Mak 14

Akupangana yakumwulaga Yesu

(Mat 26:1-5; Luk 22:1-2; Yoh 11:45-53)

1Gali gamasile masiku gaŵili kuti ciyice cindimba ca Pasaka* ni Cindimba ca masiku gakulya mikate jangali cakusasaŵilisya.* Acakulungwa ŵa ŵakutaga mbopesi ni aciŵalimu ŵa Malamusi* ŵasosagasosaga litala lyakuti amkamule Yesu* mwangamanyilila jwalijose kuti amwulaje.#Eks 12:1-27 2Nambo ŵatiji kuti, “Yeleyi tukayitenda pa ndaŵi ja cindimba ni mkaŵa kutandisya njojo pasikati pa ŵandu.”

Jwamkongwe ŵapungulile mawuta pa mtwe pa Yesu ku Betaniya

(Mat 26:6-13; Yoh 12:1-8)

3Lisiku line Yesu ŵaliji ku Betaniya, m'nyumba ja Simoni* jwa matana. Pa ndaŵi jiŵaliji mkulya ŵayice jwamkongwe jwine ali ajigele libotolo lya alabasita lyaligumbale ni mawuta gakununjila ga mtengo wapenani, gakupanganyidwa kutyocela kuyakumela yakolanjikwa kuti nalido.* Jwamkongwejo ŵawugwile libotololyo, ni kutanda kutaga mawutago pa mtwe wa Yesu.#Luk 7:37-38 4Ŵandu ŵane pa malopo yanyaleye yeleyi, ŵatite kuti, “Ligongo cici mkugajonanga mawuta gakununjilaga camti myiyi? 5Mkakombolece kugasumisya gele mawutaga, pa mtengo wakupunda mbiya sya silifa,* syakwana 300, mbiyasyo ni kuja kwapa ŵandu ŵakulaga.” Myoyo ŵanduwo ŵamtumbilile jwamkongwejo.

6Yesu ŵatite, “Mumlece jwamkongweju! Ana mkumsawucisya cici? Yeleyi yandendele jwamkongweju yili yambone mnope. 7Ŵandu ŵakulaga timtameje nawo ndaŵi syosope, ni mkukomboleka kwatendela yacanasa ndaŵi jilijose jimkusaka. Nambo ngasimŵa ni une ndaŵi syosope.#Det 15:11 8Jwalakweju atesile yindu yakayikombwele kuyitenda. Acipakesye cile cilu cangu ni mawuta gakununjila mkanicisicidwe mwilembe. 9Kusyene ngumsalicisya kuti kulikose kwele ŵandu taciŵaga ali mkulalicila Ngani Syambone* pa cilambo cosope capasi, mkasalicisyeje soni yele yatesile jwamkongweju, kuti ŵandu tamkumbucileleje.”

Yudasi akupangana ni acakulungwa ŵa Ayuda yakumwulaga Yesu

(Mat 26:14-16; Luk 22:3-6)

10Kaneko Yudasi mwanace jwa Isikaliyoti, jumo jwa ŵakulijiganya* likumi ni ŵaŵili ŵala, ŵajawile kwa acakulungwa ŵa ŵakutaga mbopesi kukupangana kuti akampelece Yesu kwa jemanjajo. 11Acakulungwa piŵapikene yeleyi ŵasangalele, ni ŵatesile najo cilanga* cakuti tacimpa mbiya. Myoyo Yudasi ŵatandite kusosasosa litala lyakumpelecela Yesu kwa jemanjajo.

Yesu akutenda cindimba ca Pasaka ni ŵakulijiganya ŵakwe

(Mat 26:17-25; Luk 22:7-14; Yoh 13:21-30)

12Pa lisiku lyandanda lyakutenda cindimba ca mikate jangali cakusasaŵilisya, pa lyele lisikuli ŵandu ŵawulagaga ngondolo kuti atendele cindimba ca Pasaka, ŵakulijiganya wa Yesu ŵamwusisye kuti, “Ana akusaka kuti uweji tukakolosye kwapi malo gakuja kulila cindimba ca Pasaka?”

13Yesu ŵatumile ŵaŵili mwa ŵakulijiganya ŵakwe, ni ŵasalile kuti, “Mjawule mu msindawo. Naga mkusimangana ni mundu jwamlume ali atwicile lulo lwa mesi, mkamkuye. 14Ku nyumba jitakajinjile jwalakwejo, mkamsalile msyene nyumbajo kuti, ‘Cemwalimu akuwusya kuti, ana cipinda citalilemo cindimba ca Pasaka ni ŵakulijiganya ŵawo ni capi?’ 15Jwalakwejo takamlosye cipinda cekulungwa camwinani cekolosye cenene yosope yakusosekwa, ni mkatukolocesye yakulya mwelemo.”

