Matthew 9

Jesus Iłuaqsigaa Aulalaitchuaq Iñuk

(Mark 2.1-12; Luke 5.17-26)

1Tavra Jesus ikivluni umiaqpauramun ikaaŋarut, aasii tikił̣ł̣utiŋ ilaan iñuuvianun iniqpaŋmun. 2Tavra, qaġġirriŋarut ilaanun aulalaitchuamik, nalavlugu ikuvġamiñi. Tavra Jesus puttuqsrikamiuŋ ukpiġutaat uqallaŋaruq aulalaitchuamun, Quviasugiñ, iġñiiŋ. Piḷuutitin suliqutigiŋaiqsaurut itqaumayumiñaiqł̣ugich. 3Tavra iḷaŋich iḷisaurrit pitquranik uqaŋarut inmiŋnun, Una iñuk uqaqtuq iḷiuqłuni God-itun. 4Tavra Jesus iḷisimavlugich isumaŋich uqallaŋaruq, Summan pigiitchuanik isumavisi? 5Nalliak uvva siġḷiġnaił̣haaqpa uqallaktuni inna, Piḷuutitin suliqutigiŋaiqsaurut, naagga uqallaktuni, Makillutin pisuaġiñ? 6Ukpiġnaqsiḷiġniaġiga ilivsiññun Iġñiŋa Iñuum ataniġnaqutiqaqtilaaŋanik nunami suliqutigiŋaiġumiñaqługich itqaumayumiñaiġḷugich piḷuutit. Ilaa tavrani uqallaŋaruq aulalaitchuamun, Makillutin pisuaġiñ. Tigulugich ikuvġatin aggiiñ. 7Tavra makiłłuni aiŋaruq. 8Iñusalaich tautukamirruŋ, kamatchaŋarut, aasii nanġaŋagaat God suaŋŋatiqaqtitchiḷḷaruaq tainnatchimik iñuŋnun.

Jesus Ququaġaa Matthew

(Mark 2.13-17; Luke 5.27-32)

9Tavra Jesus aullaqłuni tavraŋŋa, tautuŋagaa iñuk atiqaqtuaq Matthew-mik aquppiruaq tax-iḷiqiviŋmi, aasii uqallautiŋagaa, Maliŋŋa. Tavra makiłłuni maliŋagaa. 10#Lk 15.1, 2.Qakugulimman, Jesus niġiyaqtuŋaruq Matthew-m igluanun. Tavrani iñugiaktuat tax-iñik katitchirit piḷuusiqirillu qaivḷutiŋ niġiñiaqasiŋagaat Jesus iḷitchitquraŋiḷu. 11Tavra Pharisees iḷitchuġikamirruŋ taamna, uqallautiŋagaich iḷitchitquraŋi, Summan iḷisaurriksi niġiqatiqaġuuva tax-nik katitchirinik piḷuusiqiriniglu? 12Tavra tusaakamiuŋ taamna, Jesus uqallaŋaruq, Tamatkua surruitchuat taaktituaksraitchut, aglaan tamatkua naŋittuat. 13#Mt 12.7; Ho 6.6.Aullaġlusi iḷitchaqtuqsiuŋ una sumik sivuniqaġmagaan, “Kipiġniuġutigigiga nagliktautquvlusi, ikipkautiłhiñaŋiḷaanik aitchuutinik.” Qaiŋaitchuŋa ququaġiaġlugich nalaunŋaruat aglaan isumalitqiquvlugich piḷuusiqirit.

Apiqqun Niġiḷaiḷaġnikun Aŋaiyyuuqłuni

(Mark 2.18-22; Luke 5.33-39)

14Tavra iḷitchitquraŋi John qaiŋarut Jesus-mun, uqaqłutiŋ, Suvlutauvagut Pharisees-lu aŋaiyyuuqapta niġiḷaitchuuvisa, iḷitchitquratin tainna piḷaisillugich? 15Tavra Jesus uqallautiŋagai, Iḷisimarusi katirrusiqiruanun tuyuġmiaqtauruat ipiqtusugniaŋitchut nayuqtigiŋŋaan uiksraun. Aglaan uiksrautim aullaurrauviksraŋa tikitchumaaqtuq, aasii taimanigu niġiḷaitpaallugniaqtut.

16Suli kiñapayaaq iḷaaqtuutiqalaitchuq iḷiġniġmik ugliŋaitchuamik ukił̣haamik annuġaaluŋmun, qanuq iḷaaqtuutauruaq algutiniaqtuq annuġaamiñ, aasii allaq aglił̣haaġluni. 17Naaggaunnii nutauruaq wine puuġnaitchuq puuġruanun. Puuġaluaqpan wine puuġruamik puvlagluni qaaġniaqtuq, aasii wine kuviḷuni, puuġlu maquluni. Aglaan nutauruaq wine puuġnaqtuq nutauruanun wine puuŋiññun, aasii iluqatiŋ puuġlu wine-lu maquŋił̣ł̣utiŋ.

