Matthew 8
8
Jesus Mamititkaa Kiḷḷiġruaqtuqtuaq
(Mark 1.40-45; Luke 5.12-16)
1Tavra Jesus atqaġman iġġimiñ, iñugiapiaġataqtuat iñuich maliŋagaat. 2Tavrani, kiḷḷiġruaqtuqtuaq ullautiŋaruq ilaanun aasii sitquqłuni sivuġaanun uqaqłuni, Ataniiq, pisukkuvich mamititchumiñaġiŋma. 3Tavra Jesus isaaŋaruq aasii aksikł̣ugu uqallakłuni, Piyummatiqaqtuŋa. Mamittin. Tavra tavraŋŋatchiaq ilaan kiḷḷiġruaqtuutaa maminŋaruq. 4#Lv 14.1-32.Tavra Jesus uqallautiŋagaa, uqaqsaiḷiyumautin sumikunnii iñupayaamun, aglaan aullaġiñ, tautuktitchaktuġiñ aŋaiyyuliqsiqpaŋnun, aasii aitchuiḷutin aitchuunmik Moses-kun piraksriutauruamik, iñuich iḷitchuġiyumaut salummaqtautilaaġnik piqataullasivḷutin iñuŋnun.
Jesus Iłuaqsigaa Aŋuyaktit Atanauraŋata Kivgaŋa
(Luke 7.1-10)
5Tavra Jesus tikiḷġataviksillugu Capernaum-mun, Rome-miuguruam aŋuyaktit atanauraŋata paaŋagaa, qiññuaqtuġvigivlugu, 6uqaqłuni, Ataniiq, uvaptiŋni amma kivgaġa nalaruq, avatiŋi tuquvlutiŋ, iłuiḷḷiupiaġataqłuni. 7Tavra Jesus uqallautiŋagaa, Ullaglugu iłuaqsiñiaġiga. 8Tavra aŋuyaktit atanauraŋata kiuŋagaa, Ataniiq, nalliummatiŋitchuŋa isiġiaġumiñaġlutin iglumnun, aglaan uqallaksiññaġiñ piraksriunmik, aasii kivgaġa iłuaqsirauniaqtuq. 9Qanuq uvaŋaptauq ataniqaġmiuŋa atanauranik, aasii aŋuyaktiqaġmiuŋa aŋalatamnik. Uqallakama iḷaŋannun, Aullaġiñ, aullaġaqtuq. Suli allamun uqallakama, qaġġiiñ, ilaa qairaqtuq. Suli kivgaġikkamnun uqallakama, Una piuŋ. Taamna pisuummigaa. 10Tavra Jesus tusaaqqaaqługu ilaa uqaqtuaq, kamatchaŋaruq, aasii uqallautivlugich tamatkua maliġuaqtini, Iḷumun uqallautigivsi, Israel-guruaniunnii iḷitchuġiŋaitchuŋa iñuŋmik ukpiġutiqaqtigiruamik uumatun iñuktun. 11#Lk 13.29.Uqallautigivsi, iñugiaktuat Jew-guŋitchuat qaiñiaqtut nunapayauraniñ, aasii aquvitqataulutiŋ niġġiviŋñun piqatigilugu Abraham, Isaac-lu, Jacob-lu atanniqsimaviani Taavruma qiḷaŋmiittuam. 12#Mt 22.13; 25.30; Lk 13.28.Iḷaŋiḷḷi Israel-guruat miqłiqtuunasugiruat atanniqsimanniktuamun igitauniaqtut taaġniqsrauruamun. Tavrani iñuich qianiaqtut tiriqtillugiḷḷu kigutitiŋ. 13Tavrali aŋuyaktit atanauraŋannun Jesus uqallaŋaruq, Aullaġiñ. Taŋŋiqsuq apiqsrian ukpilianikavich. Tavra kivgaŋa iłuaqsirauŋaruq tavrauvvaa.
Jesus Iłuaqsigai Iñugiaktuat Iñuich
(Mark 1.29-34; Luke 4.38-41)
14Tavra Jesus isiqami Peter-m igluanun, ilaan tautuŋagaa Peter-m aakaruaŋa nalaruaq uunnautiqaqłuni. 15Jesus aksiŋagai argaŋi, aasii uunnautaiŋaruq, makitiqłuniasii niqłiuġutiaqsivḷugich.