16Ŵakulijiganya ŵala ŵanyakwice ni ŵajinjile mu msindamo. Ŵacisimene cipinda mpela muŵasalile Yesu mula, ni ŵakolosisye cakulya ca Pasaka.

17Pikwaswele, Yesu ŵayice ni ŵakulijiganya ŵakwe likumi ni ŵaŵili ŵala. 18Wosope ali atemi pasi ni kulyaga, Yesu ŵasalile kuti, “Kusyene ngumsalicisya kuti jumo mwa jemanja, jwakulya pampepe ni une tambelece kwa amagongo ŵangu.”#Mas 41:9

19Ŵakulijiganya ŵala ŵadandawile mnope, ni ŵatandite jumo jumo kumwusya Yesu kuti, “Ana mwine mpaka mbe une Ambuje?”

20Yesu ŵajanjile kuti, “Taŵe jumo jwa jemanja likumi ni ŵaŵili, jwele jwapambile mkate wakwe mumbalemu pampepe ni une. 21Mwanace jwa Mundu* akuja kukuwulajidwa mpela yigatite Malemba pakusala ya jwalakwe. Nambo akwete likungu mundu jwele jutacimpeleka Mwanace jwa Mundujo. Kukaliji kwambone mnope kwa jwele mundujo akaŵe jwangapagwa.”

Ya cakulya ca Ambuje

(Mat 26:26-30; Luk 22:15-20; 1 Akoli 11:23-25)

22Ali mkulya yilayila, Yesu ŵajigele mkate, ni ŵamtogolele Mlungu, ni ŵawugaŵenyegaŵenye, kaneko ŵapele ŵakulijiganya ŵakwe ŵala, jwalakwejo ali mkuŵeceta kuti, “Pocelani, celeci cili cilu cangu.”

23Kaneko ŵajigele soni mgawo ni ŵamtogolele Mlungu, ni ŵawupelece kwa ŵakulijiganya ŵala, ni ŵamwele wosope. 24Yesu ni ŵasalile ŵakulijiganyawo kuti, “Jeleji ni miasi jangu jakusimicisya Cilanga ca Mlungu. Miasi jeleji ngujijita ligongo lya ŵandu ŵajinji.#Eks 24:8; Yel 31:31-34 25Kusala yakuwona, une ngasimwa soni cakumwa ca mcitela ca mpeleyaci, mpaka pa lisiku litinjimwa cakumwa casambano mu Ucimwene wa Mlungu.”*

26Piŵamasile kwimba nyimbo jakumlumba Mlungu, wosope ŵakopwece pasa ni kwawulaga ku Litumbi lya Olifi.*

Yesu akusala cile kuti Petulo tacimkana jwalakwe

(Mat 26:31-35; Luk 22:31-34; Yoh 13:36-38)

27Kaneko Yesu ŵasalile ŵakulijiganya ŵakwe kuti, “Wosopemwe timcindila ni kundeka une jika. Pakuti Malemba gakusala kuti, ‘Mlungu taciwulaga jwakucinga, nipo ngondolo tisicipwilingana.’#Sak 13:7 28Nambo patinjijimuka ku ŵawe, jutinjilongola ni une kwawula ku Galileya.”#Mat 26:32

29Petulo* ŵajanjile kuti, “Atamose wosope ŵatile ni kwaleka, nambo une jikape ngasinaleka.”

30Yesu ŵamjanjile Petulo kuti, “Kusyene ngumsalicisya kuti cilope cino, tambala mkanatongole kaŵili, timŵe mli munganile katatu kuti ngamkumanyilila une.”

31Papopo Petulo ŵajanjile mwamacili acitiji kuti, “Atamose ali atite kuti ambulaje pampepe ni ŵalakwe, une ngaŵa mkwakana kose kuti ngangwamanyilila.”

Ŵakulijiganya ŵane wosope ŵala nombe nawo soni ŵaŵecete yilayila.

Lipopelo lya Yesu ku Getisemane

(Mat 26:36-46; Luk 22:39-46)

32Yesu ni ŵakulijiganya ŵakwe ŵapite kumalo gane, gakolanjidwa Getisemane, ni ŵasalile jemanjajo kuti, “Mtame kaje apano, pa ndaŵi jingupopela.” 33Yesu ŵalongene ni Petulo, Yakobo* ni Yohane.* Kaneko Yesu ŵatandite kudandawula ni kulagasika mu mtima. 34Ni ŵasalile jemanjajo kuti, “Mu mtima mwangu mugumbele canasa cekulungwa cakuwa naco. Jemanja mtame panopano, mesope.”

