1 Timothy 5
5
Qaunakłaaġniq Ukpiqtuanun
1Suaŋnagu utuqqanaaq aglaan araktuaġuŋ aapagimmatun. Aŋalatkich nukatpiat aniqatiktun iḷiḷugich. 2Utuqqanaat aġnat aŋalatkich aakagimmatun, suli niviaqsiat aniqatiktun, aŋalallugich piḷuutaitchuakun.
3Suuŋiḷaġinagich uiḷgaŋaruat ikayuqtiqaqtuksraupiaqtuat. 4Uiḷgaŋaruaq miqłiqtuqaqpan naagga tutaaluuqaqpan piḷḷasiŋaruanik, tamatkua qaunagilirruŋ ilaa, puttuqsriḷutiŋ tainna pigumiŋ paaqłiiñiḷuktilaamiŋnik aŋayuqaamiŋnik ataataamiŋniglu, aasii tainna pikamiŋ savaurrirut God-mik, iviġakługulu. 5Aġnaq uiḷgaŋaruaq qaunaksriksraił̣ł̣uni niġiuktuaguruq ikayuusiaksramiñik God-miñ, aasii aŋaiyyuuqłuni apiġivlugu unnuakkaluami uvlumiḷu ilaanun ikayuquvluni. 6Aglaalli uiḷgaŋaruaq qaunakł̣aaŋił̣ł̣uni aliasuŋiññiaqsiññaqtuaq, iñuugaluaŋŋaġmi tuquŋaruatun ittuq sivuġaani God-im. 7Taavrumiŋa piraksrikkich, pasiñaġumiñaitchumaut. 8Kiñaliqaa pamatchiŋitkumi nanmiñiġmiñik, taapkuniŋałhaaqami nanmiñiq qitunġamiñik, iñuuŋitchuq tuvraġlugu ukpiġikkaqput, aasii pigiił̣haaqtuq unnii ukpiŋaitchuamiñ.
9Kiñapayaaq kisiuqatiginagu uiḷgaŋaruanun ukiuqaqtuaq inuqsimalugu piŋasukipiaq ukiuq. Aasiisuli uiñiŋaruksrauruq atautchimi. 10Suli uiḷgaŋaruaq uqausikkusiaqaġluataqtuksrauruq savaalluatamigun, iñukkuksaiḷḷuataŋaluni miqłiqtumiñik, tukkuliisuuluniḷu iglaanik aimaaġviŋmiñun, iqaġisuulugiḷḷu ukpiqtuat isigaŋich, ikayuġuulugiḷḷu iłuiḷḷiuqtuat, nakuurualiqiluniḷu qanusipayaakun.
11Aglaan iḷaḷiutinagich uiḷgaŋaruanun nutauŋŋaġmiŋ uiḷgaŋaruat. Qanuq pisuguunmiŋni uiñigulitqikkumiŋ saquniaqtut savaurriḷḷuataġniksramiŋniñ Christ-mik, 12aasii tainna pikamiŋ pasiraurut navguiñikun unniqsuqłiisiqqaamiŋnik ilaanun. 13Taamnatualuuŋiñmiuq, iḷisaqtut iḷatchiġñiġmik, kukiḷuksiññaqłutiŋ igluniñ iglunun, aasiisuli pigiił̣haaqtuaq iḷisaqługu uqqaqtuniq, iḷaksianniktuagurullu uqaqłutiŋ uqaluksraġiŋisamiŋnik. 14Tamatkua pisigivlugich nutauvlutiŋ uiḷgaŋaruat tuvaaqatiniqugitka, miqłiqsiuġlich, qaunagilugiḷḷu aimaaġvisiŋ, uumigirivut uqautikkutiksraitchumaut pigiitchuamik uvaptigun. 15Qanuq iḷaŋich uiḷgaŋaruat asivaaniŋarut malikługu Tuunġaq. 16Kiñaliqaa ukpiqtuaguruaq uiḷgaŋaruaqaġumi qitunġaamiñi ilaan qaunagiraksraġigai, aasii naŋniŋiḷḷugich aŋaiyyuliqiruat ikayuiyumaut uiḷgaŋaruanik ikayuqtiksraipiaqtuanik.
17Umialiŋnat aŋalatchiḷḷuataqtuat aullarrauniġmik nalliummatirut malġuktun akiḷiusiamik, tamatkuałhaaq siġġaqiruat alġaqsruivḷutiŋ iḷisaurrivḷutiglu, 18#Dt 25.4; Mt 10.10; Lk 10.7.qanuq Bible uqaluŋich uqaqtut inna, “Sigguġutituġniaŋitkiñ qimukti amiġaiyairuaq tunmaqługich palauvaksrat,” suli “Savakti nalliummatiruq akiññaktaaksramiñun.” 19#Dt 17.6; 19.15.Naalaġniñasi suuramikunnii pasikkusiaŋagun umialiŋnam, malġuk naagga piŋasut uqautigiŋisuaqparruŋ pasiḷugu. 20Tamatkuali sivunmuuruat piḷuunmi, suakkich takkuanni iñuich iluqaġmiŋ, kisiŋŋuqtat piḷuksiŋitchuat sivuuqqatiqaġumaut piḷuksiñiksramun.
21Takkuaŋni God-im Christ-lu Jesus piḷuutaitchuallu isaġulgich, piraksripiaġikpiñ kamagitquvlugich tamatkua piraksriutitka, iñuich iḷaŋich iviġaumagiłhaaŋaiġḷugich allaniñ iñuŋniñ supayaatigun ilivich pikkapkun. 22Qilamiqsruuttaġinagu iḷisiñiaġniq argaŋnik ilaaguaqsiñiksramun iñuŋmik savaaŋanun Atanġum. Patchisauyumiñaqsiñak allat iñuich piḷuutiŋiññun. Qaunakkuiñ iliŋnik piḷuutaitchuglutin. 23Tavraŋŋaaglaan imiqaġnak imiłhiñamik, aglaan wine-tułaurallaalutin pisigilugu aqiaqqun, qanuq naŋitchuurutin akulaitchuamik. 24Piḷuutiŋich iñuich iḷaŋisa nalunaitchut, aasii taamna pisigilugu nalupqinaitchuq isivġiqsauniaqtut. Aglaan piḷuutiŋich allat iḷisimanaqsiñiaqtut aquvatigun. 25Tainnatuttauq savaalluatat nalunaiñmiut, nalunaiñŋitkaluaġumikunnii iriqsimaanikkumiñaitchut.
Currently Selected:
1 Timothy 5: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
