Matthew 7
7
Jesus Iḷisaurriruq Qanuqinniġaqłiġñasi
(Luke 6.37-38, 41-42)
1Qanuqinniġaqłiġñasi allanik, God-ivli qanuqinniġaġniaŋiñmigaasi. 2#Mk 4.24.Qanuq qanuqinniġaunmik uqallautiqaġuvsi taavrumiŋa qanuqinniġausiaqaġniaqtusi. Qanutchikun qanuqinniġaiguvsi tuniqtusiḷugu naagga tunikiḷḷugu, tainnatuttauq qanuqinniġausiaqaġniaġmiusi. 3Summan pasivisigik aniqatisi killuliqirualivḷugich ilivsi pigiił̣haaġaluaŋŋavsi? 4Tainna pikavsi, iñuktun ittusi qirugruaġmik irimiutaqallaġmi irriugauramik piiqsiñiataktuatun aniqanmi iraaniñ. 5Ukpiŋŋuaqtuasii, iłuaqsruqqaaġitchi ilivsiññun, aasii ikayuġumiñaqsivaalluglugich aniqatisi killukuaġutiŋiññik.
6Iḷisautiniatagnagich uumisuglutiŋ paaqsaaŋaruat God-mun qanuq qimmisun ittut saallusi ugiaġniaqsaġumaruatun ilivsiññik. Iḷisautiniaqsaġaluaqtuni ittut iḷisimmatun uyaġagnik akisuruanik tuttuqłuich sivuġaannun. Puttuqsrisaitchut akisutilaaŋanik aasii tunmalugigiññaqługich.
Aŋaiyyusitchi Ivaqłiasitchi Tigluktuġitchi
(Luke 11.9-13)
7Aŋaiyyuguvsi, qapiŋaiḷḷusi qiññuaqtuġitchi aitchuusiaqaġniaqtusi, qapiŋaiḷḷusi ivaqłiasitchi paqinniaġiksi ivakkaqsi, qapiŋaiḷḷusi tigluktuġitchi aasii upkuiġutiniaġaasi. 8Qanuq iñupayaaq qiññuaqtuqtuiññaqtuaq aitchuusiaqallaruq, suli ivaqłiatuiññaqtuaq paqitchivḷuni, iñuk suli tigluktuqtuiññaqtuaq upkuiġurriqaġniaqtuq. 9Nallivsi aapauruasii aitchuġumiñaitkiksi iġñiqsi uyaġagmik apiġikpasi punniqaġugluni, 10naagga aitchuġumiñaitkiksi nimiġiamik apiġikpasi iqaluqaġugluni. 11Tavraasii ilivsi, nakuuŋitkaluaŋŋavsi, aitchuisuurusi nakuuruanik miqłiqtuvsiññun, qanutułhaaq aasii Aapari qiḷaŋmiittuaq aitchuiyumiñaqtigiruq nakuuruanik tamatkunuŋa qiññuaqtuqtuanun inmiñun.
12 #
Lk 6.31. Tavra qanupayaaq pitquyumaguvsi iñuŋnun, tainnatulli pisigik, qanuq taamna taŋŋiutauruq pitquranun qaisauruanun Moses-kun, iḷisaurrutiŋiññullu God-im uqaqtiŋisa.
Niġukitchuaq Isiġiaq
(Luke 13.24)
13,14Isiġitchi niġukitchuakun isiġiakun. Isiġiaq niġukitchuq siġḷiġnaqtuġlu apqun kaŋŋiññaqtuaq qiḷaŋmun aasii iñukitchut iñuich paqitchiruat tamattumiŋa apqunmik. Aasiivsauq igḷuani iñugiaktuat isiŋagaat niġuturuaq isiġiaq aasii iglauvigivlugu siġḷiġnaitchuaq apqun kaŋŋiññaqtuaq nagliksaaġviŋmun.