35Yesu ni ŵajesile kwawula pasogolo panandi, ni ŵaligwisisye pasi camakuku, ni ŵapopesile kuti, “Naga yili yakomboleka ndaŵi ja yisawusyo jino jimbunde.” 36Ŵapopesile acitiji, “Abba,#14:36 Abba: Lina lyeleli ligopolela kuti Atati mu ciŵeceto ca ci Alemaiki. Atati ŵangu, komboleka ŵalakwe kutenda cindu cilicose, andyocesye mgawo ŵa yisawusyowu. Nambo atende yeleyi mwakusosela ŵalakwe, ngaŵa yingusosa une.”

37Ali amasile kuŵeceta yeleyi, Yesu ŵawujile kuŵaliji ŵakulijiganya ŵakwe ŵala ni ŵasimene ali mlugono. Myoyo ŵamwusisye Petulo kuti, “Simoni, ana m'mweji mli mlugono? Ana kweli mlepele kutama mesope mwa kandaŵi kamnonoka?” 38Ni ŵasalile soni kuti, “Mtame mesope, ni mpopeleje kuti mkagwa muyakulinjidwa. Mtima wenu ukusaka, nambo cilu cenu cili cangali macili.”

39Yesu ŵajawile soni kaŵili, ni ŵapopesile, ŵaŵecete maloŵe gakwe galagala. 40Piŵawusile soni kwa jemanjajo, ŵasimene ali mlugono, ligongo lyakuti meso gawo gapesile. Myoyo jemanja jila casoŵile cakuti amjanje Yesujo.

41Piŵawujile soni kwa jemanja jila katatu, ŵatite kuti, “Ana mli ciŵela kugonape? Mlole sambano. Ndaŵi jila jikwanile. Mwanace jwa Mundu akuja kukupelecedwa m'myala mwa ŵandu ŵa ulemwa.* 42Jimukani, kuti tujawuleje. Mundu jwakumbeleka jula ngati aju, ayice.”

Yesu akukamulidwa

(Mat 26:47-56; Luk 22:47-53; Yoh 18:2-12)

43Yesu piŵaliji mkuŵeceta yeleyi, ndaŵi jijojo ŵayice Yudasi, jumo jwa ŵakulijiganya likumi ni ŵaŵili ŵala. Jwalakwe ŵayice ni likuga lya ŵandu ali ajigele mapanga ni yimbonga. Jemanjaji ŵatumidwe ni acakulungwa ŵa ŵakutaga mbopesi, aciŵalimu ŵa Malamusi ni acakulungwa ŵane ŵa Ayuda. 44Jwa malindi jwakumpeleka Yesu jula ŵaliji ali ŵapele cimanyisyo cakuti, “Jwele jutingamkomasyejo ni jujojo, mumkamule ni kwawula najo, mkaja kumkulupusya.”

45Yudasi piŵayice, ŵaŵandicile kuŵaliji Yesu, ni ŵatite, “Cemwalimu!” Piŵaŵecete myoyo ŵakomasisye. 46Papopo ŵandu ŵala ŵamkamwile Yesu. 47Nambo jwine mwa ŵakulijiganya ŵakwe, ŵaswekwile upanga, ni ŵakatile lipikanilo lya mcanda jwine jwakutumicila jwa jwamkulungwa jwa ŵakutaga mbopesi.* 48Kaneko Yesu ŵawusisye ŵandu ŵala kuti, “Ana ligongo cici myice kukungamula une mlimjigele mawupanga ni yimbonga mpela une jwawiyi? 49Lisiku ni lisiku naŵaga ni jemanja M'nyumba ja Mlungu ku kwiganya, nambo jemanja nganimungamula. Nambo yeleyi yitendekwe kuti yikwanilisye yigasasile Malemba ga Mlungu.”#Luk 19:47; 21:37

50Papopo, ŵakulijiganya ŵakwe wosope ŵatisile ni kumleka Yesu jikape.

51Mcanda jwine juŵamkuyaga Yesu ali agambile kulijanda nguwo ja bafutape ŵamkamwile, 52nambo jwalakwejo ŵajikolopwele nguwojo ni ŵatisile ali makonope.

Yesu ku Nganya ja acakulungwa ŵa Ayuda

(Mat 26:57-68; Luk 22:54-55, 63-71; Yoh 18:13-14, 19-24)

53Ŵandu ŵala ŵajawile najo Yesu kwa jwamkulungwa jwa ŵakutaga mbopesi wosope. Kweleko kwasongene acakulungwa ŵa ŵakutaga mbopesi wosope, acakulungwa ŵa Ayuda, ni aciŵalimu ŵa Malamusi. 54Petulo ŵamkuyaga Yesu pakutalicila camti myoyo mpaka ŵajile kukwinjila nawo mkati mwa luŵala lwa nyumba ja jwamkulungwa jwa ŵakutaga mbopesi jula, nipo jwalakwejo ŵatemi pasi pampepe ni acilonda ŵa ku Nyumba ja AMBUJE* ni kotaga moto. 55Acakulungwa ŵa ŵakutaga mbopesi ni ŵa Nganya josope ja Ayuda ŵasosagasosaga umboni wakuti awupelece kuti Yesu amwulaje, nambo nganawupata kose. 56Pakuŵa ŵandu ŵajinji ŵamŵecetelaga ya unami, nambo umboni uŵapelekaga ŵanduwo nganiwujilanaga.

