Mak 13

Yesu akulocesya yakonasika kwa Nyumba ja AMBUJE

(Mat 24:1-2; Luk 21:5-6)

1Pa ndaŵi jiŵakopokaga Yesu* ku Nyumba ja AMBUJE, jwakulijiganya jwakwe jwine ŵamsalile kuti, “Cemwalimu, alole kusalala kwakwe kwa maganga ni nyumbasi.”

2Yesu ŵamsalile kuti, “Ana mkusilola nyumba syasikulungwakulungwasi? Ngasilisigala liganga atamose limo lyakusajika pacanya pa lijakwe, gosope tigacigumulidwa.”

Yisawusyo ni yipwetesi

(Mat 24:3-14; Luk 21:7-19)

3Kaneko Yesu ŵatemi pasi, Petumbi lya Olifi, mwakulolegana ni Nyumba ja AMBUJE. Nipo Petulo,* Yakobo,* Yohane* ni Andileya* ŵamwusisye pajika kuti, 4“Atusalile, ana yeleyi tiyicitendekwa cakaci? Ana ticicitendekwa cici kulosya kuti ndaŵi jikwanile jakuti yindu yosopeyi yitendekwe?”

5Yesu ŵasalile kuti, “Mkalamuce kuti jwine jwalijose akasamsokonesya. 6Ŵandu ŵajinji taciyika acikolangaga lina lyangu nipo tacitiji kuti, ‘Mkulupusyo jwakulocesyedwa jula ni une,’ nipo tacasokonesya ŵandu ŵajinji. 7Nambo jemanja mkadandawula pitimcipikana lisegwe lya ngondo pakuŵandikana ni jemanja kapena kupikana ngani sya ngondo sya kwakutalicila. Yeleyi yikwenela kutendekwa, nambo ngayikugopolela kuti mbesi ja cilambo capasi jiyice. 8Mitundu ja ŵandu jakulekanganalekangana tijicimenyana ngondo, ucimwene tiwucimenya ni ucimwene ujakwe. Tikuciŵa kwana sala ni yisicinya ku malo gakulekanganalekangana, soni tikuciŵa kwana sala. Yosopeyi kuli kutanda kwa yisawusyo.

9“Nambo jemanja mkalamuce. Ŵandu tacimkamula ni kumpeleka ku nganya ja magambo, tacimkwapula m'nyumba syawo sya mapopelo. Timcija kuwonecela kwa acakulungwakulungwa ŵa Boma ni kwa ayimwene ligongo lya une, kuti mkandendele umboni pameso pawo.#Mat 10:17-20; Luk 12:11-12 10Kuli kwakusosekwa kuti Ngani Syambone* silongole kaje kulalicidwa kwa ŵandu ŵa mitundu josope. 11Myoyo, naga akwisa kukumkamula ni kumpeleka ku nganya ja magambo, mkadandawula ni kuganisya kuti, ‘Ana timkaŵecete cici?’ Iyayi, jemanja mkagambe kuŵeceta yitakamsalile Mlungu pa ndaŵi jelejo. Pakuŵa ngamja kuŵeceta jemanja iyayi, nambo Msimu Ŵaswela. 12Mundu taciŵa ali kumpeleka mlongo mjakwe kuti awulajidwe, baba taciŵa ali kumpeleka mwanagwe. Ŵanace taciŵa ali mkwajimucila acinangolo ŵawo mpaka kwawulagasya. 13Ŵandu wosope tacimŵenga jemanja ligongo lyakunguya une. Nambo jwalijose jutacilimbicila mpaka pambesi, ni jutacikulupuka.#Mat 10:22

Cindu cakonanga cakunyalaya cakogoya

(Mat 24:15-28; Luk 21:20-24)

14“Timciciwona cindu cakogoya cili cijimi pa malo pacikakuŵajilwa kutama. (M'mwejo ŵimkuŵalanga mpikanicisye cenene!) Pelepo ŵali ku Yudeya atilile ku matumbi.#Dan 9:27; 11:31; 12:11 15Jutaciŵa ali pa msakasa wa nyumba jakwe, akaja kutuluka kuti, akajigale cindu m'nyumba mwakwemo.#Luk 17:31 16Jwele jutaciŵa ali ku migunda, akasawujila soni ku nyumba kuti akajigale malaja gakwe. 17Tiyiciŵa yakogoya kwa acakongwe ŵele ŵitaciŵa ali akwete pa cilu, nipo soni acakongwe ŵele ŵitaciŵa ni ŵanace ŵakonga pa gele masikugo. 18Mpopeleje kwa Mlungu kuti yindu yeleyi yikasiyitendekwa pa ndaŵi jakusisima, 19pakuti yisawusyo yakogoya mnope yitiyiciwoneka masiku gelego, nganiyiwoneceje soni cipanganyicisye Mlungu cilambo capasi mpaka sambano jino, nipo ngasiyiwoneka soni.#Dan 12:1; Ciw 7:14 20Nambo Ambuje akaŵe kuti nganagapungula masikugo, mkanapagwa mundu jwalijose jwakakulupwice. Nambo Mlungu ŵagapungwile masikugo ligongo lya ŵandu ŵaŵasagulidwe ni jwalakwejo.

