ́nɔ é kálii kpele.

23Lii-see é kɛ́ ŋánûai dîa da laa-la wɛli-kɛ-maa é kúla Kúnâŋ Ɣâla yêei da Kúnuu-namui Zîsɛ Kôrai. 24Ƃɛlɛ-sêe é kɛ́ diai kélee dîa dí Kúnuu-namui Zîsɛ Kôrai wɛli ni a wɛli-kɛ-maa nyíi va sâai.

Currently Selected:

Ifisiɛŋ 6: KWB

Highlight

Copy