Matthew 6

Jesus Iḷisaurriruq Qanuq Nagliktuiñaqtilaamik

1 # Mt 23.5. Qaunagisitchi piraġausiqaġuŋiḷḷusi nagliktuutivsiññik qiñiqusaaqsiññaġlusi sivuġaŋanni iñuich. Tainnatuaġuvsi Aapavsi qiḷaŋmiittuam akiḷiġumiñaitkaasi.

2Tavra, aitchuiguvsi nagliktuutinik, nipauqłuktautiginagich, ukpiŋŋuaqtuat piḷġusiatitun aŋaiyyuviŋñi apqutiniḷu, nanġaqusaaqłutiŋ iñuŋnun. Iḷumun uqallautigivsi, akiḷiusiaqaaniktut. 3Aglaan ilivsi aitchuiguvsi nagliktuutinik, iḷisimapkaġniatagnasi saumiksi nalupkaġmatun suliqitilaaŋanik taliqpivsi. 4Nagliktuisitchi nalunaqtuakun, aasiiḷi Aapavsi tautullaruam nalunaqtuami akiḷiġñiaġaasi.

Jesus Iḷisaurriruq Aŋaiyyunikun

(Luke 11.2-4)

5 # Lk 18.10-14. Aasiisuli aŋaiyyuguvsi, piññasi ukpiŋŋuaqtuatun, qanuq iliŋich makitavlutiŋ aŋaiyyullaturut aŋaiyyuviŋñi apqutillu kayyaaŋiññi, tautuqusaaqłutiŋ iñuŋnun. Iḷumun uqallautigivsi, akiḷiusiaqaaniktut. 6Aglaan ilivsi aŋaiyyuguvsi, isiġitchi inauravsiññun aasii umiqqaaġlugu upkuaq aŋaiyyuaqsiḷusi Aapavsiññun nalunaqtuamiittuamun, aasiiḷi Aapavsi tautullaruam nalunaqtuami, akiḷiġñiaġaasi. 7Suli aŋaiyyuniġmi uqallakkaluamiiġñasi taŋiġitchuanik uqaġniġnik Jew-guŋitchuat piḷġusiatitun, qanuq isumasuurut tusaarauniaġnivḷutiŋ pisigilugich iñugiaktuat uqalutiŋ. 8Tuvraġnasigik, qanuq Aapari iḷisimaruq sunik pigiraksraġikkavsiññik sivuani apiqsriŋaiñŋavsi inmiñun. 9Aŋaiyyusitchiasii inna:

Aapavut qiḷaŋmiittuatiin, iñuich qiksigilisin.

10Ilivich atanniqsimakkich iñupayaat. Iñupayaat piḷich pisuutignik nunami, qiḷaŋmi pisuutignik piruatun.

11Aitchuqtigut uvlupak niqiksraptiŋnik.

12Suli suliqutigiŋaikkich itqaumayumiñaiġḷugich piḷuutivut, uvaguttauq suliqutigiŋaiġmatun itqaumayumiñaiqł̣ugich tamatkua piḷuksiruat uvaptiŋnun.

13Suli ikł̣igutchaktinniaqtinnatigut, annautilutalu piḷuktuamiñ. [Qanuq ilivich umialgurutin suaŋŋatiqaqłutin kamanautiqaqłutillu isuitchuamun. Aamian.]

14 # Mk 11.25, 26. Qanuq suliqutigiŋaiġuvsigik itqaumayumiñaiġḷugich iñuich piḷuutiŋich, Aapavsi qiḷaŋmiittuam suliqutigiŋaiġñiaġmigai itqaumayumiñaiġḷugich piḷuutisi. 15Aglaattauq suliqutigiŋaiġumiñaitkuvsigik iñuich piḷuutiŋich, Aapavsivsauq suliqutigiŋaiġumiñaiñmigai piḷuutisi.

Jesus Iḷisaurriruq Niġiḷaiññikun Aŋaiyyuuqłuni

16Suli niġiḷaitkuvsi aŋaiyyuuġlusi, qiññaqaġnasi ipiqtunaqsiḷusi ukpiŋŋuaqtuatun, qanuq ilaisa qiññaġiiḷiraġigaich kiiññatiŋ niġiḷaisilaaqtiŋ tautuquvlugu iñuŋnun. Iḷumun, uqallautigivsi, akiḷiusiaqaaniktut. 17Aglaan niġiḷaitkuvsi aŋaiyyuuġlusi, allaŋŋuqtiġnagu kiiñaqsi, 18iñuich naluyumagaat niġiḷaiññiqsi aŋaiyyuuqłusi, aglaan Aapavsi nalunaqtuamiittuam iḷisimagaa, aasii Ilaan tautuaġiruam nalunaqtuami akiḷiġñiaġaasi.

