Ephesians 5
5
Iñuusitchi Qaummaġmi
1God-im tainna piqpagivlusi miqłiqtuliutimmasi ilivsiḷi tainnatun piñiḷuktuksraurusi avanmun, qanuq ilaan piviuttaġivlusi miqłiqtuġigaasi. 2#Ex 29.18; Ps 40.6.Piviuttaqqutiqpaqaġitchi allanun iñuŋnun, maliġuaġlugu tuvraaksriutaa Christ piviuttaġivluta aitchuutigiŋaruq inmiñik God-mun tuqutauvluni piḷuutaiġukłuta. Tainna pikami, iviġaŋagaa God, taipkunatun ikipkairuatun niġrutinik aitchuikamiŋ ilaanun.
3God-im iñugimmasi allatuqtuksrauŋitchusi, qanusipayaamiglu pigiitchuamik, kaviuqtuksrauŋitchusiḷu suuramik-unnii. 4Uqautiqaqtuksrauŋitchusiḷu kanŋunaqtuanik. Uqaqtuksrauŋiñmiusi asiḷiqqutauruanik, suli pigiitchuanik uqaqtuksrauŋitchusi. Aglaan iłuałhaaqtuq nanġaġuvsiuŋ God. 5Una nalupqinaigisiuŋ, kiñaliqaa allatuqtauruaq isiġumiñaitchuq atanniqsimavianun Christ God-ivlu naagga pigiiḷḷiqirauruaq naaggaunnii kaviuqtauruaq, kaviuġiłhaaqługich iñuiḷḷu sullu God-miñ. Taamna iñuuraqpaqaġniġuruq.
6Kimulliqaa sagluqipkaġnasi iḷumun inŋitchuanik uqaluŋnik, qanuq tamatkua pisigilugich God-im tatavsaġniaġai kamasulaitchuat inmiñik. 7Sagluqinniŋniaqtuanun piqasiqsuutinasi. 8Ilivsivsauq piḷuusiqiugaġuuŋagaluaqtuasii iñuummatun taaġmi, paŋmapak Atanġum iñugiliutimmasi, piḷuusiqiugaŋaiqsusi, qaummaġmi iñuuruatun. Tavraasii iñuutuiññaqtuksraurusi qaummaġmi. 9Iñuukavsi qaummaġmi, iñuupkaqtitaurusi nakuupiaqtuakun nalaunŋapiaqtuakullu iḷumupiaġlu ittuakun. 10Iḷitchisaiññaġitchi iñuuniaġniġmik iviġaumasuglugu Ataniq. 11Piqasiqsuutinasi iñuŋnun piḷġusiqaqtuanun anniqsuutauŋitchuanik, iñuuvlutiŋ taaqtuami. Aglaan satqummiqsigik piḷġusiġiitchuaŋich qaummaġmun. 12Qanuq kanŋunaqtut-unnii uqautigisaqtuni piḷġusiŋich nalunautchivḷutiŋ. 13Satqummiġuvsigik qaummaum qaummaġigviginiaġai piḷuutiŋich aasii satqummiġḷugich aasii iḷitchuġigumiŋ qanutun killukuapiaġataqtilaamiŋnik, iḷaŋich iḷaanni iñuurraqsiñiaqtut qaummaġmi. 14Taamna pisigivlugu God uqallaŋaruq Bible-ni inna, “Itiġiñ siñiktii, qimakkich tuqqutauyumiñaqtuat piḷuutitin, aasiiḷi Christ iñuullasipkaġniaġaatin qaummaġmi.”
