Mak 15

Yesu ku nganya ja Pilato

(Mat 27:1-2, 11-14; Luk 23:1-5; Yoh 18:28-38)

1Kundaŵindaŵipe acakulungwa ŵa ŵakutaga mbopesi, ŵatesile mtemela pamo ni acakulungwa ŵa Ayuda* ni aciŵalimu ŵa Malamusi,* pamo ni ŵandu ŵane wosope ŵa mu Nganya Jekulungwa ja Ayuda,* ŵatesile mtemela. Ŵamtaŵile Yesu* ni ŵajile najo kwa Pilato.* 2Pilato ŵamwusisye jwalakwejo kuti, “Ana m'mwejo mli mwenye jwa Ayuda?”

Yesu ŵajanjile kuti, “Mŵecete mwasyene jika.”

3Acakulungwa ŵa ŵakutaga mbopesi ŵamŵecetele Yesu yindu yejinji. 4Myoyo Pilato ŵamwusisye soni jwalakwejo kuti, “Ana ngamjanga kandu? Mpikane yosope yakumŵecetelayi.”

5Nambo Yesu nganajanga kandu kalikose, mwakuti Pilato ŵasimonjile mnope.

Pilato ŵalamwile kuti Yesu awulajidwe

(Mat 27:15-26; Luk 23:13-25; Yoh 18:39—19:16)

6Pandaŵi ja cindimba ca Pasaka,* Pilato ŵaliji mkwagopolela ŵandu mkayidi jumo, jwele juŵamsakaga jemanjajo. 7Ŵapali mundu jwine lina lyakwe Balaba, juŵataŵidwe pamo ni ŵandu ŵane ligongo lya kwimucila boma ni kuwulaga ŵandu. 8Myoyo likuga lya ŵandu lyayice kukumŵenda Pilato kuti ŵatendele jemanjajo yindu yiŵasyoŵelele kuyitenda pa ndaŵi mpela jelejo. 9Pilato ŵawusisye jemanjajo kuti, “Ana mkusaka kuti namgopolele mwenye jwa Ayudaju?” 10Ŵaŵecete yeleyi ligongo lyakuti Pilatojo ŵamanyilile kuti, acakulungwa ŵa ŵakutaga mbopesiwo agambile kumpeleka Yesujo ligongo lya wiwu.

11Nambo acakulungwa ŵa ŵakutaga mbopesiwo ŵatendesye ŵanduwo kuti aŵende kuti ŵagopolele Balaba. 12Pilato ŵawusisye soni ŵandu ŵala kuti, “Nambi sambano ndende najo cici munduju jumkuti ali mwenye jwa Ayuda?”

13Ŵanduwo ŵagumisile ali mkuŵeceta kuti, “Amkomele pa msalaba.”

14Pilato ŵawusisye kuti, “Ana jwalakweju alemwisye cici?”

Nambo ŵanduwo ŵagumisile mnope ali mkuŵeceta kuti, “Amkomele pa msalaba.”

15Myoyo Pilato pakusaka kwasangalasya ŵanduwo, jwalakwejo ŵagopolele Balaba, ni ŵalamwile kuti Yesu akwapulidwe yikoti, panyuma pakwe ŵampelece kuti akamkomele pa msalaba.

Asilikali ŵamtesile Yesu cipongwe

(Mat 27:27-31; Yoh 19:2-3)

16Kaneko asilikali ŵamjigele Yesu kuja nawo ku luŵala lwa mkati mwa nyumba ja bwanamkubwa,* ni ŵalisongenye likuga lyosope lya asilikali acimjawo. 17Ŵam'wecice mkanjo wecejewu soni ŵapanganyisye cisoti ca ucimwene kutyocela nyambi sya miŵa ni ŵam'wecice mu mtwe mwakwe. 18Kaneko ŵatandite kumkomasya acitiji, “Moni mwenye jwa Ayuda.” 19Pandaŵi jeleji ŵaliji mkumputa Yesu mu mtwe ni litete lila ni kumsunila mata, ali mkumtindiŵalila mwacipongwe. 20Piŵamasile ng'anda najo mwacipongwe, ŵamwusile mkanjo wula ni ŵam'wecice yakuwala yakwe. Kaneko ŵamjigele, ni kwawula nawo kuti akakomele pa msalaba.

Kukomelwa kwa Yesu pa msalaba

(Mat 27:32-44; Luk 23:26-43; Yoh 19:17-27)

21Petala ŵasimene ni mundu jwine, lina lyakwe Simoni* jwakutyocela ku Kilene babagwe Alekisanda ni Lufusi, ŵatyocelaga kumigunda. Asilikali ŵala ŵamkanganicisye Simoni kuti atwicile msalaba wa Yesu.#Alo 16:13 22Jemanjajo ŵajawile najo Yesu ku malo gakolanjidwa Gologota, gopolela kuti, “Malo gacikalakasa ca mtwe.” 23Ŵasakaga kumpa Yesu finyo jwewanganye ni mtela wakolanjidwa kuti mule,* nambo jwalakwe ŵakanile.

24Piŵamkomele pa msalaba, ŵagaŵene yakuwala yakwe pakulondola cisango, kuti alole yitajigale jwalijose.#Mas 22:18 25Piŵamkomelaga pa msalaba ndaŵi jaliji 9 koloko ja kundaŵi. 26Maloŵe gakulosya magambo gakwe gakumwulaga ŵagalembile kuti, “Mwenye jwa Ayuda.” 27Pamo ni Yesu ŵakomile soni pa misalaba ŵaciswamba ŵaŵili, jwine kumbali ja ku mkono wamlyo jwine kumbali ja ku mkono wamciji wa Yesu.

