1 Timothy 4
4
Iḷisaurriŋŋuat
1Ilitqusiġiksuam nalupqinaiqł̣ugu uqallausiġigai iñuich iḷaŋich ukpiġutaiġñiaġnivḷugich aqulliġñi uvluni, kamagilugich sagluqinniktuat ilitqutchich, maliġuaġlutiglu ilitqusiqł̣uich iḷisaurrutiŋiññik. 2Tamatkua iḷisaurrutiginiaġaich ukpiŋŋuaqtuat sagluturuaguvlutiŋ, naġġutchapayaayuitchuatunnii isumamiŋni iḷisaurrikamiŋ tamatkuniŋa saglunik. 3Tainnatchich iñuich iḷisaurrirut killukuaŋanivḷugu tuvaaqatiniktuni, niġiruniḷu niqit iḷaŋiññik. Aglaan God-im savaŋagai niqiksrat niġitquvlugich quyyatigiqqaaġlugich aŋaiyyutikun, tamatkunuŋa ukpiqtuanun suli iḷitchuġiŋaruanun iḷumun ittuamik. 4Qanuq supayaat savaaġiŋarai God-im nakuurut, suli sunaliqaa ayyagaksrauŋitchuq, aglaan akuqtugaksrauruq quyyatigilugu aŋaiyyutikun, 5qanuq uqaluata God-im aŋaiyyutivlu akuqtuġnaġumiñaqsigaak God-mun.
Christ Jesus-gum Kivgalluataŋa
6Ilivich iḷisaurrutigigupkich tamatkua aniqatinun kivgaulluataġniaqtutin Christ Jesus-mun, suaŋasiñiaġutigillaan ukpiġutin God-im iḷumun ittuanik iḷisaurrutiŋiñik ilivich kamagivlugich. 7Iḷaksianagich god-taiḷautikun ittuat asiḷiqqutikullu unipkaat. Ayuġaksaġiñ iliŋnik iñuusuglutin God-im iñuutqutaagun iliŋnun. 8Qanuq timim qiġġaiyaġniŋa anniqsuusiaqaġnaġaluaġmiuq, god-tiliqiniq anniqsuutiqałhaaqtuq qanusipayaakun, unniqsuqłiisiqaqłuni paŋmapak iñuutchimun suli iñuggunmun isuitchuamun. 9Taamna iḷumun ittuq uqaluk akuqtugaksraupiaqtuq ukpiġilugulu. 10Taamna sivuniġivlugu siġġaqirugut savautivlugu siġḷiqivluta iñuuruaq God, niġiugikkaqput annautiniaġnivḷuta, annaurrigiyumiñaġaluakkaŋat iñupayaurat, tamatkuałhaaq ukpiqtuat.
11Tamatkua iñuŋnun piraksriutigikkich iḷisaurrutigilugiḷḷu. 12Kialiqaa suuŋiḷaġiŋaiḷḷisin nutauniḷutin, aglaan tuvraaksrikkich ukpiqtuaguruat uqaġnipkun iñuuniaġnipkullu piviuttaqsriñipkullu ukpiġutipkullu iñuulluataġnipkullu. 13Qaitchiaġiluŋa, atuġuŋ piviksran taiguaġlugich Bible uqaluŋich kasimaruani, alġaqsruiḷutillu iḷisaurriḷutillu. 14Atupiaġatakkich piḷḷasipkakkaŋi God-im aitchuutiŋi iliŋnun, satqummiŋakkaŋich God-im uqaqtiŋisa umialiŋnat iḷimmatigik argatiŋ iliŋnun ilaaguaqłutin savaaksriusiaġnun. 15Atuqtuiññakkich tamatkua piḷḷasipkausiatin ataramik, iñuich iluqaġmiŋ tautukkumagaat sivunmuktuġniġiñ. 16Qaunakkuiñ iliŋnun, qaunagilugiḷḷu qanuq iḷisaurrisilaaġnik. Tainna pituiññaġuvich, annautipkallasiñiaqtutin iliŋnun tamatkualu tusaaruat iliŋnik.
Currently Selected:
1 Timothy 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
