1 Timothy 3
3
Umialiŋnat Aŋaiyyuliqiruani
1Una uqaluk iḷumun ittuq. Kiñaliqaa kipiġniuġumi savaaŋanun umialiŋnaunġum, ilaa kipiġniuqtuq savaaġiksuamik. 2#Titus 1.6-9.Umialiŋnat naġġukkusiagitchuksraurut, atautchimik nuliaqaġlutiŋ, qaaŋiulaaŋaŋiḷḷutiŋ, inmiŋnik aŋalalluataġlutiŋ, pialaŋiḷḷutiŋ, tukkuulutiŋ, iḷisaurriyumiñaġlutiŋ, 3taaŋŋalaiḷḷutiŋ, piaqłuktaiŋiḷḷutiŋ pikałaktaqtuaguŋiḷḷutiŋ, qanaaġuksiññaqtuaguŋiḷḷutiŋ, piviuttaqsrałhaaŋaiġḷutiŋ maniŋmik. 4Umialiŋnat aŋalalluatapiagaksraġigaich miqłiqtutiŋ, kamaksripkaġlugich, qutchiksuakullu isumakkusiaqallasiḷugich. 5Qanuq iñuk naluruaq aŋalatchiñiġmik miqłiqtumiñik, qanuġluni qaunagiyumiñaqpagich God-im aŋaiyyuliqiruaŋi? 6Umialiŋnaġuġniaqtuaq ukpiqtuaguqqammiqsuksrauŋiñmiuq, iḷaanni kamasaaliqpiaqtuq aasii tatavsaqtauluni Tuunġaqtun. 7Sulivsauq isumakkusiaqaġluataqtuksraummiuq ukpiqtuaġuŋaitchuaniñ. Tainnainŋisuaġumi, ilaa kanŋusaaġutauniaqtuq aŋaiyyuliqiruanun, aasii Tuunġaġmun payaripkaġluni.
Tiikauruat Aŋaiyyuliqiruani
8Tiikauruat tainnatuttauq iñuulluataġniaqtuksraummiut, malġuŋnik uqaluqaŋaiġḷutiŋ, imiqpaiñŋaiġḷutiŋ wine-mik, piḷḷatutaiḷḷutiŋ pigiitchuakun maniññaŋniaġniġmun. 9Iliŋisa ukpiġipiagaksraġigaat iḷumun ittuaq nayummataulutiglu iḷumun ittuanun iḷisaurrutinun Christ-kun, qiñiġnaił̣ł̣uni kaŋiuruamun ukpiġunmiŋnun. 10Suli tiikauruat uuktuaqtauqqaaġlich, aasii iḷumun itilaaqtauganikpata, savarraqsiḷich tiikauruatun. 11Nuliaŋich tainnatuttauq iñuulluataġniaqtuksraummiut, uqqaqtuŋaiġḷutiŋ, aglaan qaaŋiulaaŋaŋiḷḷutiŋ, pitqiksiġautaiḷḷutiŋ supayaakun. 12Tiikauruat nuliaqaġlich atautchimik, suli aŋalallisigik miqłiqtutiŋ igluqatitiglu iłuatun, 13qanuq tamatkua savaurriḷḷuataqtuat tiikauniġmi piññaktut qutchiksuakun isumakkusiamik inmiŋnun aasii uqautiqaġumiñaqtut ukpiġun mik taluqsrautaiḷḷutiŋ pigikkaptiŋnik atausiŋŋuqatigikaptigu Christ Jesus.
Kamanaqtuq Kaŋiqsiñaiñŋaruaq
14Tuyuksriullaġma ukuniŋa tuyuutinik piyummatiqaqtuŋa ullagumavlutin tautuŋnasuaġukłutin. 15Aglaan qaikallaŋisiġuma ukua tuyuutit iḷisimapkaġniaġaatin qanuq iñuusiqaqtuksrautilaaptiŋnik God-mun igluqatauniptiŋni, aŋaiyyuliqiruaguvluta iñuuruamun God-mun. Ilaan aŋaiyyuliqiruaŋi tamatkuagurut kamaksriruat, ukpiġnaqtuakullu nayummataurut iḷisaurriruat God-im iḷumun ittuamik uqaluanik. 16Kialiqaa piiḷaaġiyumiñaitkaa qanutun kamanaġniŋa kaŋiqsiñaiñŋaruam ukpiġikkapta. Christ qiñiġnaqsiŋaruq timiqaqłuni iñuktun, iḷumun inniŋagaa Ilitqusiġiksuam, tautuŋagaat isaġulgich. Ilaa alġaqsruutauŋaruq akunġanni nunauruat, ukpiġiŋagaat iñuich, mayuurrauŋaruq qiḷaŋmun.
Currently Selected:
1 Timothy 3: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
