1 Thessalonians 4
4
Iñuuniaġniq Iviġaumavlugu God
1Aasiisuli aniqatiit, kiiqsruġivsi siḷġiqsuqłusiḷu atausiŋŋuqatigianiŋakavsiuŋ Ataniq Jesus, iñuutquvlusi tuvraġlugu iḷisaurrutikput ilivsiññun, iviġaumagikkaŋa God-im. Tainna iñuusaaniŋagaluaġmiusi, aglaan uvaŋa sivunmuktuġlusisuli iñuutqugivsi. 2Qanuq iḷisimagisi sut iḷisaurrutigiŋaravut ilivsiññun ataniġnaqutaagun Atanġum Jesus. 3God-im iñuutqugaasi iñuusiqaġlusi ilaaguaqtauŋaruanik inmiñun, iḷaksiaŋaiġḷugu allatuun, 4ilivsi atausiullaalusi iḷisimatquvlusi qanuq qaunaginaqtilaamik inmun, piḷuutaiññiaqłuni, suli nalliummatiluni God-mun pigiyumiñaqsiḷuni. 5Aŋalatinnasi kipiġniuġutivsiññun allatuġumiñaqsiḷusi, ukpiŋaitchuatitun iñuktun naluruatun God-mik. 6Tavra kiñaliqaa kamaksriŋiññami aasii saglutaġlugu aniqatini allatuaġilugu tuvaaqataa, qanuq Atanġum tatavsaġniaġai iluqaisa tainna piruat, kiliktuammaġiksaaŋagivsiusi taavruma sivuani. 7Qanuq uvva God-im sivunniutigiŋaitkaa uvagut iñuutquluta piḷuunmi, aglaan iñuuniaquvluta piḷuutaiḷḷuta. 8Taamna pisigilugu, kiñaliqaa iñuusuŋitchuaq kamagilugich taapkua pitqurat, kipuqłaiŋitchuq iñuŋmik aglaan God-mik, aitchuiruamik Ilitqusiġiksuamiñik ilivsiññun.
9Sivuniġilugu piviuttaqqutaat aniqatit, tuyuqtituŋitchusi kimigliqaa qanuq ilivsi ilivsiññi iḷisaurrusiaqaŋarusi God-miñ piviuttaqqutitquvlusi avanmun, 10aasiami iḷumutun piviuttaġigisi iluqaisa aniqatit iluqaani Macedonia-miittuat. Aglaan aniqatiit, uvagut siḷġiqsuġivsi kiikaasuli piviuttaqqutitquvlusi. 11Kipiġniuttaġiqpaksiuŋ iñuusuglusi piallataiḷḷusi, suli iḷaksiaŋaiġḷugich allat iñuich, akiññagniḷuglusi iñuuniḷuutiksravsiññik, tuvraġlugu piraksriutikput ilivsiññun. 12Taamna piguvsiuŋ, ukpiŋaitchuat isummatigilluataġniaġaasi, suli ilivsi nayummatiqaġniaŋitchusi pamatillusi allanun iñuŋnun.
Ataniq Qaiñiaqtuq
13Aniqatiit, paŋmapak aglaksaqtuŋa sivuniġivlugich siñiktuat tuqqunmi. Iḷisimalluataqugiga taamna ilivsiññun, isumaaqpaquŋił̣ł̣usi allatun iñuktitun niġiugaitchuatun iñuggunmik isuitchuamik. 14Ukpiġikaptigu Jesus tuquŋanivḷugu aasii aŋimmivḷuni, tainnatuttauq ukpiġiyumiñaġmigikput Jesus qaitqikpan, God-mun qaiqatigipkaġniaġniḷugich ilaanun tamatkua siñiksaŋaruat tuqqunmi. 15#1 Co 15.51, 52.Uqallautigivsi iiguliktauŋitchuamik Atanġum uqallautaanik uvamnun, uvagurguuq iñuuruaguut iñuuniġupta Atanġum qaitqigñiŋanunaglaan, sivulikkumiñaitkivut tamatkua siñiktuat tuqqunmi. 16Qanuq Ataniq ilaa atqaġniaqtuq qiḷaŋmiñ ququullatigilugu kamanaqtuaq piraksriun, qaukłiata isaġulgich ququullataanik, suli nipaanik God-im nipauqłuktautaata. Aasii tuquŋaruat, atausiŋŋuqatigiŋavlugu Christ, aŋiqqaaġniaqtut. 17Aasiiḷi uvagut iñuuruaguut mayuurrauniaqtugut piqatigilugich nuvuyanun, paaġlugu Ataniq siḷami, aasii nayuaqsiḷugu ilaa isuitchuamun. 18Quviasaaġutisitchi avanmun taapkuniŋa uqaluŋnik.
Currently Selected:
1 Thessalonians 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