Napaaqtuq Siiġñaŋiḷu
(Luke 6.43-44)
15Nipuŋaitchitchi uqaqtauŋŋuaqtuanik God-mun, qanuq qaisuurut sagluqinnigukłutiŋ qiññaqaqłutiŋ imnaisun anniaqłiḷaitchuatun. Iliŋich ipiaġataqtut kaaksiuruatun amaqqutun anniaqłiġumiñaqtuatun ilivsiññik. 16Ami iḷitchuġiniaġisi piḷġusiŋisigun, napaaqtututtauq siiġñaŋisigun iḷitchuġimmatun. Grapes siiġñat naulaitchut nauruaniñ kakiḷḷaġnaliŋniñ, fig-giḷḷu siiġñat. 17Tavra napaaqtuġiksuat siiġñisuurut siiġñaġiksuanik, aglaan napaaqtuġiitchuat siiġñaġiitchuanik. 18Napaaqtuġiksuaq siiġñiyumiñaitchuq siiġñaġiitchuanik, naaggaunnii napaaqtuġiitchuaq siiġñaġiksuanik. 19#Mt 3.10; Lk 3.9.Napaaqtupayaaq nauriḷaitchuaq siiġñaġiksuanik kipisuugaat aasii qirriutivlugu igniġmun. 20#Mt 12.33.Tainna tavra uqaqtauŋŋuaqtuat God-mun iḷisimaniaġisi pilġusiŋisigun.
Qaŋaunnii Iḷisimaŋaitkivsi
(Luke 13.25-27)
21Iḷaŋich uqaqtuat uvamnun inna, Ataniiq, Ataniiq, isiġumiñaitchut atanniqsimavianun Taavruma qiḷaŋmiittuam, aglaan iñupayaaq kamaksriruaq pisuutaanik Aapama qiḷaŋmiittuam isiġniaqtuq. 22Taivrumani isivġiġviŋmi iñugiaktuat uqaġniaqtut uvamnun, Ataniiq, Ataniiq, uqaqtauŋaitpisa God-mun pisivlutin, anittaiŋaitpisalu ilitqusiqł̣ugnik atuqługu atqiñ, suli piŋaitpisa iñugiaktuanik aliuġnaqtuanik atuqługu atqiñ? 23#Ps 6.8.Tavraliasii nalupqinaiġḷugu uqallautiniaġitka, qaŋaunnii iḷisimaŋaitkivsi, aullaġitchi uvamniñ, ilivsi piḷuusiqirit.
Malġuk Igluqpirik
(Luke 6.47-49)
24Iñupayaaq tavra tusaaruaq makkuniŋa uqalumnik aasii kamagivlugich arriqaġniaqtuq isumaturuamik iñuŋmik igluqpiruamik uyaġagruam qaaŋanun. 25Tavraasii sialuguqtuq, ulittuġlu, anuġi anuqqaŋmivḷuni aasii qasaqtaqługu taamna igluqpak, aasii ulġuŋitchuq, qanuq maŋŋuqaŋaruq uyaġagruamun. 26Aasiisuli iñupayaaq tusaaruaq makkuniŋa uqalumnik aasii kamagiŋił̣ł̣ugich arriqaġniaqtuq isumalluaġiitchuamik iñuŋmik igluqpiruamik qaviam qaaŋanun. 27Tavra sialuguŋaruq, suli uliłłuni, anuqqaŋmivḷuni aasii qasaqtaaqsivḷugu taamna igluqpak, aasii ulġuŋaruq suksraunġipiallakłuni.
Jesus Ataniġnaqutaa
28 #
Mk 1.22; Lk 4.32. Tavra Jesus uqaŋaiġataġman taapkuniŋa uqaluŋnik, iñusalaich kamasuutiqaŋarut iḷisaurrutiŋiñik, 29qanuq ilaan iḷisautiŋagai iñuktun ataniġnaqusiraqtuatun, iḷisaurriŋił̣aaŋisitun pitquranik.
Currently Selected:
Matthew 7: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
