Mak 16

Yesu ŵajimwice ku ŵawe

(Mat 28:1-8; Luk 24:1-12; Yoh 20:1-10)

1Pilyamasile lisiku lyakupumula,* Maliya jwa ku Magadala, ni Maliya mamagwe Yakobo,* ni Salome ŵasumile mawuta gakununjila kuti akapakasye mtembo wa Yesu.* 2Kundaŵindaŵipe kwa lisiku lyandanda lya mlungu, lyakuyicisya Sabatojo jili jimasile, jemanjajo ŵajawile ku malembe kula, lyuŵa lili likopwece, 3nambo mwitala ŵaliji mkuwusyana kuti, “Ana ŵani ŵitakatugundumucisye liganga pa mlango wa lilembe pala?” 4Piŵalolecesye ŵaweni kuti ligangalyo lyaliji lyegundumusye kala pakuŵa ligangalyo lyaliji lyekulungwa mnope. 5Piŵajinjile mwilembemo ŵam'weni mcanda ali atemi kumbali ja ku mkono wamlyo, ali awete mkanjo weswela, nipo jemanjajo ŵasimonjile mnope.

6Nambo jwalakwejo ŵatite kuti, “Mkasimonga, ngumanyilila kuti mkumsosa Yesu jwa ku Nasaleti, juŵamkomele pa msalaba jula. Nganaŵa amuno; ajimwice ku ŵawe. Mlole aga gali malo giŵamŵisile jwalakwejo. 7Jemanja mjawule mkasalile ŵakulijiganya* ŵakwe, kusyesyene Petulo,* kuti, ‘Yesu alongolele kwawula ku Galileya. Timkamwone kweleko mpela yiŵatite pakumsalila.’ ”#Mat 26:32; Mak 14:28

8Pelepo acakongwewo ŵatyosile ku malembeko mwacitema, pakuti ŵagambaga kutetemela soni wakamwile woga. Nganamsalila mundu jwalijose kandu kalikose ligongo lyakuti ŵaliji mkogopa.

Yesu akuwonecela kwa Maliya jwa ku Magadala

(Mat 28:9-10; Yoh 20:11-18)

[ 9Yesu piŵajimwice ku ŵawe, kundaŵindaŵipe kwa lisiku lyandanda lya mlungu, pandanda ŵawonecele kwa Maliya jwa ku Magadala, jwejula juŵamkopwesye misimu jakusakala* msano ni jiŵili jula. 10Maliyajo ŵajawile kukwasalila ŵiŵatamaga ni Yesu ŵala, pandaŵijo jemanjajo cakamwile canasa soni ŵagambaga kulila. 11Atamose kuti jemanjajo ŵaliji ali apikene kuti Yesu ali cijumi, soni kuti Maliyajo am'weni Yesujo, jemanjajo nganakulupilila.

Yesu akuwonecela kwa ŵakulijiganya ŵakwe ŵaŵili

(Luk 24:13-35)

12Kaneko Yesu, ali mkuwoneka mwakulekangana ni kala, ŵawonecele ŵakulijiganya ŵakwe ŵane ŵaŵili, ndaŵi jemanjajo ŵaliji pa ulendo kusa kwa msinda wa Yelusalemu. 13Ŵakulijiganya ŵala ŵawujile kukwasalila acimjawo nambo nganiŵakulupilila jemanjajo.

Yesu akwatuma ŵakulijiganya ŵakwe

(Mat 28:16-20; Luk 24:36-49; Yoh 20:19-23; Mase 1:6-8)

14Pambesi pakwe Yesu ŵawonecele ŵakulijiganya likumi ni jumo ŵala ali mkulya. Yesu ŵajamwice jemanjajo ligongo lya ungakulupilila ni ungajiganyicika wawo, ligongo lyakuti jemanjajo nganiŵakulupilila acimjawo ŵiŵam'weni jwalakwejo ali ajimwice ku ŵawe. 15Myoyo Yesu ŵasalile ŵakulijiganyawo kuti, “Mjawule ku cilambo cosope capasi mkalalicile ŵandu wosope Ngani Syambone.*#Mase 1:8 16Jwele jutakakulupilile ni kubatisidwa, tacikulupuka, nambo jwangakulupililajo, tacilamulwa ni Mlungu kuti ali jwakulemwa. 17Ŵakukulupilila taciŵa ali mkutenda yindu yakusimonjeka mpela ayi: tacikoposya misimu jakusakala pakulikolanga lina lyangu, soni taciŵecetaga yiŵeceto ya cilendo,* 18soni naga akamwile lijoka kapena kumwa mtela wakuti mpaka kuwa nawo, ngasawulala kose. Naga akusajika magasa pa ŵandu ŵakulwala ŵanduwo tacipola.”

Yesu ŵajigalidwe kuja kwinani

(Luk 24:50-53; Mase 1:9-11)

19Ambuje Yesu piŵamasile kuŵecetana nawo, ŵajigalidwe kwawula kwinani, nipo ŵajile kutama ku mkono wamlyo wa Mlungu.#Mase 1:9-11 20Ŵakulijiganya ŵala ŵapite mcilalicila Ngani Syambone palipose. Ambuje ŵaliji mkamula masengo pampepe nawo, ŵasimicisyaga kuti maloŵe giŵalalicilaga ŵakulijiganyawo galiji gakuwona, ni gawonecelaga mu yindu yakusimonjeka yiŵatendaga.]

Kumalisya kwine

(16:9-10)

[ 9Acakongwe ŵala ŵajile kwa Petulo ni acimjakwe ni kwasalila yosope yene yiŵasalilidwe. 10Piyamasile yeleyi, Yesu ŵatumisye utenga wakwe wa cikulupusyo cangamala kungopoko lyuŵa ni ngapilo lyuŵa kupitila mwa ŵakulijiganya ŵakwe.]

Currently Selected:

Mak 16: YAWO

Highlight

Copy