21“Pandaŵi jelejo, naga mundu jwine akuja kumsalila kuti, ‘Alitu apano Klistu jula’, kapena kuti, ‘Ajo jwali apopojo’, mkasimumkulupilila mundu jwelejo. 22Ligongo tikuciwoneka ŵandu ŵa unami ŵakusala kuti, ‘Klistu* jula ni une’ kapena kuti, ‘Jwakulocesya* jula ni une.’ Ŵanduwo tacitendaga masengo gamacili soni ni yindu yakusimonjeka, kuti naga yikomboleka ŵasokonesye atamose ŵandu ŵakusagulidwa ni Mlungu. 23Nambo jemanja mkalamuce. Une nimsalile cile jemanja yeleyi ndaŵijo mkinijikwane.

Kuyika soni kwa Mwanace jwa Mundu

(Mat 24:29-31; Luk 21:25-28)

24“Gele masikugo, yisawusyo yili yimasile, lyuŵa tilicibilila, mwesi tiwucileka kuŵala.#Yes 13:10; Esek 32:7; Yow 2:10, 31; 3:15; Ciw 6:12 25Ndondwa tisicigwa kutyocela kwinani nipo macili ga kwinani tigacitenganyika.#Yes 34:4; Yow 2:10; Ciw 6:12 26Ndaŵi jelejo ŵandu tacimwona Mwanace jwa Mundu* ali mkwisa m'mawunde, mwamacili gekulungwa ni lumbili.#Dan 7:13; Ciw 1:7 27Jwalakwe tacigatuma malayika* gakwe ku mitepa mcece ja cilambo capasi kukwasonganya ŵandu ŵakusagulidwa ni Mlungu kutyocela kumtepa wine wa cilambo capasi mpaka kumbesi jine soni jijakwe.”

Lijiganyo lya mkuju

(Mat 24:32-35; Luk 21:29-33)

28“Mcilolecesye citela ca mkuju ni mlijiganye kutyocela pa celeco. Pimkuwona kuti nyambi syakwe sitandite kulosya uŵisi, nipo masamba gatandite kusipuka, mkusamanyilila kuti cawu ciŵandicile. 29Myoyo soni, pitimciyiwona yosope yimbecete yila, tim'manyilile kuti Mwanace jwa Mundu aŵandicile. 30Kusyene ngumsalicisya kuti yosopeyi tiyicitendekwa ŵandu ŵa mpago awunowu mkanamale kuwa wosope. 31Kwinani ni cilambo capasi tiyicimala, nambo maloŵe gangu ngasigamala macili kose.

Lisiku lyambesi ngalikumanyika

(Mat 24:36-44)

32“Nambo ya lisiku kapena ndaŵi jakwe, pangali jwakujimanyilila. Atamose malayika gakwinani ngagakumanyilila. Atamose uneji Mwanace ngangumanyilila, nambo Atati jikape ni ŵakumanyilila.#Mat 24:36 33Sambano mkalamuce, mŵeje mesope, ligongo ngamkumanyilila kuti ndaŵijo tijicikwanila cakaci. 34Yili mpela mundu jwakunyakuka ulendo wakwe kutyoka pa nyumba jakwe. Akusaleka yindu yakwe m'magasa mwa ŵamasengo ŵakwe, jwalijose masengo gakwe gakuti agapanganyeje ni kumsalila mlonda jwa pa mlango kuti aŵeje mesope.#Luk 12:36-38 35Nombe jemanja mŵeje mesope, ligongo ngamkumanyilila kuti msyene nyumba taciwuja ndaŵici, kanga ligulo, pakati cilo, kapena ndaŵi jijikulila tambala jwandanda, mwine kumasikusiku. 36Komboleka kwika mwacisisimucila, myoyo akamsimana mli mlugono. 37Yindu yele yingumsalilayi, ngangumsalila jemanjape iyayi, nambo ngwasalila ŵandu wosope kuti, aŵeje mesope.”

Currently Selected:

Mak 13: YAWO

Highlight

Copy