16Taavrumani unnugiaqtuami iñuich qaġġirriŋarut iñugiaktuanik ilitqusiqł̣uqaqtuanik, aasii Jesus anittaŋagai ilitqusiqł̣uich uqaluŋmiñik, suli iłuaqsivḷugich iluqaisa naŋittuat. 17#Is 53.4.Taamna taŋŋiutausaŋaruq uqautigiŋaraanun uqaqtiŋan God-im Isaiah-m inna, “Ilaan piiŋagai suaŋairrutivullu naŋirrutivullu.”
Siġḷiġñaqtuq Iḷitchitqurauniq Jesus-mun
(Luke 9.57-62)
18Tavra Jesus tautukamigich iñugiapiaġataqtuat iñuich avatimiñi, piraksriŋagai iḷitchitqurani ikaaquvlugich taaguŋatchiġmun. 19Tavra iḷisaurri pitquranik ullautiŋaruq ilaanun aasii uqallautivlugu, Iḷisaurrii, maliġuaġniaġikpiñ sumupayauraq aullaġuvich. 20Tavrali Jesus uqallautiŋagaa, Pisukkaat sisiqaqtut, tiŋmiallu ugluqaqłutiŋ, aglaan Iġñiŋa Iñuum aimaaġviitchuq pimaaqtuġumiñakkamiñik. 21Allasuli iḷaŋat maliġuaqtiŋisa uqallaŋaruq ilaanun, Ataniiq, iḷuviġiallaktiqqaaġlagu aapaga, maliġuaqsaqpaallukkumagikpiñ iḷuviqqaaġlugu. 22Tavra Jesus uqallautigiññaŋagaa, Akkupak maliŋŋa. Tamatkua tuquŋaruatun ittuat iḷuvviuġlich tuquŋaruanik.
Jesus Quunniġuqtitkaa Imaq
(Mark 4.35-41; Luke 8.22-25)
23Tavra Jesus ikimman umiaqpauramun, iḷitchitquraŋisa ikiqasiŋagaat. 24Tavraasii anuqqałłaŋaruq, umiaqpauraqunnii iksruġaliqł̣ugu imġum. Aasii Jesus siñiŋaruq. 25Tavra ullakługu itiqsaŋagaat, uqaqłutiŋ, Annauttutigut Ataniiq, suksraugaqsirugut. 26Tavra ilaan uqallautiŋagai, Summan iqsivisi? Qanutun ukpiġutikisigivisi? Tavra Jesus makinŋaruq, aasii suakługik anuġiḷu imaġlu, aasii quunniġupaluŋaruq. 27Tavrani iñuich kamasupaluŋarut, uqaqłutiŋ, Qanusiq uvvauna iñuk, anuġivlu immavlu kamagillaniqpatku.
Jesus Iłuaqsigik Malġuk Ilitqusiqł̣uqaqtuak
(Mark 5.1-20; Luke 8.26-39)
28Tavra tikiñman taaguŋatchiġmun nunaŋannun Gadarenes, malġuk ilitqusiqł̣uqaqtuak paaŋagaak, iñukpalliqł̣utiŋ iḷuvviviŋniñ, iqsiñaqpaił̣ł̣utiŋ iñuich unnii tamaunaallaiŋaniqsuat. 29Tavra nipaalarraqsiŋaruk, Iġñiġuruatiin God-mun Suniaqpisiguk? Qaivich nagliksaaqtitchaqtuqłunuk nagliksaaqtitauviksraq nalautinŋaiñŋaan? 30Tavra tuttuqłusalaich niġiñiaŋarut uŋasiuraqłutiŋ iliŋiññiñ. 31Tavra ilitqusiqł̣uich apiġipiaġataŋagaat, Anitkuptigut, aullaqtittigut tuttuqługnun. 32Tavra Jesus uqallautiŋagai, Aullaġitchi. Tavra anikamiŋ aullaŋarut tuttuqługnun. Tavraasiikii, iluqaġmiŋ tuttuqłuich paŋaliŋarut suamavlutiŋ anmun qutaiḷakun ikpikun immamun, aasii ipivlutiŋ. 33Tavra qaunaksriruat tuttuqługnik pigruŋarut, aasii iniqpaŋmukamiŋ quliaqtuaġiŋagaich supayaurat, qanuqtilaaŋagniglu ilitqusiqł̣uqaqtuak. 34Tavraasii, iluqaġmiŋ iniqpaum iñuŋi qaiŋarut kasuġiaqługu Jesus. Aasii tautukamirruŋ apiġiŋagaat katchuŋaiqł̣utiŋ qimautitquvlugu ilimiŋniñ.
Currently Selected:
Matthew 8: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