57Ŵandu ŵane ŵajimi ni kutanda kumlambucisya Yesu ya unami. 58Jemanjajo ŵatite kuti, “Uwe twampikene aju munduju ali mkuŵeceta kuti, ‘Une tinjipasula Nyumba ja AMBUJE jijataŵidwe ni ŵandu jila, nambo pakumala pa masiku gatatu tinjijitaŵa jine jangataŵidwa ni ŵandu.’ ”#Yoh 2:19 59Nambo atamose yaliji myoyo yiŵaŵecete jemanjajo nganiyijilana kose.

60Sambano jwamkulungwa jwa ŵakutaga mbopesi wosope ŵajimi pasogolo pa ŵandu wosope ni ŵamwusisye Yesu kuti, “Ana nganimkola cakwanga? Nambi yamtuli yakumŵecetela ŵanduyi?”

61Yesu ŵagambile kutama jii ngaŵeceta cilicose. Kaneko jwamkulungwa jwa ŵakutaga mbopesi jula ŵamwusisye soni Yesu kuti, “Ana m'mweji mli Klistu* jula, Mwanace jwa Mlungu?”

62Yesu ŵajanjile kuti, “Elo ni une, timcimwona Mwanace jwa Mundu ali atemi ku mkono wamlyo wa Mlungu Jwamaciligosope. Soni timcimwona ali mkwisa pa mawunde ga kwinani.”#Dan 7:13

63Jwamkulungwa jwa ŵakutaga mbopesi jula ŵapapwile cakuwala cakwe acitiji, “Ana tukusosela soni cici umboni wine? 64Ngati mlipikanile mwacimsyene yakuti pamkumnyosya Mlungu, nambi sambano jemanja mkuganisya uli?”

Ŵandu wosope ŵakamulene cindu cimpepe, kuti Yesu ali jwakulemwa nipo akwenela kuwulajidwa.#Lef 24:16

65Ŵane ŵatandite kumsunila mata, kaneko ŵamsiŵile m'meso ni ŵamgombile makofi ali mkuŵeceta kuti, “Mlote, ana ŵani ŵamputile?” Alonda ŵala nombe nawo ŵamjigele, ni ŵatandite kumputa Yesu.

Petulo akumkana Yesu kuti ngakum'manyilila

(Mat 26:69-75; Luk 22:56-62; Yoh 18:15-18, 25-27)

66Petulo piŵaliji citamile pasi mkati mwa luŵala, mwali jwine jwamasengo jwa jwamkulungwa jwa ŵakutaga mbopesi, ŵayice papopo. 67Jwalakwejo piŵam'weni Petulo ali mkota moto, ŵamlolecesye ni ŵamsalile Petulojo kuti, “Nombe wawojo ŵaliji ni Yesu jwa ku Nasaletiju.”

68Nambo Petulo ŵakanile kuti, “Nganguyimanyilila yimkuŵecetayi soni ngangupikanicisya kose.” Kaneko Petulo ŵakopwece ni kwawulaga kucaliji cipata. Ndaŵi jijojo tambala jwatongwele.

69Nambo mwali jula ŵam'weni soni Petulo, ni jwatandite kwasalila ŵiŵaliji pelepo kuti, “Nombe najo mundu aju ali jumo jwa mpingowu.” 70Nambo Petulo ŵakanile soni.

Pangapita ndaŵi ŵandu ŵiŵajimi pakuŵandikana ni Petulo ŵatandite kumsalila kuti, “Kasimkana, nombe m'mwejo mli jumo jwa likugali. Ana kumangwenu ngati ku Galileya?”

71Kaneko Petulo ŵatandite kulumbila* ali mkusala kuti, “Nguŵeceta yisyesyene, une Ngingum'manyilila jwele mundu jwakwambaju.”

72Kaneko tambala jwatongwele kaŵili, nipo Petulo ŵakumbucile maloŵe giŵaŵecete Yesu gala gakuti, “Tambala mkinatongole kaŵili, timciŵa mli munganile katatu.” Papopo Petulo ŵatandite kulila.

Currently Selected:

Mak 14: YAWO

Highlight

Copy