[ 28Myoyo yatendekwe yigaŵecete maloŵe ga Mlungu yakuti, “Jwalakwejo ŵamjigele mpela mjawo jwa ŵandu ŵakasa malamusi.”]#Yes 53:12

29Ŵandu wosope ŵiŵapitaga pelepo ŵamŵecetelaga maloŵe gacipongwe. Jemanjajo ŵaliji mkupukunya mitwe jawo acitiji, “Ana ngati mwatiji kuti, ‘Timcigumula Nyumba ja AMBUJE ni kujitaŵa soni pa masiku gatatu?’#Mas 22:7; 109:25; Mak 14:58; Yoh 2:19 30Sambano mlikulupusyetu mwasyene, ni mtuluce pa msalabapo.”

31Nombe nawo acakulungwa ŵa ŵakutaga mbopesi ni aciŵalimu ŵa malamusi ŵaliji kumseka Yesu acitiji kuti, “Mwakulupwisye ŵandu ŵane nambo ngamkupakombola kulikulupusya mwasyene. 32Amlece tulole naga ali Klistu* jula, mwenye jwa Aisalaeli, sambano mtuluce pa msalaba.” Nombe nawo ŵandu ŵaŵili ŵiŵakomelwe pampepe najo ŵala ŵaliji mkumlalatila.

Ciwa ca Yesu

(Mat 27:45-56; Luk 23:44-49; Yoh 19:28-30)

33Kutandila ndaŵi ja 12 koloko musi mpaka 3 koloko ligulo, catesile cipi pa cilambo cosope. 34Sambano ndaŵi pijakwanaga ca m'ma 3 koloko, Yesu ŵagumisile mnope acitiji, “Eloi, Eloi lema sabakitani.” Gopolela kuti, “Mlungu jwangu, Mlungu jwangu, ligongo cici andesile?”#Mas 22:1

35Nambo ŵiŵajimi pelepo ŵatite, “Kwende tujembecele, tulole naga Eliya* tayice kukumkulupusya jwalakwejo.” 36Myoyo mundu jwine ŵawutwice ali ajigele siponji jiŵajiloŵece mu finyo wecesuce, siponjijo ŵajitotomece mwitete ni ŵampele Yesu kuti amwe, acitiji, “Mumlece tulole naga Eliyajo tayice kukumkulupusya.”#Mas 69:21 37Kaneko Yesu ŵagumisile mnope nipo ŵawile.

38Nguwo jakuciga ku cipinda ca Nyumba ja AMBUJE japapwice cilikati, kutyocela penani mpaka pasi.#Eks 26:32-33 39Jwamkulungwa jwa asilikali juŵajimi papopo pasogolo mwakulolegana ni Yesujo piŵayiweni kuti Yesu awile, jwalakwejo ŵatite, “Yisyene munduju ŵaliji Mwanace jwa Mlungu.”

40Pakutalicila camti Myoyo, ŵapali acakongwe ŵane ŵiŵalolecesyaga, jemanjajo ŵaliji Maliya jwa ku Magadala, Maliya mamagwe Yakobo* juŵaliji jwamnondi ni jwa Yosefe nipo soni Salome.#Luk 8:2-3 41Acakongweŵa ŵamkuyaga Yesu jwalakwejo piŵaliji ku Galileya, soni ŵamtumicilaga. Ŵapali soni acakongwe ŵane ŵajinji ŵiŵayice ni Yesu ku Yelusalemu.

Yesu ŵasicidwe mwilembe

(Mat 27:57-61; Luk 23:50-56; Yoh 19:38-42)

42Ligulo lyuŵa lili lipendeme, pakuti lyaliji lisiku lya msano lyakuliŵicila cile, alimkuti kundaŵi kwakwe tiliŵe lisiku lyakupumula* lya Ayuda. 43Pikwaswaga, Yosefe jwa ku Alimateya ŵayice. Jwalakweju jwaliji jwakumanyika mnope mu Nganya, jele juŵaliji mkwembeceya kwika kwa Ucimwene ŵa Mlungu. Ŵalimbile mtima ni ŵajile kwa Pilato kukuŵenda kuti ampe mtembo wa Yesu. 44Pilato ŵasimonjile piŵapikene kuti Yesu awile kala. Myoyo ŵamŵilasile jwamkulungwa jwa asilikali jula ni ŵamwusisye naga Yesu amasile kuŵa. 45Piŵayimanyi kutyocela kwa jwamkulungwa jwa asilikali jula kuti Yesu awile, Pilato ŵamkundile Yosefe kuwujigala mtembowo. 46Yosefe ŵasumile nguwo jeswela ja bafuta, ni ŵatulwisye mtembo wula ni kuwuŵijilila ni nguwo ja bafutajo. Ŵawusicile mwilembe liŵatesile kusepa pa lwala, ni ŵagundumucisye liganga ni kuwugalila mlango wa lilembelyo. 47Maliya jula jwa ku Magadala ni Maliya mamagwe Yosefe ŵapaweni piŵaŵisile mtembo wa Yesu.

Currently Selected:

Mak 15: YAWO

Highlight

Copy