Ephesians 6
6
Miqłiqtullu Aŋayuqaallu
1 #
Col 3.20. Miqłiqtuut, kamagisigik aŋayuqaasi Ataniq atausiŋŋuqatigiŋakavsiuŋ. Taamna nalaunŋaruq. 2#Ex 20.12; Dt 5.16.Qutchiksuakun isummatigisigik aapasiḷu aakasiḷu, taamna unniqsuqłiisiqaqqaaqtuq pitquraniñ 3piḷḷuataun itchumauq ilivsiññun suli iñuuyumausi sivisuruamik nunami. 4#Col 3.21.Aŋayuqaaguruasii qinnaguksaaġnagich miqłiqtusi, aglaan iñukkuksaqsigik natqiksruutigilugich siḷġiqsuutigilugiḷḷu Atanġum iviġaumagikkaŋi.
Kivgallu Kivgaqaqtuallu
5 #
Col 3.22-25. Kivgauruasii, kamakkutiqaġitchi tamatkunuŋa nunami ataniġikkavsiññun, qiksigilugich savautilluatapiaġlugich, savaurriyumalaaġlusi savautimmatun Christ. 6Savaŋaiġḷusi qiñiqtiqaġuvsi kisian iñuŋnik iviġaiñiaqtitun, aglaan piḷusi kivgaŋisun Christ, savaaġilugu pisuutaa God-im piyumalaaġlusi. 7Tavraasii savaurrisitchi piyummatigiksuakun savaŋmatun Ataniġmun, iñuŋnik savaurriŋiñmatun, 8iḷisimalusi kialiqaa nakuurualiqiani tainnatuttauq aitchuusiaqautiginiaġaa Ataniġmiñ, kivgaugaluaġumi naagga atanġitkaluaġumi. 9#Col 4.1; Dt 10.17; Col 3.25.Atanġuruasii, tainnatuttauq pisitchi kivgavsiññun sivuuġasaaqsaiḷiḷugich, iḷisimalusi Ataniŋat ilivsiḷu Ataniqsi qiḷaŋmiittuaq aŋalatchisilaaŋanik ativlugich iñupayaat.
Annuġaat Aŋuyaunnat God-im Aitchuutiŋi
10Aasiisuli, suaŋŋatiqaġitchi ikayuutaagun ilaan sapiġñaqtuam suaŋŋataata atausiŋŋuqatigiŋalugu Ataniq, 11atuġlugu iluqaan suaŋŋan God-im aitchuutaa ilivsiññun, Tuunġaum payariŋitchumagaasi pisaasuġmiaġunmigun. 12Qanuq aŋuyaŋitkivut iñuich timiqaqtuat, aglaan aŋalatchiruat ilitqusiqł̣uich siḷami, atanaurallu pigiitchuat aŋalatchiruat iñuŋnik mattumani nunami, suaŋŋatillu aŋalatchiruat pigiitchuanik makkunani uvluni. 13Tavraasii ataramik atuqsiuŋ iluqaan suaŋŋan God-im qaisimaakkaŋa, payariyumagisi Tuunġaum piḷuksipkaġniutiŋi uvlut pigiiḷikpata. Itqanaitchitchi aŋuyaktitun iluqaisa atuġlugich aŋuyaunnat annuġaasi igḷutuġumiñaġumagisi akiḷḷivsi piyuaġutiŋi kiŋuppiasuŋaġnasi.
14 #
Is 11.5;
Is 59.17. Tavra itqanaitchitchi. Aŋuyakti tavsiaġiksaaŋaruatun, tainnatun iḷumun illusi God-mun, suli aŋuyakti satqagutituqtuatun qatikkaaġnaiḷutaġivlugu, tainnatulli iñuuniaġitchi nalaunŋaruakun. 15#Is 52.7.Aŋuyaktitun anŋiqpaktuqtuatun puukayasiasuŋił̣ł̣uni, tainnatulli itqanaitchitchi quliaqtuaġisaalukkumiñaġlugu tusaayugaaġiksuaq aŋuyautairrutauruaq. 16Ataramik suaŋali ukpiġurri Ataniġmun, Tuunġaum anniaŋitchumagaasi, aŋuyaktim akkiġautaata qamitqataġmatun ikualaruat qaġruŋi akiḷḷimi. 17#Is 59.17.Aŋuyaktisuli aŋuyaunnamun nasauttamiñun niaqquaqtaiḷimmatun, tainnatulli annaurraunivsi pitchaiḷigaasi pigiitchuamun. Suli God-im uqaluŋi Ilitqusiġiksuam qaisaŋi ilivsiññun savikpagimmatun illugich. 18Taamna iluqaan pisiuŋ aŋaiyyutigilugu, apiġilugu God ikayuqulusi. Supayaaġuvsi aŋaiyyuuġlusi Ilitqusiġiksuam piyummiqpasi. Taamna pisigilugu nipuŋaitchitchi suli suuramikunnii qapiġnasi, aŋaiyyutilugiḷḷu ataramik God-im iñuŋi. 19Aŋaiyyutiluŋalu uvaŋa, God-mun aitchuquluŋa uqaluksramnik, uqaqtuksraġuġaġiguma uqaurriyumauŋa sapiqsrautaiḷḷuŋa, iḷitchuġipkallalugulu tusaayugaaġiksuam kaŋiqsiñaitchuaŋa. 20Taamna tusaayugaaġiksuaq pisigivlugu uvaŋa Atanġum kivgaksraqtaaŋa tigutaaqtauruŋa. Aasii kiikaa aŋaiyyusitchi tusaayugaaġiksuaq uqautigiyumagiga taluqsraŋaiġḷuŋa uqausiksraptun.
Paġlasuiqsaaġutit
21 #
Ac 20.4; 2 Ti 4.12. #
Col 4.7, 8. Paŋmapak iḷisimatqummigivsi qanuqitilaamnik suliqitilaamniglu, Tychicus piviuttaġirauruam aniqatim suli kivgaulluataqtuam Ataniġmun quliaqtuaġutiniaġaasi supayaanik uvapkun. 22Tiliñiaġiga ilivsiññun taamnapiaġataq pisigilugu, iḷisimatqulusi qanuqitilaaptiŋnik, suli ilaanun qapiŋaisaaqulusi. 23God-iptuq Aapauruam Atanġuvlu Jesus Christ tutqiutiqaqtillisi piviuttaqqutiqaqtillusiḷu iluqaiññun aniqatinun, ukpiġutiqaqtillusiḷu. 24Nagliktuutiqpak illi iluqaiññun piviuttaqsriruanun Ataniptiŋnik Jesus Christ-mik nuŋulaitchuamik piviuttaqqunmik.
Currently Selected:
Ephesians 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