Jesus Iḷisaurriruq Suġaliqtigun

(Luke 12.33-34)

19 # Jas 5.2, 3. Tutquiñasi mattumuŋa nunamun ilivsi piksravsiññik suġaliġnik, qupilġullu qalġuvlu maqutchuugai, suli tigligayuktit siqumutivlutiŋ tigligaġviannun. 20Aglaan tutquisitchi qiḷaŋmun ilivsi piksravsiññik suġaliġnik. Tatpagmani qupilġuitchuq qaliḷaitchuġlu maqutchiruksranik, tigligayuktaitchuġlu siqumutilutiŋ tigliktuksranik. 21Qanuq irvianni suġalivsi, tavraniitchugniaġmiusi.

Qaumman Timimun

(Luke 11.34-36)

22Irrak nannisun ittuk timimun. Irisi surruitpata tautuksisuġniaqtusi iñuulluataġniksramik tuvraġlugu God-im sivunniutaa. Inniaqtusi siḷivinŋaruatun qaummaġiksuamik. 23Aglaan irisi surruiñŋitpata tautugluatayuiññiaqtusi iñuulluataġniksravsiññik, God-im sivunniutaa tuvralguiḷḷugu. Inniaqtusi siḷivinŋaruatun taaqtuamik. Tavraasii isumagaluaġuvsi iñuunasugalusi God-im iñuutqutaatun makimaŋallaan God-im sivunniutaa, qanutun killukuaqtigirusi.

Jesus Iḷisaurriruq God-mik, Suġaliqtigullu

(Luke 16.13; 12.22-31)

24Kiñaliqaa savakkumiñaitchuq malġugnik ataniqaġluni atautchikun, qanuq ilaan uumiginiaġaa igḷua aasii piviaġilugu igḷua. Naaggaunnii qiksiksrautiqaġluni igḷuanun aasii suuŋiḷaġilugu igḷua. Savautiyumiñaitkiksi God suġallagniaġniġlu atautchikun.

25Tavraasii uqallautigivsi, uŋiarrisiqaġnasi niqiksravsiññik, imiksravsiññiglu iñuusukpaiḷḷusi, naaggaunnii annuġaaksravsiññik. Iñuggun naumałhaaqtuq niqiksraqsiuqsiññaġniġmiñ, suli timi naumałhaaqtuq annuġaaniñ. 26Qiñiqsigik tiŋmiat tiŋmiruat siḷami, kanġaqsruiḷaitchut nautchiaksranik naagga kivriḷaitchut katitchiḷaitchullu suġalliqpiŋñun, naaggauvva Aapavsi qiḷaŋmiittuam niġipkaqsimaaġai. Ilivsi akisułhaaqtusi tiŋmianiñ. 27Nalliqsi iñuuniqtusiḷaaġumiñaitchuq uŋiarigiññaġluni.

28Aasii summan uŋiarrisiginiqpisiuŋ annuġaaksraq? Isumalaaġutigisigik nauriat qanuq nautilaaŋat. Siġġaqilaitchut ukił̣harriulaitchullu, 29#1 K 10.4-7; 2 Ch 9.3-6.uqallautigivsi, Solomon unnii qanutun kamanaqtigigaluaqłuni annuġaaŋaitchuq atautchisun-unnii tamatkunatun nauriatun qiñiyunaqtigiliġḷuni. 30Tainnatun God-im qaunagillaniqpagich nauriallu ivgiḷḷu uvlupałhiñaq nauruat aasii uvlaakun qirriutivlugich igniġviŋmun, nalupqinaitchuq annuġaaksraqaqtinniaġaasi. Qanutun ilivsi ukpiġutikisigirusi uŋiariruasii. 31Tavraasii uŋiariñasi. Apiqsruqtuġnasi inna, sumik niġiñiaqpisa? Sumik imiġniaqpisa? Sumik annuġaaġniaqpisa? 32Qanuq ukpiŋaitchuat piññagniaġuurut iluqaiññik tamatkuniŋa. Aapari qiḷaŋmiittuaq iḷisimaruq piqaqtuksrautilaavsiññik iluqaiññik tamatkuniŋa. 33Tavraasii piqaqtinniaġaasi iluqaiññik tamatkuniŋa ilivsi atanniqsimapkaqqaaġuvsi God-mun iñuulusiḷu nalaunŋaruakun. 34Taamna tainnainman, uŋiarrisaġinagu uvlaakuksraq, qanuq uvlaakun iñuk uŋiarrisiqaġumiñaqtuq uvlaakun piruanik. Uvluġaġikpan uuktuaġusiat naamarut uvlullaanun.

Currently Selected:

Matthew 6: INUPIAQ

Highlight

Copy

Want to have your highlights saved across all your devices? Sign up or sign in

Iñupiatun Mumiksat Uqalugiksuat (North Slope Iñupiaq Bible) © American Bible Society.

Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:

American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)

Learn More About Iñupiatun Mumiksat Uqalugiksuat