1 Timothy 1
1
1Ukua tuyuutit tuyuġigai Paul, tilirautquŋakkaŋata piraksriivḷuni God-im Annaurriptalu Jesus Christ annagummatigikkapta. 2#Ac 16.1.Tuyuutaurut iliŋnun Timothy, iġñipiaġataptun ittuamun ukpiliqsinŋavlutin Christ-mun. God-tiptuq Aapam Christ-lu Jesus Atanipta iviġaummatigilisin nagligilutillu tutqiutiqaqtillutillu.
Paul Kiliktuutiŋi Iḷumun Inŋitchuatigun Iḷisaurrutitigun
3Ephesus-miitqugikpiñ, taimanisun Macedonia-muksaqama apiġipiaŋavlutin. Iñuich iḷaŋich taamani iḷisaurrivḷutiŋ iḷumun inŋitchuanik iḷisaurrutinik, aasii uqallautiraksraġigitin iḷisaurriŋaiqulugich iḷumun inŋitchuanik. 4Uqautilugich aptatiqaŋaiqulugich unipkaalianik, maŋŋuumiŋniglu takisipiaġataqługich atiqaġviḷiamiŋnik, qanuq tamatkua aguirrutaugiññaġuurut uqaġlaqutiksranun, ikayuutaulaitchut nalautchiñiaġniġmun God-im sivunniuġutiŋiñik, ukpiġunmullu agliḷaaġutaulutiŋ piḷaitchut. 5Piraksriġikpiñ uqallautitquvlugich iñuich piviuttaqqutimmaġiksaaliquvlugich avanmun, naġġutchaktaŋaiġḷutiŋ isumamiŋni, suli suaŋaruamik ukpiġutiqaquvlugich. 6Iḷaŋich iñuich saquŋarut iḷumun ittuaniñ taŋiġitchuanun uqavaaġutinun. 7Kipiġniuqtut iḷisaurrausukłutiŋ God-im pitquraŋiñik, kaŋiqsigaluaġnagich nallipayaaŋich uqaluŋmiŋ naagga sutigun uqautigikkaġmikkun nalupqinaigivlugich.
8Paŋmapak iḷisimarugut pitqurat nakuutilaaŋannik, kialiqaa atuqpagich God-im sivunniutaatun. 9Qanuq iḷisimarusi God-im pitquraŋi pitquraliaguŋisilaaŋannik iñuŋnun nalaunŋaruanun sivuġaani God-im. Aglaan pitquraliagurut iñuŋnun piḷuusiqirinun uumikłiqsuanun God-mik, tamatkunuŋa paaqłaŋaruanun pitquranik, piḷuktuanun iñuŋnun, god-taiḷaqtuanun, iñuaqtinun aapamiŋnik aakamiŋniglu, iñuaqtuqtinullu, 10allatuqtinullu, aŋutinullu kanŋunaqtuakun atuutiruanun, tainnatuttauq aġnat aġnauqanmiŋnun, iñuŋniglu tigliguuruanun, tamatkunuŋalu sagluturuanun iḷumun inŋitchuanik quliaqtuaqaqłutiŋ, suli piruanun supayaanik paaqsaaŋaruanik nalaunŋaruanun iḷisaurrutinun qanuq God-im pitqutipiaŋiñik. 11Tamatkua nalaunŋaruat iḷisaurrutit iḷagigai tusaayugaaġiksuam nalunaiqsautigikkaġma uqautigitquvlugich, tusaayugaaġiksuat kamanaqtuamiñ quyyavigiraksrauruamiḷḷu God-miñ.
Quyyatit God-im Nagliktuutaagun
12Quyyavigigiga Christ Jesus Ataniqput suaŋŋasiġmaŋa savakkumiñaqsivḷuŋa. Quyyavigimmigiga nalliummatipkaġmaŋa savaktiksraqtaaġivluŋa inmiñun, 13#Ac 8.3; 9.4, 5.uvaŋa sivuani uqamaqłuktaugaluaqtilluŋa nagliksaaqtitchivḷuŋalu suli pisaaŋavlugu ilaa. Aglaan God-im nagligiŋagaaŋa pisigivlugu suliqitilaamnik naluniġa ukpiŋaił̣ł̣uŋa. 14Ataniqput naglikkutiqpaqaŋaruq uvamnun, suli ukpiliqsiłłuŋa piviuttaġipkallasivḷugiḷḷu allat iñuich pigillakkaptiŋnik atausiŋŋuqatigiŋavlugu Christ Jesus. 15Una uqallautauŋaruaq iḷumun ittuq suli akuqtugaksraupiaqtuq ukpiġilugulu, Christ Jesus qaiŋaruq nunamun annautiyaqtuqługich piḷuktuat iñuich. Aasiuvva uvaŋa piḷuŋniqsrauruŋa piḷuusiqiriniñ. 16Taamna pisigivlugu God-im nagligiŋagaaŋa. Piḷugniqsraugaluaqtilluŋa piḷuusiqiriniñ, Christ manimmiḷguŋagaaŋa annautillasiḷaaqamiŋa. Aasii paŋmapak iḷitchuqqutauyumiñaqtuŋa ilaan manimmiḷgutaanun iluqaiññun ukpiliġumaaqtuanun inmiñun aasii iñuullasiḷutiŋ isuitchuamun. 17Umialik isuitchuamun tuqulaitchuaq, qiñiġnaitchuaq, kisimi God-tauruaq, illi qutchiksuakun isumakkusiaqaġli taimuŋa isuitchuamun. Amen.
18Timothy iġñiiŋ, piraksriġikpiñ ukpiġnaqtuagutquvlutin savaurriñiġni Ataniġmik. Taamna piraksriutigigiga uqaqtiŋisa God-im ilipkun. Taipkua uqaluata piyummiqsillisin aŋuyagluataġumiñaqsiḷugu pigiitchuaq, 19ukpiġnaqtuagulutin savaaġikkaġni, suli iñuullasiḷutin naġġutchaktaġnaitchuakun isumaŋni. Iñuich iḷaŋich tainna iñuuŋitchut aglaan pisaaġiugaqsiññaqłutiŋ sunik iḷisimagaluakkaġmiŋnik piḷuusiqutautilaaŋannik, aasii ukpiġutaiqsivḷutiŋ inmiŋnik. 20Tainnaqtuat iñuich iḷagigaich Hymenaeus-lu Alexander-lu, aitchuutigiŋakkaka Satan-mun tatavsaquvlugik, iḷisausiaqaquvlugik uqamaqłuutiqaġumiñaiġḷutik God-mik.
Currently Selected:
1 Timothy 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
