1 Timothy 2
2
Qanuq Ukpiqtuat Aŋaiyyuniksraŋat Piḷġusiksraŋallu
1Tavra apiġipiaġivsi aŋaiyyutigiłhaaquvlugu sivulliġilugu aŋaiyyutilugich iñupayaat, qiññuaqtuutilugich God-mun nagligitqulugich, quyyavigilugu supayaatigun ilaan piñiakkaŋigun pisilugich iñuich. 2Aŋaiyyutilugich umialgich iluqaisalu ataniġnaqusiraqtuat, iñuuyumaugut tuaksruitchuamik tutqigñaqtuamiglu, god-tiliqiruamik isumakkusiaqaġluataqtuamiglu suraġaġnipayaami. 3Taamna nakuuruq, suli iviġaumanaqtuq God-mun Annaurriptiŋnun, 4kipiġniuqtuamun iñupayaat annaurrautquvlugich suli iḷitchuġitquvlugich ilaan iḷumun ittuaŋanik. 5Qanuq atausiuruq God, suli atausiq atisipkaiñiaqti God-miglu iñuŋniglu, iñuk Christ Jesus, 6piviksraq nalautinman tuqutinŋaruaq inmiñik tasuqsaqługich iñupayaat. Taamna ukpiġnaqsiḷġutauŋaruq God-mun annaurrautqutilaaŋannik iñupayaat. 7#2 Ti 1.11.Suli taamna pisigivlugu nalunaiqsauŋaruŋa alġaqsruitquvluŋa iḷisaurritquvluŋalu Jew-guŋitchuanik God-im annaurrisaanik iñuŋnik ukpiliġmata. Sagluŋitchuŋa. Iḷumun ittuamik uqaqtuŋa.
8Kipiġniuġutigigiga sumipayaaq iñuich aŋaiyyutquvlugich isaaġutilugich argatiŋ, iñuuniaqtuaguruat iḷumun pisilugu God qinnautaiḷḷutiŋ naagga qanaaġutaiḷḷutiŋ iñupayaanun. 9#1 P 3.3.Aġnat annuġaaqtuqtuksraugaluaqtut qaaŋiulaaŋaŋaiġḷutiŋ isumattutikullu iruġnaiġḷutiŋ annuġaaġlutiŋ. Aġnat ukpiqtuat nalunaigiraksraułhaaŋaiġḷugich nutchiqiniġmikkun, naagga qiñiyunaqusiqsuġniġmikkun uyamitquanik akisuruanik, naagga akitchuuqtinniġnik annuġaanik, 10aglaan iḷisimanałhaaġlutiŋ savaalluatatigun nalliummatiruatigun aġnanun aŋaiyyuliqiniruanun. 11Aġnat naalaġniruksraurut iḷisaurriruanun nipaisaaġlutiŋ piuniaŋaiġḷutiglu. 12Iḷisaurripkaġumiñaitkitka aġnat naaggaunnii ataniġnaqutiqaqulugich aŋutinun. Nipaisaaqtuksraurut. 13#Gn 2.7; Gn 2.21, 22.Qanuq Adam iñuġuqtitauqqaaŋaruq, maanna Eve. 14#Gn 3.1-6.Suli Adam sagluqirauŋaitchuq, aglaan aġnaq sagluqirauŋaruq kamagiŋił̣ł̣ugu God-im pitquraŋa. 15Tavraasii God-im aġnat piqaqtitkai kiiqsiuġunmik isumaaġunmiglu miqłiqtuŋich aniñiaġaġimmata, aglaan ilaan annautiniaġai iliŋisa ukpiġikpanni, iñuuyugaġlutiŋ pialaŋiḷḷutiŋ, nakuulutiŋ, piviuttaġinaqtuanik iñuusiqaġlutiŋ.
Currently Selected:
1 Timothy 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