15Qaunakłaapiaġitchiasiiñ qanuq iñuutilaavsiññik, isumalluaġiitchuatun iñuktun piŋaiġḷusi aglaan isumaturuatun, 16#Col 4.5.atułhamaniaġlugu piviksraq anniqsuunmun, qanuq makkunani uvluni iñugiaktut pigiitchuat piñaiḷutchiqsuutit uvaptiŋnun savautitchaiḷisaavlugu Ataniq. 17Tavraasii isumalluaġiiññasi, aglaan uvlutuaqpan nalupqinaiġñiḷuksiuŋ tuvraġuglugu suna Atanġum pitqukkaŋa ilivsiññun. 18Suli imiŋasisiqaġnasi taaŋŋaġmik, qanuq taamna piaġiitchuamun pialapiaġataġniġmun ittuq, aglaan Ilitqusiġiksuamun aŋalatittitchi, 19#Col 3.16, 17.uqaurrutilusi avanmun psalms-nik nanġautiniglu ilitqutchikullu atuutinik, atuġlusi atuutinik, psalms-niglu Ataniġmun iḷuvsiññiñ, 20ataramik quyyatigilugich supayaat God-mun Aapamun, atqagun Atanipta Jesus Christ.
Tuvaaqatigiich
21Qiksiksrautiqaqavsi Christ-mun, kamakkutiugaġitchi avanmun. 22#Col 3.18; 1 P 3.1.Nuliaguruasii, kamagisigik uisi, kamagimmatuttauq Ataniq. 23Qanuq uiguruaq ataniġnaqutiqaqtuq nuliamiñun Christ-tuttauq ataniġnaqutiqaqtuatun aŋaiyyuliqiruanun, suli Christ ilaa annaurrigigaat aŋaiyyuliqiruat, ilaan timigimmatun itaŋisa. 24Aŋaiyyuliqiruatun kamakkutiqaqtuatun Christ-mun, tainnatuttauq nuliaguruat kamakkutiqaġlich uimiŋnun supayaatigun.
25 #
Col 3.19; 1 P 3.7. Uiguruasii, piviuttaġisigik nuliasi, tainnatuttauq Christ piviuttaġimmatun aŋaiyyuliqiruat suli aitchuutigivluni inmiñik pisigivlugich tuqutauvluni. 26Ilaa tainna piŋaruq aŋaiyyuliqiruat ilaaguaqsaqługich God-mun, akuqtuġnaġumiñaqsisaqługich piraksriŋagai paptaiqsautquvlugich kamagilugiḷḷu uqaluŋni. 27Ilaa tuquŋammiuq iñuich aŋaiyyuliqiruaġuġlugich ilaan pigiliutisukługich. Niviaqsiaq aŋunmun tuvaaqasiutiruatun ilaan aŋaiyyuliqiruani piḷuutaitqugai naġġunaqtuagiḷḷugich piññaġnaqtuatun niviaqsiatun tuvaaqatiksrautiqaqtuatun salumavluni qanusiḷimaamiñ suaġiirrunmiñ. 28Uiguruat piviuttaġiraksraġigaich nuliatiŋ nanmiñiq timimiktun iḷiḷugich. Iñuk piviuttaqsriruaq nuliamiñik piviuttaġiruq inmiñun. 29Qanuq qaŋaunnii iñuum uumigiŋaitkaa timini, aglaan pamatchuugaa qaunagivlugulu, Christ-tauq qaunaksrimmatun aŋaiyyuliqiruanik, 30qanuq ilaan uvagut timigimmatun itkaatigut atausiŋŋuqatigivluta. 31#Gn 2.24.Bible uqaluŋiññi God uqallaŋaruq inna, “Taamna pisigilugu, aŋutim qimaguuniġik aapaniḷu aakaniḷu aasii nayuqsiutivlugu nuliani. Tavra iliŋik malġuuruak atautchisun iñuktun iḷiñiaqtuk.” 32Kamanaqtuaq iḷisaurrun salapqiŋaruq taavrumuuna Bible uqaluatigun tuvaaqatigiikkun, aasiivsauq kaŋiqsigiga sivuniqaqtilaaŋanik Christ-mullu aŋaiyyuliqiruanullu. 33Suli sivuniqaġmiuq ilivsiññun tuvaaqatigiiksuanun. Aŋutipayaam piviuttaġiraksraġigaa nuliani ilimisun iḷiḷugu, suli nuliaguruam isummatigilluataġlugu uiñi.
Currently Selected:
Ephesians 5: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