Umialignam Pania, Aġnaġlu Aksiuktuaq Jesus Annuġaaŋanik

(Mark 5.21-43; Luke 8.40-56)

18Tavra tainna uqaġataviksillugu iliŋiññun, umialiŋnaq isiŋaruq aasii sitquqłuni sivuġaanun uqallaŋaruq, Paniga tuquqqammiqsuq. Qaiḷutin aksiugiaġuŋ, aasii iñuuniaqtuq. 19Tavra Jesus makiłłuni maliŋagaa, piqatigivlugich iḷitchitqurani.

20Tavra iglaupkaqtillugich, aġnaq nagliksaaġutiqaŋaruaq aunaaqsruġniġmik qulit malġugni ukiuni Jesus tunuanuŋaruq, aasii aksiullakługu siñiġutaa annuġaaŋan, 21isumavluni, aksiḷḷaksiññaġupkuunnii annuġaaŋa, iłuaqsiñiaġaluaqtuŋa. 22Tavra Jesus kiŋiaŋaruq, aasii tautukługu uqallaŋaruq, Quviasugiñ paniuruatiin, ukpiġurvich iłuaqsipkaġaatin. Tavra tavraŋŋatchiaq aġnaq iłuaqsiŋaruq.

23Tavra Jesus tikiññami umialiŋnam igluqpaŋanun, tautukługich atuqtuuraqtit suvluaqtuġnanik, iñusalaiḷḷu qiaqpaktuat, 24uqallaŋaruq, Annisitchi. Niviaqsiaġruk tuquŋitchuq. Siñiksiññaqtuq. Tavra ilaisa iglautigiŋagaat. 25Tavra iñusalaich anitauganiŋmata, ilaa isiŋaruq aasii tiguŋagaa argaŋisigun, tavrani niviaqsiaġruk makinŋaruq. 26Tavraasii uqaluk taavrumuuna siaminŋaruq nunaaqqipayaanun.

Jesus Iłuaqsigik Malġuk Ayauŋaruak Iññuk

27Tavra Jesus iglaupkaqtillugu tavraŋŋa, malġuk ayauŋaruak maliŋagaak, ququullatigillaan, Iġñiġuruatiin David-mun naglikkutiqaġiñ uvaptiŋnun. 28Jesus isiġman iglumun, ayauŋaruak ullaŋagaak, aasii Jesus apiġiŋagik, Ukpiqpisik uvamnun taamna piyumiñaġnivḷugu? Iliŋikta kiuŋagaak, Aaŋ, Ataniiq. 29Tavra ilaan aksiŋagaik iriŋik, uqaqłuni, Ukpiġutiqaqtilaaptiktun taamna pirauli iliptiŋnun. 30Tavra iriŋik tautullasiŋaruk. Tavraasii Jesus piraksripiallaŋagik, Suuramikunnii uqaġnatik kimulliqaa. 31Tavra aullaqłutik siaminŋagaak iḷisimanautaa Jesus nunaaqqipayaanun.

Jesus Iłuaqsigaa Uqalaitchuaq Iñuk

32Aullaqsalgiñmiullu iñuk uqalaitchuaq ilitqusiqł̣uqaqłuni qaġġisiŋagaat ilaanun. 33Tavra ilitqusiqł̣uk anitauganiŋman, uqalaitchuaq iñuk uqallasiŋaruq, aasii iñusalaich kamasuŋarut, uqaqłutiŋ, Qaŋaunnii innasiq iḷisimanaŋaitchuq Israel-mi. 34#Mt 10.25; 12.24; Mk 3.22; Lk 11.15.Tavrali Pharisees uqallaŋarut, Ilaa anittairuq ilitqusiqł̣ugnik ikayuqtiqaqłuni umialgannik ilitqusiqł̣uich.

Jesus Nagligigai Iñuich

35 # Mt 4.23; Mk 1.39; Lk 4.44. Tavra Jesus kukiḷuŋaruq iluqaiññi iniqpaŋni nunaaqqiuraniḷu, iḷisaurrivḷuni aŋaiyyuviŋiññi, alġaqsruivḷuniḷu tusaayugaaġiksuaŋiñik God-im atanniqsimmataata iñuŋnun, iłuaqsivḷugiḷḷu naŋirrutipayaat suaŋairrutipayaallu. 36#Nu 27.17; 1 K 22.17; 2 Ch 18.16; Ez 34.5; Mk 6.34.Tavra Jesus tautukamigich iñusalaich, nagligiŋagai, qanuq irrusiqaŋarut qanuqsausiiqsuatun ikayuqtaiḷḷiuqłutiglu, imnaisun munaqsraitchuatun. 37#Lk 10.2.Tavra Jesus uqallaŋaruq iḷitchitquramiñun, Iñusalaich utaqqirut tusaayumavlutiŋ tusaayugaaġiksuanik palauvaksratun nauganiktuatun kipisałhiñaaġuqługich, aglaan savaktit iñukitchut. 38Tavraasii qiññuaqtuġitchi Atanġanun nautchiaqaġvium tilisivsaaqulugu savaktiksravsaamiñik.

Currently Selected:

Matthew 9: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat